Say Singapore so Mangagatin ed Kawayangan na Panagdayew

DIAD labi na Pebrero 24, 1995, apatiran abung ed syudad na Singapore so nilusob na saray pulis. Sakey a dagup na 69 a totoo so inaresto.a Diad limog da et walay sakey a manedad na 71 ya akulaw tan duaran bibiin mantaon na 15. Akin? Kasin lapud sikaray kriminal odino subersibo? Andi. Anggapoy anggan sakey ed sikara a mibibiang ed antokaman a bengatla ed satan nisay diad isisip et nipasen iran peligro, imoral, odino sumpad sosyedad. Ag-ira pansesengegan na kapeligroan ed moral iran kablian, kaligenan, tan pankaabiganan na kapara daran taga Singapore. Ingen, kayari impansukisok ed apatiran ayaman, inawit na saray pulis ed istasyon so 69 a totoo, a nandaragup pian manaral na Biblia tan panggayagaay pantutuyaw. Diman dara sanlabin impisok, tinetepetan, inalaan na fingerprint, tan nilitrato​—on, tinaktakot iran singa ra kriminal! Legan na sayan panaon​—anggad 18 oras a walad agmarakep a kipapasen—​sikaray ag-inabuloyan a mitongtong ed abogado tan sinebelan ni ingen ya ontawag ed telepono pian ipaamta ed pamilya ra no iner so kawalaan da. Isipen pa lambengat so epekton intarok na ontan a maples a kiwas ed sarayan mareen tan matulok-ed-ganggan a mibabaley!

Say senaryo so mangipapanonot ed saray kipapasen ed ambilunget iran agew na Alemanyan Nazi tan say maruksan panaon na Komunista diad Sobyet Union tan Mamabukig a Europa. Aliwan ontan so nailaloan a naimano na sakey ya ombisita ed Singapore ed sayan malinlinis, mayaman tan modernon syudad-estado. Akapangiletneg so Singapore na sakey a reputasyon a bilang say koma-20 siglon pankelawan ed lawak na ekonomiya tan sosyedad. Satan so sakey a deklaradon demokrasya a walaay konstitusyon a mangagarantiya ed saray mibabaley to na saray manunan kanepegan na too, pati say kawayangan ed panagsalita, relihyon, tan pantitipon.

Ingen, saramay inaresto nen Pebrero so nilusob lambengat ta lapud sikaray Tastasi nen Jehova a nantitipon a saniiba pian aralen so Biblia tan mituyaw ed kapara ran Kristianos. Say panamakasalanan sumpad sikara et say “iyaatendi ed miting na sakey ya isesebel a panuulopan.”

Diad tua, aglegal a bibidbiren so Tastasi nen Jehova diad Singapore nanlapulad 1972 sanen inekal ed listaan so Singapore Congregation tan insebel iray literatura, pati saray Biblia, ya ipapalapag na Watch Tower Bible and Tract Society. Anggapoy pankanawnawan niyabuloy pian angaten iray palbeng ya angaksionan. Diad agano ni, say inka-legal na sayan opisyal a panangidumaduma so inangat na saray korte na Singapore diad kaso na apatiran Tastasin inakusa nen Pebrero 1994 lapud pamebenben na isesebel a literaturay Biblia. Dinengel so apelo sumpad saray kumbiksion da a nadngel nen Agosto 1994 tan bengat-bengat pinaulyanan. Pinapaway nen Chief Justice Yong Pung How na Korte Suprema so opinyon to ed ontumbok a bulan. Sisiaen ton anggapoy nasusumlang no nipaakar ed relihyoson kawayangan tan saray kumbiksyon so makatunongan ed rason a sakey a sesga iray Tastasi nen Jehova ed kaligenan na nasyon lapud aglabay na saray membro to so mibiang ed serbisyo militar. Nen Pebreo 17, 1995, kinmerew na permiso so apatiran Tastasi pian onapela ed Singapore Court of Appeal lapud sumlang a desisyon to. Ag-inawat so kerew.

Sayan kaunoran a desisyon so nipabitar ed media na Singapore a kontrolado na gobierno. Anggapoy duaruwan sayan desisyon na korte tan say pinmaway a publisidad so angiyanino ed ontumbok ya agawgawa. Diad saman a simba et agawa so inka-aresto na 69 a Tastasi. Saray panamakasalanan sumpad apatira ed saraya​—mibabaley na Britanya, Pransya, tan Luxembourg—​so diad kaunoran et pinaalis. Anggaman ontan, anggan diad sikara et say asagmak da so makapakebbiew. Sakey a laki so nanayam tan nantrabaho ed Singapore ed loob na dakel a taon a kaibay asawa to. Naandian ira na trabaho tan say uupaan dan ayaman tan pinilit a manpatanir ed dakel a maapit a kakaaro ra.

Say natitilak a 63 a wala-la’d-edad so pinakasalananan a membro na isesebel ya ulopan, tan pigara ed sikara so pinakasalananan met a walaan na isesebel a literatura. Sikaray nipaarap ed taloy taon a kapriso odino moltan S$3,000 ($2,100, E.U.) odino sarayan dua. Say duaran bibiin mantaon na 15 so nanbiigan ya inyarap ed korte na kalangweran.

Anggapoy Sesga ed Nasyonal a Pakabidbiran tan Pankakasakey

Diad interon mundo, diad masulok nen 200 a daldalin a panaayaman da, kabkabat iray Tastasi nen Jehova a desenti, matua, tan matulok-ed-ganggan. Sikaray kabkabat ed mapekder ya agpibibiang ed antokaman a subersibo, sumpad kimey na gobierno​—agmakristianon kiwas a mansumpal ed kadispelosip da, odino kisian da. Talagan anggapoy nepeg a katakotan na gobiernon Singapore ed sikara. Sikaray talagan aliwan sesga ed nasyonal a kaligenan na Singapore odino ed pannasyonal a pakabidbiran tan pankakasakey. (Roma 13:1-7) Saya so malinlinew a nibaga ed sakey a sulat ya apetsaan na Marso 21, 1995, a nanlapud si Milton G. Henschel, presidenti na Watch Tower Bible and Tract Society, parad si Prime Minister Goh Chok Tong na Singapore. Sayan sulat so kinopya dia parad kagunggunaan na saray managbasa mi.

Say maaro-ed-kawayangan a totoo diad negosyo, gobierno, tan saray pribadon sektor so manatalaran tekep na interes pian nanengneng no antoy nagawa ed sayan situasyon diad Singapore. Kasin say gobierno na Singapore so onkiwas a mitunosan ed manuna iran kanepegan tan kawayangan na too a singa ipapatnag ed mismon konstitusyon to tan say internasyonal a komunidad na nasyones? Maseguro, mapagan tuloy so Tastasi nen Jehova ed interon mundo nipaakar ed kapara ran managdayew diad Singapore. Nononoten dara diad saray pikakasi ra tan tatandaan da so panamaseguron naromog ed Biblia: “Si Jehova so sakey a manangaro na inkahustisya, tan agto ikaindan iray matoor ed sikato.”​—Salmo 37:28.

[Paimano ed leksab]

[Kahon ed pahina 30]

Marso 21, 1995

Goh Chok Tong

Prime Minister

Istana Annexe

Singapore 0923

Republic of Singapore

Lee Kuan Yew

Senior Minister

Prime Minister’s Office

460 Alexandra Road

37-00 PSA Bldg

Singapore 0511

Republic of Singapore

Pinablin Señores:

Say agano nin balita na Reuter manlapud Singapore ya apetsaan na Pebrero 25, 1995, so talagan makapapaga. Inreport to a saray pantitipon ed panagaral na Biblia na Tastasi nen Jehova so pinatunda na saray pulis tan 69 totoo so inaresto. Sayan report so angipaimano ed mundo ed situasyon na Tastasi nen Jehova diad Singapore, a ditan et saray aktibidad tan literatura so nisesebel la ed loob na masulok a 20 taon.

Mairap a talosan no akin a say sakey a relihyoson organisasyon a nipapakurang a parungtalan ed masulok a 200 a bansa tekep na sigpot a proteksion na ganggan so nisesebel ed Singapore, sakey a bansan manusuporta’d prinsipyos na demokrasya. Nagkalalo nin makapapaga sano ikonsidera so garantiya na konstitusyon na Singapore na kawayangan na panagdayew parad saray mibabaley to.

Saray Tastasi nen Jehova so agbalot sesga ed nasyonal a seguridad ed inerman a pasen. Say tua et diad interon mundo et walaan iray reputasyon a mareen, makuli, tan maptek ed moral, tan matulok ed ganggan​—kualidades a maseguro ak ya iyaalibansa yo ed bansa yo.

Tua a lapud istrikton katutulok da ed saray estandarte na Biblia parad Kristiano, say talindeg na Tastasi nen Jehova so ag-atalosan odino abaloan no maminsan. Balet, agta ontan met so agawa ed manangiletneg na Inkakristiano ya abaloan met a sumpad “Cesar,” say gobierno ed saman a panaon? Tutumboken lambengat na Tastasi nen Jehova so alimbawa nen Jesus tan inmunan Kristianos. Rerespeton da so gobierno na panaayaman da, manbabayar iray buis, tan mangiyaalibansay moral. Sikaray magunaet tan maptek a mibabaley. Agbalot akibiang so Tastasi nen Jehova ed antokaman a subersibon aktibidad ed inerman a bansa tan ipapasegurok ed sikayo a say kiwawala ra ditan ed Singapore so aliwan sesga ed interes na nasyon yo.

Lapud agano niran report na media, saray panameget ya ipapakurang na gobierno yo sumpad Tastasi nen Jehova ed Singapore so agla niburin kabat la na publiko. Saya so nagkalautlan panpapagaan na 12 milyon a kaulop da ed interon mundo. Kekerewen ko ed sikayon usaren yo so kooperatibon posisyon yo bilang Senior Minister pian naresolbi so kipapasen tan ikdan iray Tastasi nen Jehova ed bansa yo na kawayangan ed panagdayew tan say konsiensian igagarantiya na Konstitusyon.

Sisiaen ko a say prangkaan a pitotongtong ed saray representanti na Tastasi nen Jehova so ontulong a mangipalinew ed antokaman a lingon pakatalos ed organisasyon mi tan aktibidad tan mamaseguro ed sikayo ya anggapo so nepeg a takotan na gobierno na Singapore ed Tastasi nen Jehova. Maliket ak a mangiyuksoy na pimiting.

Ilaloan ko so bales yo.

Sipapagalang,

Milton G. Henschel

Presidenti

[Picture Credit Line ed pahina 31]

Nik Wheeler/H. Armstrong Roberts