Say Sankabalgan a Toon Nambilay ed Kapiganman

Kapitulo 127

Imponpon na Biernes​—Bakantin Lubok ed Simba

Natan et ngarem lan tuloy na Biernes, tan say Sabaton na Nisan 15 so onggapo diad kaselek na agew. Say bangkay nen Jesus so akabitin ya alepay ed palitek, balet ta siansia nin mabilay so duaran matakew a walad dikingan to. Say ngarem na Biernes so natatawag a Panangiparaan lapud saya so panaon ya ipaparaan na totoo iray tagano tan kumpletoen so antokaman niran kimey a kaukolan a nasumpal sakbay na isabi Sabaton.

Say magano lan onggapon Sabaton et aglambengat sakey a regular a Sabaton (say komapiton agew na simba) noagta sakey met a doble, odino “baleg,” a Sabaton. Natatawag itan na ontan lapud say Nisan 15, ya unaan ya agew ed pitoy-agew a Piesta na saray Andi-lebaduran Tinapay (tan lawas sakey a Sabaton, anggaman anton agew na simba so petekan to), so ompepetek ed parehon agew na say regular a Sabaton.

Unong ed Ganggan na Dios, agnepeg a taynan a sanlabin akabitin ed palitek iray bangkay. Kanian kinerew na saray Judio ed si Pilato a napapeles so patey na saramay papateyen diad pamiley na saray sali ra. Kanian, piniley na saray sundalo iray sali na duaran matakew. Balet lapud ompapatnag ya inatey lay Jesus, agpiniley iray sali to. Saya so manusumpal ed kasulatan: “Anggapoy anggan sakey a pukel to so namekmek.”

Anggaman ontan, pian naekal so antokaman a duaruwan talagan inatey lay Jesus, sakey ed saray sundalo so angiduyok na gayang ed dikingan to. Tinmalos so gayang ed kawalaay puso to, tan tampol a pinmaway so dala tan danum. Si apostol Juan, a sakey ya akatasi, so angireport a saya so anumpal ni sananey a kasulatan: “Onnengneng ira ed samay Sakey a dinuyok da.”

Atasian met nen Jose a taga syudad na Arimata so impamatey, sakey a dederlengen a membro na Sanhedrin. Sikatoy ag-inmabobon ed agmakanepegan a kiwas na atagey a korte sumpad si Jesus. Si Jose so diad tua et sakey a babangatan nen Jesus, anggaman sikatoy antakot a mangipabidbir na inkasikato ya ontan. Anggaman ontan, natan et sikatoy angagamil na pakpel tan linma’d si Pilato pian kerewey bangkay nen Jesus. Impatawag nen Pilato so manangasikason opisyal na armada, tan kayarin aseguro na opisyal ya inatey lay Jesus, inyawat nen Pilato so bangkay.

Inala nen Jose so bangkay tan binalkot itan ed malinis a pinon lienzo bilang panangiparaan parad ponpon. Sikato so tinulongan nen Nicodemo, sananey nin membroy Sanhedrin. Sinmaew met si Nicodemo a mangipatuay pananisia’d si Jesus lapud takot ed pakabalang na posisyon to. Balet natan et angawit na sakey a rolyo a mankargay nayarin talomplo tan talo a kilo na mira tan ankabli iran lana. Binalkot so bangkay nen Jesus na abel a walaan na sarayan pabalingit, unong ed paraan a niyugali na saray Judio ed panangiparaan ed saray bangkay parad ponpon.

Insan say bangkay so imparukol ed balon pakanodnonotan a lubok nen Jose a nilabra’d bato diad kabangibang na harden. Kaunoran, sakey a baleg a bato so intulin ed arapan na lubok. Pian nasumpal so ponpon sakbay na Sabaton, pinapeles so panangiparaan ed bangkay. Kanian, si Maria Magdalena tan Maria ya ina nen Santiago a Melag, a nayarin ontutulong ed panangiparaan, so nanapuran sinmempet pian mangiparaan na dakel niran pabalingit tan larak. Kayari Sabaton, implano ran balsamoen a nagkalalo ni so bangkay nen Jesus ta pian napabayag itan ed andukdukey nin panaon.

Say ontumbok ya agew, a Sabado (say Sabaton), saray manunan saserdote tan saray Pariseo so linma ed si Pilato tan inkuanda: “Katawan, anonotan min imbaga na saman ya impostor legan a mabilay ni, ‘Kayari taloran agew et siak so napaoli.’ Kanian iganggan mon seguroen a napaletan so lubok anggad komatlon agew, pian saray babangatan to so agbalot onla tan sikatoy takewen tan ikuan ed totoo, ‘Sikato so apaoli manlapud inaatey!’ tan sayan unor ya impostor so magmaliw a mas mauges nen say inmuna.”

“Walaan kayo na bantay,” ebat nen Pilato. “Onla kayon mamalet ed satan unong ed amta yo.” Kanian sikaray linma tan pinaletan so lubok diad impangiselyado’d bato tan impangipasen na saray sundalon Romano bilang bantay.

Masasakbay na kabuasay Simba, si Maria Magdalena tan si Maria ya ina nen Santiago, a kaibay Salome, Juana, tan arum niran bibii, so angawit na saray pabalingit diad lubok pian usaren ed bangkay nen Jesus. Diad pamapaarap et inkuanda’d sakey tan sakey: “Siopay mangitulin ed bato manlapud wangalan na pakanodnotan a lubok parad sikatayo?” Balet diad insabi, aromog dan walay agawan yegyeg tan intulin na anghel nen Jehova so bato. Naandi laray bantay, tan bakanti lay lubok! Mateo 27:57–28:2; Marcos 15:42–16:4; Lucas 23:50–24:3, 10; Juan 19:14, Jn 19:31–20:1; Jn 19:12:42; Levitico 23:5-7; Deuteronomio 21:22, 23; Salmo 34:20; Zacarias 12:10.​—NW.

▪ Akin a natatawag a Panangiparaan so Biernes, tan anto so “baleg” a Sabaton?

▪ Antoran kasulatan so asumpal a nipaakar ed bangkay nen Jesus?

▪ Anto so biang nen Jose tan Nicodemo ed ponpon nen Jesus, tan anto so pisisiglaotan da ed si Jesus?

▪ Anton kerew so ginawa na saray saserdote ed si Pilato, tan panon so inkiwas to?

▪ Anto so agawa ed masasakbay na Simba’y kabuasan?