Dayewen si Jehova Tekep na Malinis Iran Lima

DIAD silong na inkipuyan, say salmistan David so nankanta: “Urasan ko iray limak diad inka-inosenti a mismo, tan siak so manmartsa ed liber na altar mo, O Jehova.”​—Salmo 26:6.

Sanen tinibukel irayan salita, nayari palagin tutukoyen nen David so kaugalian na saray Levitan saserdote na Israel ya onsapat ed rampa na altar tan insan iyan daray bagat da ed tapew na apuy. Balet sakbay a gawaen iyan panagdayew, kakaukolanen ed saray saserdote ya urasan daray lima tan salisali ra. Aliwa iyan melag a pamaakaran. Ta say agpanggawa ed sayan panangigapon kundang so nayarin kabaliksan toy kabalang na bilay na saserdote!​—Exodo 30:18-21.

Say piguratibon pananguras so manresulta ed espiritual tan moral a kalinisan. (Isaias 1:16; Efeso 5:26) Kaliktan nen Jehova a sikatayo so ‘manmartsa ed liber na altar to’ natan diad panamegley na panlingkor ed sikato. Balet kakaukolanen to itayon gawaen itan tekep na malinis iran lima​—singa ed impangibaga nen David, limalima ya inurasan “diad inka-inosenti a mismo.” Saya so aliwan anggapoy-kakanaan a kakaukolanen, ta saramay mangaagamil na karutakan so agmanawir na Panariay Dios. (Galacia 5:19-21) Say sakey a bilay ed maridios iran kimey so agmangiiter ed sakey na rason pian mangagamil na imoral a kondukta. Kanian insulat nen apostol Pablo: “Dadapmegen koy laman ko tan gagawaen ko bilang aripen, ompan, kayari impanpupulong ko ed arum, siak a mismo so agmagmaliw ya anggan panon et agnaabobonan.”​—1 Corinto 9:27.

Saraman so manpirawat na madibinon panangabobon tan tuan liket so nepeg a manlingkor ed si Jehova tekep na malinis iran lima. Singa si David, manakar ira “tekep na katooran na puso tan tekep na inkaptek.”​—1 Arari 9:4.