Inantabay na Sankabalgan a Kaaro Ra
SAKEY a pikakaaro so nagkalalo lan mangaantabay ed Tastasi nen Jehova. Satan et say mablin siglaotan da ed sankabalgan a Kaaro ra, si Jehova a Dios. (Ikompara so Santiago 2:23.) Sikaray aantabayan to legan na baleg iran subok na pananisia ra.
Say rekord na integridad na Tastasi ed silong na maka-diktador iran rehimen so pandinayewan na dakel a managimaton. Sakey ed sikara et si Jiří Krupička, sakey a doktor na pilosopiya tan natural sciences a dinmayo manlapud Czechoslovakia nen 1968 kayari inkipisok ed loob na dakel a taon ed saray panangipangawan a kampo na Komunista. Diad libro ton Renesance rozumu (Renaissance of Intellect), nankomento nipaakar ed impanirap tan inkapekder na Tastasi a nipriso lapud neutralidad da.
Diad silong na gobiernon Komunista, dakel a Tastasi so sinentensyaan a nipriso lapud pananisia ra. Anggaman nipriso, impulisay da so pankotkot na uranium pian usaren ed bakal. (Isaias 2:4) Dedeskribien nen Krupička so sakey ya eksenan anengneng to nen 1952 ed sakey ed sarayan panagminaan. Anengneng to so duaran totoon singano ra estatuan abalkot na yelo lapud alabas a kliman ambetel. Manlapud ulo ya anggad awak et asakoloban ira na metal a bareles.
Oniay insulat nen Krupička: “Palbangon ni et akaalagey ira la ed paway ya akasulong na apilat-pilat ya uniporme na priso. Panon dan asungdoan so impanalagey ed ontanlan kabayag legan a manyeyelo iray bitking da? Diad pakayari na pananisia. Saray bareles so daan tan latian la. Sakey a masebeg a too so alay kasil ya angibayo ed saraya ed ulo ra tan takeb a say makdem a gilig na saya so analger ed jacket tan ed baog na sakey ed lalaki, tan tinmuro so dala manlapud taklay to.
“Pinatunda na guardiya so dasig mi ed arap da, tan nansalitan agano ed sikami so komander. Say agmantrabaho, inkuanto, so rebelyon tan sirin et nepeg a nadusa. Say anggapoy-hustisyan sentimiento nipaakar ed bakal tan pamatey so makatulong ed sarayan sumusumpa, sarayan kabusol na sosyalismo.”
Angala so komander na sakey a bareta tan impekpek ed sakey ed saray bariles. Say lakin wala’d loob na saman so atumba a say ulo so siansian wala’d loob na bariles. Say tinmumbok ya agawa so agbalot naekal ed memorya nen Krupička.
Inkuanto: “Wala so mankakanta ed loob na saray bariles. Mapalnan tanol, inyesaes a pikakasi ed Dios, a makadngel na antokaman ed anggan inerman—anggan say panasalin mankanta ed loob na daan tan latian iran bariles na uranium. Narerengel to iman a mas maksil nen say sakey a koron ikakanta ed loob na baleg a katedral.”
Nen Setyembre 1, 1993, say kimey na Tastasi nen Jehova diad Republika na Czech so akaawat na opisyal a legal a panamidbir. Saray Tastasin taga Czech so manggagayaga natan ed panusumpal na Kristianon edukasyon a kimey da diad kawayangan. On, naliliketan ira ed pangibabaga ed arum nipaakar ed si Jehova, say sankabalgan a Kaaro ra.
[Litrato ed pahina 7]
Saray kombensionista ed Czech Republic