Napanggayagaan Mo so Magnayon a Pikakaaro

WALARAY babeng ed pikakaaro. Diad tua, impasakbay na Biblia a diad “kaunoran iran agew” et wala so kakulangan na aro, nisipor a panamabli, tan katooran. (1 Timoteo 3:1-5; Mateo 24:12) Sarayan kipapasen so sengegan na agnaparaan a bakbak na inkabegtebegtew. Oniay kuan na sakey a bii: “Singano biung nen Noe ed lugar mi. No agkayo sanasawa, agka makapitukoy.” Amin na saya so agnitetel ed kada toon begtebegtew. Diad arum a parte mundo, ilalaktip na saray angat ed magnayon a pikakaaro iramay bengatlan singa say mabetbet ya iyalis na totoo, kabubuyak na saray pamilya, agmakaaro tan mapeligron syudades, tan mapatnag ya ikekesay na libren panaon.

Nayarin napituyawan na sakey a manaayam ed modernon syudad so dakerakel a totoo ed loob na sakey simba nen say nakabat na sakey a probinsyano nen koma-18 siglo ed loob na sakey taon odino ed interon bilay to! Ingen, mabetbet a saray relasyon natan so akinpaway lambengat. Dakel so manguupot na panaon da ed mabetbet a pisososyalan tan saray panasalin miliket. Anggaman ontan, nepeg tayon aksobien a saray andi-kanan panliliket ed limog na mauges a kalimog so singa pangusar ed saray sabit bilang panparlang. Oniay kuan na Eclesiastes 7:5, 6: “Magmaong so idengel ed panamaat na sakey a makabat nen say toon onderengel ed kansion na saray atapis. Ta singa say tanol na saray sabit ed silong na banga, ontan so elek na atapis; tan saya met so kaapaan.” Saray sabit so maganon ondayabdab tan onsanitsit, balet agmagenap itan pian mangiter ed sikatayo na petang. Ontan met, nayarin temporaryo itayon paliketen na maingal, maneelekan iran kaulop, balet agda naekal so amin ya inkabegtebegtew tan napenek so pankaukolan tayo parad tuan kakaaro.

Say panbukbukor so miduma ed inkabegtebegtew. Wala so panbukbukor a kapilitan parad sikatayo ta pian narepreskoan tan diad ontan et dakel so nitarok ed sakey a kaaro. Sano begtebegtew, dakel so ombaling a tampol ed sakey a nengneng na elektronikon panagligliwaan. Nalmoan ed sakey a nipalapag a report a say kaslakan a tuloy a reaksion ed inkabegtebegtew et say panagbantay na telebisyon. Ingen, inkuan na saray manag-research a say manbayag a panagbantay na telebisyon so sakey ed sankaugsan a bengatlan nagawaan tayo sano sikatayoy begtebegtew. Pagmaliwen ton alablabas so kaandi-pankimey, pakasawaan, tan pantasya, a magmamaliw a makapuy a kasandi na arap-arapan a pisiglaotan ed arum a totoo.

Diad tua, say panbukbukor so nayarin magmaliw a mablin tuloy no usaren tayo itan ed makapaalagey a paraan ed panaon na panbukbukor tayo. Nagawaan tayo iya diad panbasa, pansulat, panggawa na bengabengatla, tan panpainawa. Katekep na makapaalagey a panbukbukor so panpikasi ed Dios, panaral ed Biblia, tan pandalepdep ed satan. (Salmo 63:6) Saraya so paraan pian napaapit itayo ed si Jehova a Dios, say sakey a magmaliw a sankabalgan a Kaaro tayo.

Saray Alimbawa na Pikakaaro ed Biblia

Anggaman marakep so pagmaliw a makaaro ed dakel a totoo, papanonotan itayo na Biblia a “wala so sakey a kaaro ya ompeket a mas maapit nen say sakey ya agi.” (Uliran 18:24) Amin tayo so mankakaukolan na pigaran maapit a kaaro a talagan mangiyaansakit ed sikatayo, a say pikakaaro ra so mangiiter ed sikatayo na gayaga, biskeg, tan kareenan. Bangta say ontan a tuan pikakaaro so nayarin aliwan kaslakan natan, say arum a kadaanan ya alimbawa so nagkalalo lan nidatak ed Biblia. Singa bilang, wadtan so matalonggaring ya impankaaro nen David tan si Jonathan. Anto so naaralan tayo manlapud satan? Akin a nanmagnayon so impankaaro ra?

Bilang sakey ya alimbawa, si David tan Jonathan so parehon interesado ed importantin bengabengatla. Nagkalalo’d amin, nampara iran walaan na aralem a debosyon ed si Jehova a Dios. Diad impakaimano ed pananisia nen David ed Dios tan ed saray kiwas to diad impangidepensa ed totoo nen Jehova, “say mismon kamarerwa nen Jonathan so nitaker ed kamarerwa nen David, tan sikatoy ginapoan ya aroen nen Jonathan a singa dili ton kamarerwa.” (1 Samuel 18:1) Sirin, say parehon panangaro ed Dios so mamaapit ed pankakaaroan na balang sakey.

Si Jonathan tan si David so mabiskeg iran indibidual a nambilay unong ed maridios iran prinsipyo. Kanian makapanrerespetoan ira. (1 Samuel 19:1-7; 20:9-14; 24:6) Peteg a nabebendisyonan itayo no walaan itayo na maridios a kakaaron uuleyan na Makasulatan iran prinsipyo.

Wala niray sengegan ya akatulong ed impankaaro di David tan Jonathan. Matua tan prangka so siglaotan da, tan walaay kompiyansa ed sakey tan sakey. Sitotoor nen Jonathan ya inyuna so interes nen David nen say dili ton pankaabigan. Agto nanimonan si David lapud sikato so nisipan a manari; imbes, sinuportaan nen Jonathan si David ed emosyonal tan espiritual a paraan. Tan inawat met nen David so tulong to. (1 Samuel 23:16-18) Diad Makasulatan iran paraan, si David tan Jonathan so angipaamta na liknaan da ed balang sakey. Say maridios ya impankaaro ra so based tuan apresasyon tan panamabli. (1 Samuel 20:41; 2 Samuel 1:26) Ag-abuyak itan lapud sikaran dua so nansiansian matoor ed Dios. Say panangiyaplika ed saratan a prinsipyo so makatulong ed sikatayon mamawala tan mamasiansia na tuan kakaaro.

No Panon a Bayuboan so Pikakaaro

Manaanap ka ta na tuan kakaaro? Ompan agka la kaukolan a mananap ni ed arawi. Arum ed naynay mon nakakalimog so nayarin magmaliw a kakaarom, tan nayarin kaukolan da so pikakaarom. Nagkalalo la no nipaakar ed kaparam a Kristianos, makabat so pangiyaplika ed simbawa nen apostol Pablo ya ‘onnatnat.’ (2 Corinto 6:11-13) Balet, agkomon onsakit so linawam a kada panasalim a mikaaroan et agmansumpal ed matibay a bedber. Kaslakan a kaukolan so panaon pian napaaligwas so pikakaaro, tan aliwan amin a relasyon et magmaliw a manpapara so kaaralem to. (Eclesiastes 11:1, 2, 6) Siempre, pian panggayagaan so puron pikakaaro, nepeg tayo so magmaliw ya agmasiblet, tan kaukolan tayon tumboken so konseho nen Jesus: “Amin a bengatla, sirin, a labay yon gawaen na totoo ed sikayo, ontan met so nepeg yo a gawaen ed sikara.”​—Mateo 7:12.

Siopa so mankakaukolan na pikakaarom? Nilikud ed saramay kaedaran mo, komusta met iramay mas ugaw odino matatatken nen say sika? Say impankaaro di David tan Jonathan, Rut tan Naomi, tan Pablo tan Timoteo et asaglawi so pandurumaay edad da. (Ruth 1:16, 17; 1 Corinto 4:17) Kasin napalaknab mo so pikakaarom ed saray balo tan ed arum nin anggapoy asawa? Isipen pa met iray balo ni ed lugar yo. Nayarin nitunda lay pililimog ed karaklan odino ngalngali amin a kaaro ra lapud inyalis da na panayaman odino impanguman na paraan na kabibilay da. Ag-aalagaren so arum ya onasingger ed sika. No sakey kan Kristiano, nawalaan na magnayon a pikakaaro diad pangiyaplika ed konseho nen Pablo: “Diad inaagin aro nawalaan na matamoy a panangaro parad sakey tan sakey. Diad pangipanengneng na galang ed sakey tan sakey idaulo yo.”​—Roma 12:10.

Nayarin isipen tayo a say pikakaaro et sakey a porma na panangiter. Inkuan nen Jesus a no niyugali tayo la so pangiter, ikdan itayo na totoo. Indanet to met a wala so nagkalalon liket ed pangiter nen say diad pangawat. (Lucas 6:38; Gawa 20:35) Akaromog ka ta la na totoon nandurumay abenegan da? Papaneknekan na internasyonal iran kombension na Tastasi nen Jehova a saray totoo ed nanduruman kultura so makaporma na tua tan magnayon a pikakaaro sano mankakasakey ira ed panagdayew ed Dios.

Pansiansiaen so Pikakaaro

Makapaermen, no maminsan et makapansasakitan iray sankaaro. Say makaderal a talabutob, say nitapat a kompiyansa, kaandi apresasyon​—saraya so kabiangan na bengatlan ansakit a tuloy sano nanlapu ed sakey ya ipasen mon tuan kaaro. Anto so nagawaan ed saratan a situasyon?

Mangipanengneng na maong ya alimbawa. Gawaen ya amin so anggaay nayarian mo pian napaliisay makasakit. Diad arum a lugar et kaslakan ed sankaaro a panlureyay lingo na sakey tan sakey. Balet say masagapsap a tratamento odino panamalikdo so agmamaapit ed saray sankaaro, anggano saraya so ipapasen a ‘panlureyan.’​—Uliran 26:18, 19.

Kimeyan so panmantini ed pikakaaro. Onlelesa no maminsan iray agpantatalosan sano alabas so iilaloan na sankaaro ed balang sakey. Say sakey a kaaron mansasakit odino okupado lapud graben problema so agtanton maligsa a singa say gendat. No ontan, panggunaetan a talosan tan tulongan ed saratan a panaon.

Resolbien iray problema a tampol tan diad mapangasin dalan. Gawaen itan diad pribado no nayari. (Mateo 5:23, 24; 18:15) Seguroen ed kaarom ya ipaamtan labay mon mantinien so maong a siglaotan. Saray masimoon a sankaaro so manpeperdonaan. (Colosas 3:13) Magmaliw ka ta ya ontan a nengneng na kaaro​—sakey a mas ni nen sakey ya agi?

Say panagbasa tan panag-isip nipaakar ed pikakaaro so gapoan lambengat. No sikatayo so begtebegtew, alaen tayo so matukoy a kiwas, tan agmanbayag so panermen tayo. No isekar tayo so inkasikatayo, nawalaan itayo na tuan kakaaro. Nawalaan itayo na espisyal a pisiglaotan ed arum ed sikara. Balet anggapo so nayarin isalat ed pisiglaotan ed Dios, say sankabalgan a Kaaro. Si Jehova lambengat so makaamta, makatalos, tan makapansuporta ed sikatayon sigsigpot. (Salmo 139:1-4, 23, 24) Niarum ni, iyoopresi na Salita to so makapakelaw ya ilalo parad arapen​—sakey a balon mundon posibli ditan so pakawalaan na tuan kakaaro ed ando lan ando.​—2 Pedro 3:13.

[Saray litrato ed pahina 5]

Nanggayagaan nen David tan Jonathan so tuan impankaaro, tan ontan met ed sikatayo