Say Sankabalgan a Toon Nambilay ed Kapiganman

Kapitulo 107

Say Ilustrasyon ed Ponsia na Kasal

Diad panamegley na duaran ilustrasyon, inwalwal nen Jesus iray eskriba tan manuna iran saserdote, tan sikatoy labay dan pateyen. Balet dakel ni ibaga nen Jesus ed sikara. Intuloy ton insalaysay ni sakey ya ilustrasyon ed sikara, ya ibabaga:

“Say panaria’y tawen miolibay ed sakey ya ari, ya nangawa’y sakey a liket ed pankasal na anak ton laki. Et inbaki to ray ariripen to ya manawag ed saray binagaan a mibansal et ag da ginabay so dinmagup.”

Si Jehova a Dios so Ari ya angiparaan ed ponsia na kasal parad Anak to, si Jesu-Kristo. Diad kaunoran, say nobyan 144,000 ya alanaan iran patumbok so napikasakey a kaibay Jesus ed tawen. Saray uuleyan na Ari et say totoo na Israel a, diad pagmamaliw a nitarok ed Ganggan a sipanan nen 1513 K.K.P., akaawat na pankanawnawan magmaliw a “sakey a panarian na saray sacerdotes.” Kanian, diad saman ya inkagawa, sikara so inmunan inimbitaan ed ponsia na kasal.

Anggaman ontan, say inmunan tawag ed saramay naimbitaan so ag-agawa anggad sanen panaoy loglog na 29 K.P., sanen si Jesus tan saray babangatan to (saray aripen na ari) so angigapo’d kimey a panangipulong ed Panarian. Balet agmalabay ya ondago iray natural ya Israelita ya akaawat na sayan tawag ya inpaway na ariripen manlapud 29 K.P. anggad 33 K.P. Kanian inikdan na Dios so nasyon na saray naimbitaan na sananey a pankanawnawa, a singa isasalaysay nen Jesus:

“Sikato’y angibaki lamet na sananey ya ariripen to, a kuan to, Ibaga yo ed saray binagaan, Nia, inparaan ko lay pagak; saray bakak tan saray pinatabak pinatey la ra, tan saray ganagana akaparaan la ra: gali la ed bansal.” Sayan komadua tan unor a tawag ed saramay naimbitaan so ginmapo diad Pentecostes 33 K.P., sanen say masanton espiritu so nikalbo ed saray patumbok nen Jesus. Sayan tawag so nantultuloy anggad 36 K.P.

Anggaman ontan, say baleg a karaklan na Israelitas so angipulisay met ed sayan tawag. “Ag da inngalngalep, tan iman lara,” kuan nen Jesus, “say sakey linma ed uma to, say sakey ed saray anapan to; tan saray arum inerel da so saray ariripen to, et nantamian da ra na makapabaing, tan pinatey da ra.” “Balet” intuloy nen Jesus, “apasnokan [so ari], et inbaki to ray inayuraan to, tan binagbag to ray amatey, tan inulam to so ciudad da.” Saya so agawa nen 70 K.P., sanen say Jerusalem so sigpot a binagbag na saray Romano, tan saraman a managpatey so pinatey.

Insan impaliwawa nen Jesus so nagagawa ed kaleganan: “Insan to [say ari] inbaga ed saray ariripen to, Say bansal akaparaan, balet ta saray binagaan ag ira onkana. Onla kayo sirin ed saray pansasangaay daladalan, et amiamin ya naromog yo itagar yo ra ed bansal.” Ginawa iya na ariripen, tan “say bansal [et] napno’y sankaili.”

Sayan kimey a panagtipon ed saray bisita manlapud saray lansangan ed paway na syudad na saray naimbitaan so ginmapo nen 36 K.P. Say Romanon opisyal na sundalo a si Cornelio tan say pamilya to so inmuna ed saray ag-agalsiman ya aliwan-Judio ya atipon. Say panagtipon ed sarayan aliwan-Judio, ya amin ed sikara so kasandi na saramay inmunan angipulisay ed tawag, so nantultuloy anggad koma-20 siglo.

Saman so legan na koma-20 siglo a say kuarto parad saray seremonyay kasal so apusek. Insalaysay nen Jesus so tinmumbok ya agawa, a kuanto: “Sanen linmoob so ari ya onnengneng ed saray sankaili, anengneng to’d man so sakey a toon ag-angisolong na kawes na mibansal. Et inkuan na ari ed sikato, Kaaro, panon so inyakar mo dia et ag ka nansolong na kawes na mibansal? Et sikato so ag akaskasel. Say ari ed satan inkuan to ed saray ariripen to, Balor yo ray lima tan sali to, tan ibantak yo ed kabilungtan na paway; sikato naani paningel tan panngalatenget na ngipengipen [to].”

Ililitrato na toon ag-akakawes na pikasal so alig-alig iran Kristiano na Kakristianoan. Saraya so agbalot bibidbiren na Dios a walaay suston pakabidbiran bilang espiritual iran Israelita. Sikaray agbalot nilanaan na Dios na masanton espiritu bilang mananawir na Panarian. Kanian sikaray inbantak ed kabilungetan na paway a ditan da sagmakey kadederal.

Sinampotan nen Jesus so ilustrasyon to diad pangibabagan: “Ta amayamay so saray natawag, daiset balet so napili.” On, dakel ya naimbitaan so manlapud nasyon na Israel pian magmaliw iran membro na nobya nen Kristo, balet ta pigara lambengat a natural ya Israelitas so pinili. Maslak ed 144,000 iran bisita ya akaawat na mangatatawen a tumang so apaneknekan ya aliwan-Israelita. Mateo 22:1-14; Exodo 19:1-6; Apocalipsis 14:1-3.

▪ Sioparamay inmunan naimbitaan ed ponsia na kasal, tan kapigan a sikaray inimbitaan?

▪ Kapigan impaway so inmunan tawag ed saramay naimbitaan, tan sioparay ariripen ya inusar pian ipaway itan?

▪ Kapigan ya innatnat so komaduan tawag, tan siopa kayari na satan so naimbitaan?

▪ Siopa so ililitrato na toon ag-akakawes na pikasal?

▪ Siopa iramay dakel a tinawag, tan saramay pigaran pinili?