Say Sankabalgan a Toon Nambilay ed Kapiganman

Kapitulo 128

Mabilay La si Jesus!

Sanen aromog na bibii a bakanti so lubok nen Jesus, si Maria Magdalena so nanapuran inmalis pian ibaga ed si Pedro tan Juan. Anggaman ontan, saray arum a bibii so mapatnag ya atilak ed lubok. Ag-abayag, sakey ya anghel so inmapireng tan inimbitaan iran onloob.

Dia et anengneng na bibii so sananey nin anghel, tan sakey ed anghel so angikuan ed sikara: “Agkayo natatakot, ta amtak ya aanapen yo si Jesus ya impasak. Sikato so andi’d dia, ta sikatoy apaoli, unong a kuanto. Gali’dia, nengneng yo so pasen ya angiparukolan ed sikato. Tan ’laka yon tampol tan ibaga’d saray babangatan to a sikatoy apaoli.” Kanian tekep na takot tan baleg a gayaga, sarayan bibii so nanapura met a tinmaynan.

Nayarin diad sayan pankanawnawa et aromog la nen Maria si Pedro tan Juan, tan sikatoy angireport ed sikara: “Inala’ray Katawan manlapud pakanodnonotan a lubok, tan agmi amta no iner so anginan da’d sikato.” Tampol a binmatik so duaran apostol. Mas maples so batik nen Juan​—mapatnag lapud malalangwer—​tan unaan ya akasabi’d lubok. Diad sayan pankanawnawa et akaalis la’ray bibii, kanian anggapo lay wadman. Diad iyuyuko nen Juan tan itatakiling ed loob na lubok et anengneng toray balkot ya abel, tan sikatoy nansiansia’d paway.

Sanen sinmabi Pedro, sikatoy agmasuyat noagta tuloytuloy a linmoob. Anengneng to’ray balkot ya abel ya akalurag diman tan ontan met ed abel ya imbalkot ed ulo nen Jesus. Satan so alukot ed saksakey a pasen. Si Juan natan so linmoob met la ed lubok, tan anisia’d imbalita nen Maria. Balet ag-atebek nen Pedro nisay si Juan ya apaoli si Jesus, anggaman mabetbet Ton imbaga’d sikaran Sikatoy napaoli. Lapud awetwet, sikaran dua so sinmempet, balet si Maria, ya amawil ed lubok, so nansiansia.

Kaleganan to, arum a bibii so nanapura pian ibaga ed saray babangatan ya apaoli si Jesus, unong ed bilin na saray anghel ed sikaran gawaen. Legan a sikaray ombabatik ed anggaay nayarian da, nabet ira nen Jesus tan inkuanto: “Maong ya agew!” Diad itatalimokor ed arapan to, sikaray angiter na aralem a galang ed sikato. Insan inkuan nen Jesus: “Agkayo natatakot! ’Laka yo, ibaga yo’d agagik, pian sikaray onla’d Galilea; tan nanengneng da ak diman.”

Asasakbay, sanen agaway yegyeg tan inmapireng iray anghel, saray sundalon akabantay so atalagnaw tan abaktar. Sanen naimasmasan, linma’ran tampol ed syudad tan imbaga’d saray manunan saserdote so agawa. Kayari intupleg ed “mamasiken” na saray Judio, apantongtongan dan salien a pepeen so pamaakaran diad pamasuksok ed saray sundalo. Binilin ira: “Ibaga yo, ‘Saray babangatan to so linma diad labi tan sikatoy inala ra legan a nanaugip kami.’”

Lapud nayarin dusaey patey iray sundalon Romano ed pakaugip diad saray panagbantay da, insipan na saray saserdote: “No saya [report ed impakaugip] so makasabi’d saray layag na gobernador, sikami mangumbinsi’d sikato tan ibulos mi kayo ed pakagonigonan.” Lapud ontanlan babaleg so pasuksok, ginawa na saray sundalo so unong ed bilin. Bilang resulta, say lingon report nipaakar ed impantakew ed bangkay nen Jesus so kinmayat ed limog na saray Judio.

Si Maria Magdalena, a nansiansia ed beneg na lubok, so atalonaan na ermen. Iner kasi kawalaan nen Jesus? Diad iyuuko pian onnengneng ed loob na lubok, sikatoy akanengneng na duaran anghel ya akaamputi, ya inmapireng lamet! Sakey so manyudyurong ed uloan tan say sakey so diad salian na angiparukolan ed bangkay nen Jesus. “Bii, akin a sika so manakakis?” tepet da.

“Inala ra so Katawan ko,” ebat nen Maria, “tan agko amta no iner so anginan da’d sikato.” Insan sikatoy linmingaw tan anengneng so sakey ya angulit ed tepet: “Bii, akin a sika so manakakis?” Tan saya met so tinmepet: “Siopa so aanapen mo?”

Isisipen ton saya so hardeniro ed kawalaay lubok, inkuan nen Maria ed sikato: “Katawan, no sikatoy inalam, ibagam ed siak no iner so anginan mo ed sikato, tan sikatoy alaen ko.”

“Maria!” inkuan na too. Tan tampol a naamtaan to diad pamilyar a paraan na pitotongtong to’d sikato, a si Jesus itan. “Rab·boʹni!” (a kabaliksan toy “Managbangat!”) inkelyaw to. Tan tekep na agnasabsabaan a gayaga, inmegna si Maria ed sikato. Balet inkuan nen Jesus: “Tunda kan ompepeket ed siak. Ta siak so agni tinmokotok ed kinen Amak. Balet ta ’laka ed agagik tan ibagam ed sikara, ‘siak so ontotokotok ed kinen Amak tan say Ama yo tan say Dios ko tan say Dios yo.’”

Si Maria natan so binmatik ya amaarap ed nantitiponan na saray apostol tan kaparan babangatan. Inyarum to so salaysay to ed report ya inter la na arum a bibii nipaakar ed impakanengneng ed apaolin Jesus. Ingen, sarayan lalaki, ya ag-anisia ed bibiin akauna, so mapatnag ya ag-anisia met ed si Maria. Mateo 28:3-15; Marcos 16:5-8; Lucas 24:4-12; Juan 20:2-18.​—NW.

▪ Kayari impakaimanon bakanti so lubok, anto so ginawa nen Maria Magdalena, tan antoy naeksperiensia na arum a bibii?

▪ Panon so inkiwas di Pedro tan Juan diad impakaimanon bakanti so lubok?

▪ Anto so nabet na arum a bibii diad pamapaarap da pian ibaga’d saray babangatan so inkioli nen Jesus?

▪ Anto so agawa ed sundalon bantay, tan anto so kiwas ed report da ed saray saserdote?

▪ Anto so agawa sanen bokbokor nen Maria Magdalena diad lubok, tan anto so kiwas na saray babangatan ed saray report na bibii?