Report na Saray Manangiyabawag na Panarian

Nankasakey Iray Datin Mankalaban

“SAY sankaunaan a pankanawnawan nadngel ko so nipaakar ed Tastasi nen Jehova et sanen siak so manseserbi ni bilang armadon guardiya ed Bosnia,” so salaysay nen Branko.a

Si Branko so apabtangan a guardiya ed sakey ya ospital a ditan tatambalen iray asugatan. Sakey ed saray doktor so iyaaralan na Biblia na Tastasi, tan diad saman a panaon na pantratrabaho ed labi, insalaysay to ed si Branko so dakel a naaralan to nipaakar ed Biblia.

Say nadngel nen Branko ed saman a labi so amakiwas a tuloy ed sikato a sikato so angisukon tampol ed saray armas to. Akitalosan ed Tastasi, diad pankaliktan ton manaral ni. Kayari inyalis to ed sananey a bansa ed Europa, inanap nen Branko so Kingdom Hall tan inmatendi ed sakey a pantitipon a kongregasyon na Tastasi nen Jehova a taga Yugoslavia. Diman akabat nen Branko si Slobodan.

Si Slobodan so nanlapu met ed Bosnia tan nanserbi bilang sakey a boluntaryo a singa met si Branko ed parehon bakal​—balet ta diad basil a kampo. Akilaban si Slobodan parad saray taga Serbia sumpad saray taga Croatia. Sanen nankabat iran dua, si Slobodan so sakey lan bautismadon Tasi nen Jehova. Inyopresi to so panangiyaral na Biblia ed si Branko, say datin kalaban to. Legan ya onaaligwas so panagaral, naaralan ni nen Branko so nipaakar ed si Jehova, tan binmulaslas so aro to parad Dios. Saya so amakiwas ed si Branko pian idedika to so bilay to ed Manamalsa. Nen Oktubre 1993 insimbolo to so dedikasyon to diad bautismo ed danum.

Panon a nagmaliw a sakey ed Tastasi nen Jehova si Slobodan? Agni abayag sanen tinaynan to so pasen na bakalan diad Bosnia. Abasa to so pigaran palapagan na Tastasi, balet inmaligwas lambengat so interes to ed Salita na Dios sanen sikatoy binisita na duaran Tastasi ed ayaman to nen asasakbay na 1992. Siopa so dinmalaw ed si Slobodan, ya angiyopresi na panagaral na Biblia ed sikato? Si Mujo, a nanlapu met ed Bosnia, balet ta pinabaleg a sakey a Muslim. Legan ya onaaligwas so panagaral ed Biblia, di Mujo tan Slobodan, a datin mankalaban, so saniban angusar na pigaran panaon ed inagew-agew pian makapanpabibiskegan na pananisia.

Say bakal ed datin Yugoslavia so anigway na bilay na nilasus nilibon totoo. Balet si Branko, Slobodan, tan Mujo so manlilingkor natan bilang sigpot-panaon a manangipulong na maong a balita ed parehon kongregasyon na Tastasi nen Jehova. Atalonaan da so balingaan ed etniko tan rasa, tan sikara la natan so mangiyaalibansa na kareenan legan a manpapasakop ed Manamalsa, si Jehova.

Balet anto so nanggawa ed ontan iran pananguman? Satan et say panangaro ra parad si Jehova, say respeto ra parad Biblia, tan say inkaseet dan mangiyaplika ed katuaan na Biblia ed bilay da. A singa ed ibabaga na Masanton Kasulatan, “say salita na Dios so mabilay tan mangisesekar na pakayari . . . tan nayarian ton tebeken iray kanonotan tan saray getma na puso.”​—Hebreos 4:12.

[Paimano ed leksab]