Say Sankabalgan a Toon Nambilay ed Kapiganman

Kapitulo 106

Inwalwal na Saray Ilustrasyon ed Ubasan

Si Jesus so wala’d templo. Kasumsumpal to lambengat a tinalagnaw iramay relihyoson pangulo a kinmerew a mangamta no siopan autoridad a gagawaen to’ray bengatla. Sakbay iran naimasmasan ed inkawetwet da, intepet nen Jesus: “Anto so isisip yo?” Tan insan diad panamegley na ilustrasyon, impanengneng to’d sikara no anton talaga so inkatoo ra.

“Sakey a too so walaan na duaran anak,” salaysay nen Jesus. “Diad iyoonla ed unaan, inkuanto, ‘Anak, onla kan mankimey natan ed ubasan.’ Bilang ebat et imbaga na sayan sakey, ‘Onla ak, katawan,’ balet ta aglinma. Diad iyaasingger ed komadua, ontan met so inkuanto. Bilang ebat et imbaga na sayan sakey, ‘Agko.’ Kabekta et sikatoy nanbabawi tan linma. Siopa’d sikaran dua so nanggawa na linawa na ama to?” tepet nen Jesus.

“Say saginonor,” ebat na saray sumusumpa to.

Kanian impaliwawa nen Jesus: “Tua kuan ko ed sikayo a saray managsingil na buwis tan saray balangkantis makaloob iran unona nen sikayo ed panaria’y Dios.” Saray managsingil na buwis tan saray balangkantis, so diad katuaan et diad gapo so angipulisay a manlingkor ed Dios. Balet ta, singa say komaduan anak, nagbabawi ra tan nanlingkor ira’d sikato. Diad biek a dapag, saray relihyoson pangulo, singa say unaan ya anak, so nankuan a manlilingkor ed Dios, ingen, a singa ibabaga nen Jesus: “Si Juan [a Managbautismo] so linma’d sikayo ed dalan na katunongan, balet sikatoy ag yo sinisia. Anggaman ontan, saray managsingil na buwis tan saray balangkantis so anisia ed sikato, tan sikayo, anggaman saya so anengneng yo, so agnagbabawi ed kayari pian sikatoy panisiaan yo.”

Insublay ya impanengneng nen Jesus a say insaew na saraman a relihyoson pangulo so aliwan basta ed pangipupulisay a manlingkor ed Dios. Andi, noagta sikara so diad tua et mauges, marelmeng a totoo. “Wala so sakey a too, sakey ya unabong,” salaysay nen Jesus, “a nantanem na sakey ya ubasan tan inalar itan tan angotkot na panalakan ed satan tan amaalagey na sakey ya ilang, tan satan so inpaabang to ed saray managbunal, tan nambaroy ed taew. Sanen asabi lay panagani, imbaki to so ariripen to ed saray managbunal pian maka’la na apag to. Anggaman ontan, saray managbunal so angala ed ariripen to, tan sakey so pinekpek da, sananey ni so pinatey da, sananey so tinupak. Lamet et sikatoy angibaki arum nin ariripen, a mas dakel nen say inmuna, balet ontan met so ginawa ra ed saraya.”

Say “ariripen” et saray propeta ya imbaki na “unabong,” si Jehova a Dios, ed “saray managbunal” na “ubasan” to. Sarayan managbunal so manunan manangilaman na nasyon na Israel, nasyon ya ipapaamta na Biblia bilang say “ubasan” na Dios.

Lapud nilames tan pinatey na “saray managbunal” iray “ariripen,” impaliwawa nen Jesus: “Kaunoran et sikato [say akan-kien na ubasan] so angibaki ed anak ton laki ed sikara, ya ibabaga, ‘Respetoen da so anak ko.’ Diad impakanengneng ed anak, inkuan saray managbunal ed sakey tan sakey, ‘Saya so mananawir; galidia, sikato so pateyen tayo tan samsamey tawir to!’ Kanian sikatoy inala ra tan sikatoy inbantak da ed paway na ubasan tan sikatoy pinatey da.”

Natan, diad pangipapaarap ed saray relihyoson pangulo, intepet nen Jesus: “Sano onsabi so akan-kien na ubasan, anto so gawaen to ed saraman a managbunal?”

“Lapud ta sikara so mauges,” inyebat na relihyoson papangulo, “sikato so mangitarok na mauges a kadederal ed sikara tan ipaabang to so ubasan ed saray arum iran managbunal, a makapangiter ed sikatoy apag to sano asabi lay panaon na saratan.”

Diad ontan et agda aliklikas ya inukom da so inkasikara, lapud sikara so nisasakop ed limog na saray Israelitan “managbunal” na nasyonal ya “ubasan” na Israel nen Jehova. Say bunga ya iilaoan nen Jehova manlapud saratan a managbunal et say pananisia ed Anak to, say tuan Mesias. Lapud insaew dan mamawala na ontan a bunga, impasakbay nen Jesus: “Agyo ta’n balot abasa ed Kasulatan [diad Salmo 118:22, 23], ‘Say bato ya impulisay na saray managpaalagey et saman so nagmaliw a manunan pinagkasuyok a bato. Manlapu ed si Jehova et saya so agawa, tan satan so makapakelaw ed mata tayo’? Saya et no akin ya ibabagak ed sikayo, Say panarian na Dios so naekal ed sikayo tan niiter ed sakey a nasyon a mamapawala na saray bunga to. Ontan met, say toon napelag ed sayan bato so nabuyak. Dia balet ed siopaman a napataan na satan, satan so manmekmek ed sikaton tuloy.”

Naamtaan natan na saray eskriba tan manuna iran saserdote a sikaray tutukoyen nen Jesus, tan labay dan sikatoy pateyen, say manepenepeg a “mananawir.” Kanian say pribilihyon pagmaliw a manuley ed Panarian na Dios so naekal manlapud sikara bilang nasyon, tan sakey a balon nasyon na ‘saray managbunal na ubasan’ so napalsa, sakey a mamawala na matukoy iran bunga.

Lapud natatakot iray relihyoson pangulo ed karaklan, say turing da ed si Jesus et sakey a propeta, sikara so ag-analin mamatey ed sikato ed sayan inkagawa. Mateo 21:28-46; Marcos 12:1-12; Lucas 20:9-19; Isaias 5:1-7, NW.

▪ Siopa so irerepresenta na duaran anak ed unaan ya ilustrasyon nen Jesus?

▪ Diad komaduan ilustrasyon, siopa so irerepresenta na “unabong,” say “ubasan,” “saray managbunal,” say “ariripen,” tan “say mananawir”?

▪ Anto so pagmaliwan na ‘saray managbunal na ubasan’ tan siopa so onsalat ed sikara?