Say Sankabalgan a Toon Nambilay ed Kapiganman

Kapitulo 129

Kaaruman Niran Apireng

Siasia nin maermen iray babangatan. Agda natalosan so kabaliksan na bakantin lubok, nisay panisiaan daray report na bibii. Kanian saginonor diad Simba, si Cleopas tan sananey a babangatan so inmalis ed Jerusalem ya amaarap ed Emmaus, a walaay kaarawin nayarin labin-sakey a kilometro.

Diad pamapaarap, legan a sisingbaten daray ebento’d saman ya agew, sakey ya estranghero so akiulop ed sikara. “Anto irayan pamaakaran a pansusuppiatan yo’d inkasikayo legay panaakar yo?” tepet to.

Tinmunda iray babangatan, a napatnagan ed kalupaan da so ermen, tan inmebat si Cleopas: “Kasin sikay manaayam bilang manbobokbokor ya estranghero ed Jerusalem tan sirin et agmo amta iray bengatlan agawa ed sikato diad sarayan agew?” Intepet to: “Antoran bengatla?”

“Saray bengatla a nipaakar ed si Jesus a Nazareno,” ebat da. “Saray manunan saserdote tan saray manuley mi so angipalima ed sikato ed sentensyan patey tan sikatoy impasak. Balet ta iilaloan mi a sayan too et samay sakey a nitalagan mangiliktar ed Israel.”

Impaliwawa nen Cleopas tan say kaiba to so makapakelaw iran ebento’d saman ya agew​—say report nipaakar ed labas-nen-natural ya impakanengneng ed saray anghel tan say bakantin lubok—​balet ta impatua ray kawewetwetan da nipaakar ed kabaliksan na sarayan bengatla. Sikaray binaat na estranghero: “O totoon andiay-pakatalos tan matantan ya impanpuso a manisia ed amin a bengatlan sinalita na saray propeta! Agta nakaukolan parad say Kristo a manirap na sarayan bengatla tan onloob ed gloria to?” Insan to impatalos parad sikara iray walan nisulat manlapud sagradon teksto a mangisisiglaot ed kinen Kristo.

Kaunoran et sikaray akarateng ed kabangibang na Emmaus, tan say estranghero so nantultuloy a singa no wala ni laen to. Diad pankaliktay pakarengel ni malaglaem, impaseseg na saray babangatan: “Mansiansia ka’d sikami, lapud onlalabi la.” Kanian sikatoy akipangdem ed sikara. Legan a sikatoy nampikasi tan amisag na tinapay tan inderew iratan ed sikara, abidbir dan sikatoy talagan si Jesus a nankinon-too. Balet ta sikato so naandipat.

Natan et atalosan da no akin a dakel a tuloy so amta na estranghero! “Agta say puso ta so manlilyub,” tepet da, “legan a sikatoy mitotongtong ed sikata diad dalan, a singa sigpot ton lulukasan so Kasulatan ed sikata?” Anggapoy panangipaleen, sikara so inmalagey tan nanapuran amawil ed Jerusalem, ya akaromogan da’d saray apostol tan saramay akitipon ed sikara. Sakbay a makapansalita si Cleopas tan say kaiba to, say arum so maligligsan angibaga: “Ta sakey a katuaan a say Katawan so apaoli tan sikatoy inmapireng ed si Simon!” Insan insalaysay na duara no panon ya inmapireng met si Jesus ed sikara. Saya so mikapat ya inyapireng to ed nanduruma’ran babangatan to ed saman ya agew.

Kabekta et inmapireng si Jesus ed mikalima. Anggaman saray puerta so akatalak lapud natatakot iray babangatan ed saray Judio, sikatoy linmoob, a manalalagey ed pegley da, tan kuanto: “Nawalaan kayo komon na kareenan.” Sikaray atalagnaw, ya iisipen ya akanengneng iray espiritu. Kanian, diad pangipapaliwawa a sikatoy aliwan aparisyon, inkuan nen Jesus: “Akin a sikayoy nagogonigon, tan akin a sinmabi’d saray puso yo iray duaruwa? Nengneng yoray limak tan saray salik, a siak a mismo; diwit yo ak tan nengneng yo, lapud say sakey ya espiritu so andiay laman tan saray pukel a singa pakakanengneng yo’d siak a wala.” Siansia ni, sikaray masuyat a manisia.

Pian natulongan iran makatalos a talagan sikato si Jesus, intepet to: “Kasin walaan kayoy bengatla ditan a naakan?” Kayari impangawat na sakey a pirason inkalot a sira tan impangan ed satan, inkuanto: “Saraya’may salitak ya imbalikas ko’d sikayo legan a siak so kaiba yo ni [sakbay na patey ko], ya amin a bengatlan nisulat ed ganggan nen Moises tan ed saray Propeta tan saray Salmo nipaakar ed siak so nepeg a nasumpal.”

Say katuaan to, diad pangitutuloy ed mankabaliksay panangiyaral ed Biblia ed sikara, imbangat nen Jesus: “Diad sayan paraan et nisulat a say Kristo so manirap tan ombangon manlapud inaatey ed komatlon agew, tan base’d ngaran to et say panagbabawi parad pakaperdonay kasalanan so nipulong ed amin a nasyon​—manlapud Jerusalem, sikayo so magmaliw a tastasi ed sarayan bengatla.”

Nisesengeg ed pigaran rason, si Tomas so anggapo’d ’man diad sayan importantin miting ed Simbay labi. Kanian diad tinmumbok iran agew et magaygayagan inkuan na arum ed sikato: “Anengneng mi so Katawan!”

“Nilikud no nanengneng koray bakat na saray pasak ed saray lima to,” protesta nen Tomas, “tan nisurob koy tamurok ed saray bakat na saray pasak tan nisurob koy limak ed dikingan to, petepeteg ya agak manisia.”

Bueno, waloran agew ed saginonor et saray babangatan so nantitipon lamet ed loob na abung. Diad sayan pankanawnawa et kaiba ra si Tomas. Anggaman saray puerta so akatalak, si Jesus so manalalagey lamet ed pegley da tan kuanto: “Nawalaan kayo komon na kareenan.” Insan, diad iyaarap ed si Tomas, inimbitaan to: “Ipasen mo so tamurom dia, tan nengneng moray limak, tan iyalis moy limam tan isurob mo’d dikingan ko, tan tunda kan agmanisisia.”

“Katawan ko tan Dios ko!” kelyaw nen Tomas.

“Lapud ta anengneng mo ak et sikay manisia?” tepet nen Jesus. “Maliket iramay ag-akanengneng tan ingen et manisia.” Lucas 24:11, 13-48; Juan 20:19-29.​—NW.

▪ Antoran panangupapet so ginawa na sakey ya estranghero ed duaran babangatan a mamapaarap ed Emmaus?

▪ Anto so imbaga na estranghero’d duaran babangatan a sengegay impanlilyub ed dalem na kapusoan da?

▪ Panon ya atebek na saray babangatan no siopa imay estranghero?

▪ Sanen pinmawil si Cleopas tan say kaiba to ed Jerusalem, anton makapaligsan report so arengel da.

▪ Anton komaliman apireng so ginawa nen Jesus ed saray babangatan to, tan anto so agawa legan na satan?

▪ Anto so agawa waloran agew kayari komaliman apireng nen Jesus, tan panon a si Tomas so diad kaunoran et akumbinsin mabilay la si Jesus?