Say “Israel na Dios” tan say “Baleg ya Ulop”
“Ninmengneng ak, tan nia, so sakey a baleg ya [ulop], a sikato so ag nayari a bilangen na too.”—APOCALIPSIS 7:9.
1-3. (a) Anton maglorian mangatatawen ya iilaloan so niwalad saray alanaan a Kristiano? (b) Panon a sinali nen Satanas a deralen so inmunan-siglon kongregasyon? (c) Anto so agawa nen 1919 ya angipanengneng a saray sagpot nen Satanas a deralen so alanaan a Kristianon kongregasyon so sinmaew?
SAY inkiletneg na “Israel na Dios” nen 33 K.P. so sakey a baleg a kundang ed pananumpal na saray gagala nen Jehova. (Galacia 6:16) Sarayan alanaan a membro so walaan na ilalon magmaliw ya ag-ompatey ya espiritun pinalsa tan miuley ed Kristo diad mangatatawen a Panarian na Dios. (1 Corinto 15:50, 53, 54) Diad satan a posisyon et walaan ira na baleg a betang ed pamasantos ed ngaran nen Jehova tan panmekmek ed ulo na baleg a Kabusol, si Satanas a Diablo. (Genesis 3:15; Roma 16:20) Agpankelawan a ginawa nen Satanas so anggaay nayarian to pian deralen iyan balon kongregasyon, namparan diad pamasegsegang ed satan tan diad gunaet a paneral ed satan!—2 Timoteo 2:18; Judas 4; Apocalipsis 2:10.
2 Legan a mabilay niray apostol, agmakatalona si Satanas. Anggaman ontan, kapatey da, agnapatunday inlaknab na apostasya. Diad kaunoran et diad panmoria na too, say puron Kristianon kongregasyon ya inletneg nen Jesus so singano abulok sanen pinalesa nen Satanas so apostatan relihyoson kaugsan a kabkabat natan bilang say Kakristianoan. (2 Tesalonica 2:3-8) Anggaman kuan, nansiansia ni tuan Inkakristiano.—Mateo 28:20.
3 Diad ilustrasyon to ed saray trigo tan zizañas, impasakbay nen Jesus a mibansag so ibaleg na saray tuan Kristiano ed “saray zizañas,” odino palson Kristianos; tan saya so agawa. Balet inkuan to met a diad kaunoran iran agew et ‘saray anak na panarian’ so naimanon biig manlapud “saray zizañas.” (Mateo 13:36-43) Apaneknekan met a tua iya. Nen 1919 et saray tuan alanaan a Kristiano so pinmaway manlapud Binababilonian inka-aripen. Sikaray binidbir na Dios bilang “matoor tan makabat ya aripen,” tan sikaray sipapakpel ya angigapoy panangipulong na maong a balita na Panarian. (Mateo 24:14, 45-47; Apocalipsis 18:4) Maslak ed sikara et Hentiles; balet lapud sikaray walaay pananisia a singa ed si Abraham, diad katuaan et sikara so ‘ananak nen Abraham.’ Sikaray membro na “Israel na Dios.”—Galacia 3:7, 26-29.
Say “Baleg ya Ulop”
4. Anton grupo na saray Kristiano so naimano, nagkalautla ed saray taon 1930?
4 Ununa, saramay kinmiwas ed impulong na sarayan alanaan a Kristiano so nagmaliw met ya espiritual ya Israelita, saray nakdaan na 144,000, a walaay mangatatawen ya ilalo. (Apocalipsis 12:17) Anggaman ontan, nagkalautla ed saray taon 1930, a naimano so sakey nin grupo. Saraya so kabkabat bilang “arum a carnero” ed ilustrasyon na saray kasimpukokan na karnero. (Juan 10:16) Sikaray babangatan nen Kristo a walaay ilalon andi-anggaan a bilay ed paraison dalin. Sikaray espiritual ya ananak, a singa panangibaga, na alanaan a Kristianos. (Isaias 59:21; 66:22; ipareng so 1 Corinto 4:15, 16.) Bibidbiren da so alanaan a Kristianon kongregasyon bilang say matoor tan makabat ya aripen, tan singa saray alanaan ya agagi ra, sikaray walaan na aralem ya aro ed si Jehova, pananisia ed bagat nen Jesus, seseg ed panangigalang ed Dios, tan inkamabulos a manirap nisesengeg ed inkatunong.
5. Panon a siaaligwas a nagkalalon atalosan so kipapasen na arum a karnero?
5 Diad inmuna et aliwa nin malinew so pakatalos nipaakar ed kipapasen na sarayan arum a karnero, balet diad ilalabas na panaon, napapalinew iray bengatla. Nen 1932 et apaseseg iray alanaan a Kristiano ya isagyat so arum a karnero a mibiang ed panagpulong a kimey—bengatlan gagawaen la ed saman na dakel ed arum a karnero. Nen 1934, say arum a karnero so pinaseseg a manpabautismo ed danum. Nen 1935, sikaray kabkabat bilang say “baleg ya ulop” na Apocalipsis kapitulo 7. Nen 1938, sikaray inimbitaan ya onatendi bilang manangimaton ed memoryal na impatey nen Jesu-Kristo. Nen 1950, saray mamasiken ed limog da so atalosan a kabiangan na “principes” a manlilingkor a “singa sakey ya amotan [ed] dagem, tan sakey a siroman ed bagyo.” (Salmo 45:16; Isaias 32:1, 2) Nen 1953, say mangaraldalin ya organisasyon na Dios—say babaleg a kabiangan to ed saman et titibukelen na arum a karnero—so anengneng bilang pinagka-pundasyon na mangaraldalin a sosyedad a niwala ed balon mundo. Nen 1985, atalosan a based dondon bagat nen Jesus, say arum a karnero so niyabawag bilang matunong a kakaaro na Dios tan walaay ilalon makaliktar ed Armagedon.
6. Anto so mansiglaotan iran posisyon na saray alanaan tan arum a karnero natan, a mangitonton ed antoran tepet?
6 Natan, diad sayan kaunoran a kabiangan na “saray kaonoran ya agew,” maslak ed 144,000 so inatey la tan akaawat la na mangatatawen a tumang da. (2 Timoteo 3:1; Apocalipsis 6:9-11; 14:13) Saray Kristianon walaan na mangaraldalin ya ilalo so manggagawa natan ed baleg a kabiangan ed panangipulong na maong a balita, tan ibibilang dan sakey a pribilihyo so panuporta ed alanaan ya agagi nen Jesus ed sayan bengatla. (Mateo 25:40) Anggaman ontan, sarayan alanaan so matoor tan makabat ya aripen ya uusaren pian iparaan so espiritual a tagano ed kaunoran iran agew. Anto so magmaliw a kipapasen na arum a karnero sano amin ya alanaan so angawat la ed mangatatawen a tumang da? Antoran probisyon so gawaen ed satan a panaon parad arum a karnero? Say antikey a panrepaso nipaakar ed kadaanan ya Israel so ontulong ed sikatayo pian naebatan irayan tepet?
Sakey a Tipikon “Panarian na Saray Sacerdotes”
7, 8. Diad anton paraan a nagmaliw a sakey a panarian iray saserdote tan masanton nasyon na Israel ed silong na Ganggan a sipanan?
7 Sanen pinili nen Jehova so Israel bilang nikabkabiig a nasyon to, sikatoy akisipanan ed sikara, a nankuan, “No tuloken yo so voces ko a tuatua, tan ememan yo so sipanan ko, sikayo ed satan so pabpablien ko a pinagka-kayamanan ko a manona nen saray amin a totoo, ta amin a dalin kien ko. Et sikayo naani singa sakey a panarian na saray sacerdotes, tan sakey a masimpit a nacion.” (Exodo 19:5, 6) Say Israel so nikabkabiig a totoo nen Jehova diad basiyan na Ganggan a sipanan. Balet, panon a nasumpal so sipan nipaakar ed sakey a panarian na saray saserdote tan sakey a masanton nasyon?
8 Say Israel, sanen matoor ni, et binidbir da so inkasoberano nen Jehova tan inawat da bilang Ari ra. (Isaias 33:22) Kanian, sikaray sakey a panarian. Balet, singa niparungtal ed saginonor, mankabaliksan na nagkalalo ni so sipan nipaakar ed “sakey a panarian.” Sakey ni, sanen sikaray tinmulok ed Ganggan nen Jehova, sikaray malinis, biig manlapud kabangibang a nasyones. Sikaray masanton nasyon. (Deuteronomio 7:5, 6) Kasin sikaray sakey a panarian na saray saserdote? Bueno, diad Israel say tribu nen Levi so nitalaga parad panaglingkor ed templo, tan diad loob na satan a tribu et wadtan so Levitikon inkasaserdote. Sanen inaguraan so Mosaikon Ganggan, saray lalakin Levita so nibiig bilang kasalat na panguloan na kada aliwan-Levitan pamilya.a (Exodo 22:29; Numeros 3:11-16, 40-51) Kanian, say kada pamilya ed Israel, a singa panangibaga, et nirepresenta diad panaglingkor ed templo. Saya so sankaapitan a dalan a say sakey a nasyon so nagmaliw a sakey ya inkasaserdote. Anggaman kuan, inrepresenta ra si Jehova ed arap na nasyones. Siopaman a sankaili a kaliktan toy mandayew ed tuan Dios so kaukolan a manggawa ed satan a kaiba na Israel.—2 Awaran 6:32, 33; Isaias 60:10.
9. Anto so rason ed impangipulisay nen Jehova ed mamaamianen a panarian na Israel ‘manlapud panaglingkor bilang sakey a saserdote ed sikato’?
9 Kayari impatey nen Solomon, naapag so totoo na Dios ya amaarap ed mamaamianen a nasyon na Israel ed silong nen Arin Jeroboam tan ed mamaabalaten a nasyon na Juda ed silong nen Arin Rehoboam. Lapud say templo, say sentro na puron panagdayew, so walad teritorya na Juda. Inletneg nen Jeroboam so sakey ya ilegal a pormay panagdayew diad impangipaalagey na saray imahen na kilaw ed dilin nasyonal a teritorya to. Sakey ni, “nangawa na saray abung ed saray atagey a pasen, tan nangawa na saray sacerdote a nanlapu ed nanleleetan na amin a baley, ya aliwa ra ed saray anak nen Levi.” (1 Arari 12:31) Say mamaamianen a nasyon so nimedmer a tuloy ed palson panagdayew sanen inabuloyan nen Arin Ahab so sankailin asawa ton si Jezebel, a mangiletneg na panagdayew ed Baal diad dalin. Diad kaunoran, inyabawag nen Jehova so panangukom ed rebelyoson panarian. Diad panamegley nen Oseas, inkuanto: “Say baley ko abagbag lapu ed kakulangan na pikakabat. Lapu ed impolisay mo so pikakabat, siak met naani ipolisay taka, pian sika so ag naani sacerdote ed siak.” (Oseas 4:6) Ag-abayag kayari to, dineral na saray Asiryano so mamaamianen a panarian na Israel.
10. Sanen matoor, panon a mangirerepresenta ed si Jehova so mamaabalaten a panarian na Juda ed arap na saray nasyon?
10 Komusta met so mamaabalaten a nasyon, say Juda? Diad saray agew nen Ezekias, inkuan nen Jehova ed sikara diad panamegley nen Isaias: “Sikayo so saray tasik, . . . say aripen ko a pinilik; . . . say baley a ginawak a nipaakar ed siak lanlamang, pian ipatnag da komon so kigalang ko.” (Isaias 43:10, 21; 44:21) Sanen matoor, say mamaabalaten a panarian so kinmana pian iyabawag ed nasyones so gloria nen Jehova tan pian sagyaten iray maptek-impanpuso a mandayew ed sikato diad templo to tan panlingkoran na saray lehitimon saserdoten Levita.
Saray Sankaili diad Israel
11, 12. Managlawi na pigaran sankailin nanlingkor ed si Jehova a kaibay Israel.
11 No nipaakar ed saray sankaili a kinmiwas ed sayan nasyonal ya impantasi, nanggawa na probisyon parad sikara diad Ganggan ya inter ed panamegley nen Moises—a say asawa ton si Zipora et sakey a Midianita. Say “magangana a karakel” na saray aliwan-Israelita so tinmaynan ed Ehipto a kaibay Israel tan wadman sanen inter so Ganggan. (Exodo 2:16-22; 12:38; Numeros 11:4) Si Rahab tan say pamilya to so inliktar manlapud Jerico tan diad saginonor et inawat ed Judion kongregasyon. (Josue 6:23-25) Ag-abayag kayari na satan, akikareenan iray Gabaonita ed Israel tan apabtangan na pigaran kimey ed tabernakulo.—Josue 9:3-27; nengnengen met so 1 Arari 8:41-43; Ester 8:17.
12 Diad kaunoran, saray sankaili so nanlingkor ed atagey iran posisyon. Si Urias a Heteo, ya asawa nen Bat-seba, so apibilang ed “saray makapanyari met a lalaki” nen David, ontan met ed si Zelek ya Amonita. (1 Awaran 11:26, 39, 41; 2 Samuel 11:3, 4) Si Ebed-melec, a sakey ya Etiope, so nanlingkor ed palasyo tan makakaasingger ed ari. (Jeremias 38:7-9) Sanen akapawil laray Israelita manlapud inkadakep ed Babilonia, saray aliwan-Israelitan Netineo so inikdan na apadaak a responsabilidad a tulongan iray saserdote. (Esdras 7:24) Lapud pigara ed sarayan matoor a sankaili, odino manaayam a dayo, so momoriaen a mangililitrato ed baleg ya ulop natan, interesado itayo ed kipapasen da.
13, 14. (a) Antoray pribilihyo tan responsabilidad na proselitas ed Israel? (b) Panon so nepeg a panmoria na saray Israelita ed matoor a proselitas?
13 Saratan so proselitas, dedikadon managdayew nen Jehova ed silong na Mosaikon Ganggan a biig manlapud nasyones a kaiba iray Israelita. (Levitico 24:22) Sikaray angiyapay na bagat, inmarawi ed palson panagdayew, tan pinmaliis ed dala, a singa ginawa na Israelitas. (Levitico 17:10-14; 20:2) Sikaray tinmulong ed impangipaalagey na templo nen Solomon tan akiulop ed panangipawil na tuan panagdayew ed silong nen Arin Asa tan Arin Ezekias. (1 Awaran 22:2; 2 Awaran 15:8-14; 30:25) Sanen inusar nen Pedro so inmunan tombok na Panarian nen Pentecostes 33 K.P., saray salita to so nadngel na “saray Judio tan [aliwan-Judio a] tinmombok ed inkajudio.” Posibli, arum ed talon libon abautismoan ed saman ya agew so proselitas. (Gawa 2:10, 41) Ag-abayag, sakey ya Etiopen proselita so binautismoan nen Felipe—sakbay ya inusar nen Pedro so kaunoran a tombok na Panarian ed si Cornelio tan ed pamilya to. (Mateo 16:19; Gawa 8:26-40; 10:30-48) Malinew, saray proselita so agminoria bilang Hentiles.
14 Anggaman kuan, say posisyon na saray proselita ed dalin so aliwan singa ed saramay Israelita ed laman. Saray proselita so agnanlingkor bilang saserdotes, tan saray panguloan da so andian na representanti ed Levitikon inkasaserdote.b Tan angapoy tawir a dalin na saray proselita ed Israel. Siansia, ingganggan ed saray Israelita a magmaliw a makonsidera ed matoor a proselitas tan moriaen ira bilang agagi.—Levitico 19:33, 34.
Say Espiritual a Nasyon
15. Anto so resulta sanen ag-inawat na Israel ed laman so Mesias?
15 Say Ganggan so dinisenyo pian pansiansiaen a malinis so Israel, a biig ed nasyones diad kabangibang da. Balet kinmana iya nipaakar ed sakey nin gagala. Insulat nen apostol Pablo: “Kanian say gangan sikato so managbangat et sikatayo pian itarok to itayo ed Cristo, tan napatonong itayo lapud pananisia.” (Galacia 3:24) Makapaermen, karaklan ed Israelitas so agnampaiwanwan a mamaarap ed Kristo diad panamegley na Ganggan. (Mateo 23:15; Juan 1:11) Kanian impulisay nen Jehova a Dios itan a nasyon tan ginawa ton niyanak bilang “Israel na Dios.” Nilikud ed saya, innatnat to ed saray aliwan-Judio so imbitasyon ed pagmaliw a sigpot a mibabaley na sayan balon Israel. (Galacia 3:28; 6:16) Diad sayan balon bansa niwala so makapakelkelaw tan kaunoran a kasumpalan ya insipan nen Jehova ed Exodo 19:5, 6 nipaakar ed sakey a maharlikan inkasaserdote. Panon?
16, 17. Diad anton pantalos a say alanaan a Kristianos ed dalin so “maharlika”? sakey ya “inkasacerdote”?
16 Inaon nen Pedro so Exodo 19:6 sanen nansulat ed alanaan a Kristiano ed agew to: “Sikayo so apili a kapolian, peteg ya [maharlikan] inkasacerdote, masantos a nacion, sakey a baley na Dios a dilin kayarian to.” (1 Pedro 2:9) Anto so kabaliksan na saya? Kasin manari iray alanaan a Kristiano ed dalin? Andi, say inkaari ra et diad arapen ni. (1 Corinto 4:8) Anggaman kuan sikaray “maharlika” diad pantalos a sikaray pinili parad maharlika iran pribilihyo diad arapen. Anggan natan et sikaray sakey a nasyon ed silong na sakey ya ari, si Jesus, a nilanaan na Baleg a Soberano, si Jehova a Dios. Insulat nen apostol Pablo: “Sikato’y angilaban ed sikatayo ed biskeg na kabilungetan, tan angyalis ed sikatayo ed panaria’y Anak na aro to.”—Colosas 1:13.
17 Kasin saserdote irayan alanaan a Kristiano ed dalin? Diad sakey a pantalos, on. Bilang sakey a kongregasyon, manusumpal ira na sakey ya agniburin kimey na inkasaserdote. Impaliwawa iya nen Pedro sanen inkuanton: “Sikayo met, . . . nipaalagey kayo’n sakey ya abung a maespiritu tan masantos ya inkasacerdote.” (1 Pedro 2:5; 1 Corinto 3:16) Natan, say nakdaan na alanaan a Kristianos diad interamenti et “matoor tan makabat ya aripen,” say paralanan ed panangibunog na espiritual a tagano. (Mateo 24:45-47) Singa diad kadaanan ya Israel, siopaman a mankaliktan a mandayew ed si Jehova so kaukolan a manggawa ed satan a kaibay alanaan a Kristianos.
18. Bilang sakey ya inkasaserdote, anto so manunan responsabilidad na kongregasyon na alanaan a Kristianos ed dalin?
18 Nagkalalo ni, sinalatan na alanaan a Kristianos so Israel ed pribilihyo na panangipulong na inkasantos nen Jehova ed leet na nasyones. Ipapanengneng na konteksto, a sanen tinawag nen Pedro iray alanaan a Kristiano a maharlikan saserdote, walad kanonotan to so kimey a panagpulong. On, pinantekep to ed sakey ya impangopya ed sipan nen Jehova diad Exodo 19:6 tan saray salita To ed Israel diad Isaias 43:21 sanen inkuanto: “Sikayo so . . . peteg ya inkasacerdote, . . . ya mangibelyaw na karlangan na saman so angekal ed sikayo ed kabilungtan, ta tinawag to kayo ed makapakelaw a silew to.” (1 Pedro 2:9) Mitunosan ed saya, sinalambit nen Pablo so nipaakar ed deklarasyon na karlangan nen Jehova bilang bagat ed templo. Insulat to: “Lapu ed sikato sirin mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.”—Hebreos 13:15.
Mangatatawen a Kasumpalan
19. Anto so kaunoran tan engranden kasumpalan na sipan a say Israel so magmaliw a sakey a panarian na saray saserdote?
19 Balet, say Exodo 19:5, 6 diad kaunoran so walaan na babaleg a maglorian kasumpalan. Diad libron Apocalipsis, narerengel nen Juan iray mangatatawen a pinalsa a mangiyaaplika ed sayan kasulatan legan ya idadayew da so pinaolin Jesus: “Sika pinatey ka tan sinaliw mo ya in-gana ed Dios, lapu ed dalam, so totoo ed balang kailalakan, tan salita tan baley, tan nacion, tan ginawam ira a panarian tan sacerdote nipaakar ed Dios mi; et manari ra ed tapew na dalin.” (Apocalipsis 5:9, 10) No ontan, diad pinal a pantalos ed satan, say maharlikan inkasaserdote et say mangatatawen a Panarian na Dios, say manguuley ya autoridad ya imbangat ed sikatayo nen Jesus ya ipikasi. (Lucas 11:2) Amin a 144,000 ya alanaan a Kristianos a nansungdo anggad anggaan so nawalaan na betang ed oksuyan na satan a Panarian. (Apocalipsis 20:4, 6) Agaylan makapakelkelaw a kasumpalan na sipan ya abayag lan ginawa diad panamegley nen Moises!
20. Anton tepet so kaukolan nin ebatan?
20 Anto so pitukoyan na saraya ed situasyon na baleg ya ulop tan ed arapen da sano inawat la na amin ya alanaan so makapakelkelaw a tawir da? Saya so nalinewan ed unor ya artikulo na sayan serye.
[Saray paimano ed leksab]
a Sanen inaguraan so inkasaserdote na Israel, binilang iray anak a lalaki na saray tribu na aliwan-Levita ed Israel tan saray lalaki ed tribu nen Levi. Mas masulok na 273 so bilang na saray panguloan nen say saray lalakin Levita. Kanian, ingganggan nen Jehova ya ibayar so kantidad na limaran siklo parad balang sakey ed 273 bilang panondon ed sobran bilang.
b Say alaok a karaklan ya aliwan-Israelitas so wadman sanen inaguraan so Ganggan nen 1513 K.K.P., balet agda inlaktip iray panguloan da sanen imbiig iray Levita bilang kasalat na saray panguloan ya Israel. (Nengnengen so parapo 8.) Kanian, saray Levita so agnibiig bilang kasalat na saray panguloan na aliwan-Israelitas.
Kasin Nisalaysay Yo?
◻ Panon a siaaligwas a nagkalalon atalosan so kipapasen na arum a karnero?
◻ Akin ya impulisay nen Jehova so mamaamianen a panarian na Juda manlapud panaglingkor ed sikato bilang saserdote?
◻ Sanen matoor, anto so talindeg na Juda ed arap na nasyones?
◻ Anto so talindeg na matoor a proselitas ed Israel?
◻ Panon a manlilingkor bilang panarian na saray saserdote so alanaan a kongregasyon?
[Litrato ed pahina 16]
Bilang sakey a maharlikan inkasaserdote, iyaabawag na alanaan a Kristianos ed dalin so gloria nen Jehova
[Litrato ed pahina 18]
Say Panarian so unor a kasumpalan na Exodo 19:6