Sano “Baliwalay Arap na Dagem”

“SANO ag-amta na too no anton daongan so laen to, baliwalay arap na dagem.” Sarayan salita, a bibidbiren a nanlapud inmunan-siglon Romanon pilosopo a si Lucius Annaeus Seneca, so mamepekder ed abayag-lan-bibidbiren a katuaan: Pian nawalaay direksyon so bilay, kaukolan iray kalat.

Anggaman ontan, mabetbet a say bilay so anggapoy gagala. Dakel so basta kontento a paliisay bato-bato tan saray alimuyo na inagew-agew a panagbilay. Lapud andiay pihon posisyon, magmamaliw iran singa saray daluyon ya “ibubunlayon na dagem ed sakey a bekta tan isisiplog lamet a papawil.” (Santiago 1:6, Phillips) Parad saratan a totoo, “baliwalay arap na dagem.”

Say Biblia so mangitatarok na saray ehemplo na saramay walaay kalat, diad ontan et onkakana bilang panuliranan parad Kristianos natan. “Inyan [nen Moises] so mata to ed katumangan.” (Hebreos 11:26) Insulat nen Pablo: “Diretson ontundas ak a mamaarap ed kalat pian nagamoran koy tumang.” Pinaseseg toray kaparan mananisia a “nawalaan na sayan parehon awawey.”​—Filipos 3:14, 15, Today’s English Version.

Tekep na saray mata tayon akaapasakey ed saray sipan na Biblia, komon ta aligen tayo so pananisia na ontan a walaay-kalat a totoo.​—Ipareng so Hebreos 13:7.