Tepetepet Manlapud Managbasa
Ibabaga na Efeso 3:14, 15 a diad Dios so “pakakaotangan na ngaran na balang pamilya ed tawen tan diad dalin.” Wala ta iray pamilya ed tawen, tan kasin say balang atooan a pamilya so anggan panon et akaala na ngaran to manlapud si Jehova?
Anggapo iray pamilya ed tawen a singa dia ed dalin, a walay sakey ya ama, sakey ya ina, tan ananak—ya amin et mankakalamanan. (Lucas 24:39; 1 Corinto 15:50) Malinlinew ya imbangat nen Jesus ya agmangaasawa iray anghel, tan anggapo so mangisusuheri ya anggan panon et sikaray makapan-ilalak.—Mateo 22:30.
Anggaman ontan, sasalitaen na Biblia diad piguratibon dalan si Jehova a Dios bilang asawa na mangatatawen ya organisasyon to; sikatoy walaay asawa diad espiritual a pantalos. (Isaias 54:5) Satan a mangatatawen ya organisasyon so mamapawalay ilalak, singa saray anghel. (Job 1:6; 2:1; 38:4-7) Sirin diad sayan pantalos, niwala so makapakelaw ya espiritual a pamilya diad tawen.
Niarum ni, sakey a balon piguratibon pamilya so natitibukel diad tawen, a tugyopen nen Jesu-Kristo tan say kongregasyonal a nobya ton 144,000. (2 Corinto 11:2) Maslak ed sarayan alanaan so inatey la, a walaay mangatatawen ya ilalo. Arum so mabilay ni dia ed dalin. Amin so sigugunaet a maniilalo ed arapen a mangatatawen a “kasal na Kordero.” Ikokonekta na Biblia itan a kasal ed panaon na onsasabin baleg a kairapan—say kadederal na Babilonia a Baleg, tan insan say kaderal na nakekeraan a kabiangan na sistema nen Satanas.—Apocalipsis 18:2-5; 19:2, 7, 11-21; Mateo 24:21.
Nipaakar ed mangaraldalin iran pamilya, ag-ipapatnag nen apostol Pablo diad Efeso 3:15 a balang indibidual a grupo na pamilya so direktan akaala na ngaran to manlapud si Jehova. Imbes, mapatnag a walad isip nen Pablo so mantutumbokan a kailalakan a pamilya a mangiprepreserba na sakey a ngaran. Itatarya na Josue 7:16-19 so sakey ya alimbawa. Ditan et iwawalwal nen Jehova so kasalanan nen Achan. Unona, say kasalanan so niyapasakey ed odino inggetar lambengat ed tribu nen Juda. Insan satan so pirmin niyapasakey ed pamilya na saray Zerahita. Kaunoran, say sankaabungan nen Achan so niwalwal. Si Achan pati ed asawa tan ananak to so minoria, odino tinukoy, bilang kabiangan na sankaabungan (odino, pamilya) nen Zabdi, say laki nen Achan. Diad ontan et saman a pamilya so ninatnat a grupo ya angipreserba ed ngaran na inmunan ateng da a si Zera.
Diad limog na Hebreos, say ontan iran linya na pamilya so walaan na baleg a kaimportantian, a dakel so nilista ed Biblia. Sinuportaan na Dios so kipreserba ra diad impanggawa na probisyon, no nakakaukolan, a mantultuloy so ngaran na pamilya diad panamegley na Levirate, odino piasawa ed bayaw, a panangasawa.—Genesis 38:8, 9; Deuteronomio 25:5, 6.
Bilang sananey nin alimbawa na ontan a babaleg odino ninatnat iran pamilya, konsideraen pay Jesus bilang anak nen David. Mabitabitar a sikatoy aliwan ilalak a mismo nen Arin David, ya agniyanak anggad pigaran siglo kayari impatey nen David. Ingen, sakey a pakabidbiran a marka na Mesias et sikato so manlapud pamilya nen David, a singa ed amta na saray Judio ed inkalapagan. (Mateo 22:42) Si Jesus so walad linya nen David nampara diad panamegley na ina tan say managtagibi ya Ama to.—Mateo 1:1; Lucas 2:4.
Balet panon a nala na saratan a pamilya so ngaran da manlapud si Jehova? Say katuaan et wala so pigpigaran pankanawnawa—a singa ed kaso di Abraham tan Isaac—sanen literal a nginaranan nen Jehova so sakey ya uloy pamilya. (Genesis 17:5, 19) Aliwan naynay ya ontan. Kaslakan, si Jehova so agmangiiter ed kada indibidual a pamilya na ngaran a satan so ipapasa ed ananak.
Anggaman ontan, peteg a si Jehova so angigapo ed yunit na pamilya na too sanen inganggan to si Adan tan Eva a ‘magmaliw a mabunga tan manparakel tan panoen so dalin.’ (Genesis 1:28) Tan inabuloyan nen Jehova so ag-ayadyarin Adan tan Eva a man-ilalak, diad ontan et mangileletneg na pinagkapundasyon na amin ya atooan a pamilya. (Genesis 5:3) Kanian diad sananey a pantalos, a say Dios so natawag a Manangigapo na saray ngaran na pamilya.
Agla nalilikna na dakel a koltura natan so pankaukolan a pansiansiaen a mabilay so ngaran na pamilya parad saray kailalakan. Anggaman kuan, diad amin a daldalin et pisasalamatan na saray Kristiano si Jehova lapud uksoyan na pamilya tan sikatoy papagalangan diad panamegley na gunaet dan pagmaliwen a matalona so pamilya ra.