Selebraan so Memoryal a Makanakana

INLETNEG nen Jesus so Memoryal ed labi na Nisan 14, 33 K.P.a Kasumsumpal labat na impangimaton to ed selebrasyon na Paskua a kaibay 12 apostoles to, kanian napiho tayo iyan petsa. Kayari impamaalis ed manangitapat a Judas, si Jesus so “angala na tinapay, angikuan na bendisyon, pinisag to tan inter to ed sikara, tan inkuanto: ‘Ala yo, saya so kabaliksan na laman ko.’ Tan angala na kopa, akisalamat tan inter to ed sikara, tan amin da so inminum ed satan. Tan inkuanto ed sikara: ‘Kabaliksan na saya so “dalak ed sipanan,” a satan so nikalbo ed biang na dakel.’”​—Marcos 14:22-24.

Ingganggan nen Jesus ed saray babangatan to a nodnonoten so impatey to lapud kaimportantian na satan. (Lucas 22:19; 1 Corinto 11:23-26) Say bagat to so alenleneg a makarondon ed katooan manlapud ayew na tinawir a kasalanan tan ipapatey. (Roma 5:12; 6:23) Say tinapay tan alak ya inusar to et simbolo na ayadyarin laman tan dala to. Lapud kabat so orihinal a petsa, nayari tayon selebraan so okasyon ed mipetekan ya agew ed kada taon, a singa ed impanggagawa ed Paskua na saray Judio. Balet nepeg tayon gawaen itan a makanakana. Akin?

Inkuan nen apostol Pablo a saramay mibibiang ed saray embleman tinapay tan alak so ‘mantultuloy a mangiyabawag ed say impatey na Katawan, ya anggad sikato so onsabi.’ (1 Corinto 11:26) Say selebrasyon so nipaarap sirin ed ipapatey nen Jesus tan ed kabaliksan na saya parad katooan. Say okasyon sirin so seryoso, sakey a panaon pian molimolien so kamaongan na Dios tan say pangapresya a nepeg a niwala’d sikatayo parad si Jehova tan ed Anak to. (Roma 5:8; Tito 2:14; 1 Juan 4:9, 10) Sirin, nampasakbay si apostol Pablo: “Lapud saya siopaman a mamangan na tinapay odino uniinom ed kopa na say Katawan ya andi-kana so mankasalanan nipaakar ed laman tan say dala na say Katawan.”​—1 Corinto 11:27.

Makanakana​—Panon?

Mabitabitar, agnaliketan so Dios no leglemewen tayo so okasyon diad pibiang ed nasuppiat ya agagamil odino diad pangadapta na saray paganon kustombre. (Santiago 1:27; 4:3, 4) Saya so mangamper ed popular iran agawa ed panaon na Easter. Diad panumbok ed bilin nen Jesus a ‘mantultuloy a gawaen iya a pakanodnonotan ed sikato,’ labay tayon ngilinan so Memoryal unong ed impangiletneg to ed satan. (Lucas 22:19; 1 Corinto 11:24, 25) Saya so mangamper ed saray parakep ya inyarum na saray simbaan na Kakristianoan ed selebrasyon. Aaksobien na New Catholic Encyclopedia a “say Misa natan so duman tuloy ed simplin maong a tinumbok a seremonya nen Kristo tan saray Apostol To.” Tan ed mabetbet a panangilin ed Misa, ya inagew-agew ni ingen, say Kakristianoan so sinmuwawi ed no anto so ginetma nen Jesus tan ginawa iyan sakey ya ordinaryon okasyon.

Nansulat si Pablo ed saray Kristianon taga Corinto nipaakar ed agmanepeg a pibibiang lapud linmesa so sakey a problema ed kongregasyon nipaakar ed Pangdem na Katawan. Say pigara so ag-angigalang ed inkasagrado to. Inawit da so pangdeman da tan kinan itan sakbay odino ed panaon na miting. Mabetbet a mangakan tan uniinum ira ya alablabas. Sengegan iya na pantemeg tan makapoy so panlikas da. Lapud impagmaliw ya ag-alerto ed mental tan espiritual, “agda natetebek so laman” tan lapud satan et nagmaliw ira a “walay-kasalanan ed laman tan ed dala na Katawan.” Kaleganan, saramay anggapoy panpangdeman so narasan tan naabala met. Diad katuaan et anggapoy anggan sakey ed sikara so walad kondisyon a mibiang ed saray emblema tekep na apresasyon tan sigpot a pakatalos ed inkaseryoso na okasyon​—a say selebrasyon so pannonot ed impatey na Katawan. Saya so nanresulta na panangukom sumpad sikara, ta angipanengneng ira na agpanamagalang, anggan agpangitaltalek, nipaakar ed satan.​—1 Corinto 11:27-34.

Kaukolan so Pakatebek

Say arum so akibiang ed saray emblema na Memoryal anggaman diad saginonor et atebek da ya agda nepeg komon a ginawa iman. Saramay walaay kanepegan a mibiang ed saray emblema ed Memoryal so pinili na Dios tan sirin et walaay paneknek na espiritu na Dios. (Roma 8:15-17; 2 Corinto 1:21, 22) Sikaray magmamaliw a makana aliwan lapud personal a desisyon odino determinasyon da. Inggetar na Dios so bilang na saramay miuley ed Kristo ed tawen a 144,000, a mas melag a bilang no ipareng ed amin a minanabang manlapud dondon nen Kristo. (Apocalipsis 14:1, 3) Say panagpili so ginmapo ed agew nen Jesus, kanian natan et daiset lambengat so mibibiang. Tan lapud ompapatey so pigara ed sikara, satan a bilang so nepeg ya ondaiset.

Akin a nayarin say sakey so sililingon makapibiang ed saray emblema? Nayarin satan so lapud dati iran relihyoson panmoria​—ya amin a matoor so onla ed tawen. Odino satan so nayarin lapud ambisyon odino inkasiblet​—liknaan a say sakey et mas makanepegan nen say arum​—tan say panpilalek na inkaprominenti. Anganko satan et lapud resulta na mabiskeg ya emosyon lapud seryoson problema odino sakey a trahedya a pansengegay kaandiay interes na sakey ed bilay ed dalin. Posibli met itan lapud maapit a pikakaaro ed sakey a walaay mangatatawen a tawag. Kaukolan a nonoten tayon amin a say desisyon so kien na Dios, aliwan sikatayo. (Roma 9:16) Kanian no naroromog na sakey a too, “kayari impansukimat,” a sikaton talaga so agmanepeg a mibiang ed saray emblema, kaukolan a sikatoy ontunda la natan.​—1 Corinto 11:28.

Say ilalon inyopresi la na Dios ed dakel ed katooan et say maandon bilay ed sakey a paraison dalin. Satan so baleg a bendisyon a nepeg tayon talaranan, tan sakey itan a mainomay a pakaingganyoan tayo. (Genesis 1:28; Salmo 37:9, 11) Dia ed dalin a napikasakeyan-lamet na saray matoor iray inad-aro ra ed bilay a pinaoli tan nakabat iray matoor ed inmuna, a singa di Abraham, Sara, Moises, Rahab, David, tan Juan a Managbautismo​—ya inaatey sakbay a nilukasan nen Jesus so dalan a mamaarap ed mangatatawen a bilay.​—Mateo 11:11; ikompara so 1 Corinto 15:20-23.

Seselebraan so Pangdem na Katawan a makanakana na saramay walaay mangaraldalin ya ilalo diad panamegley na iyatendi tan marespeton idengel, anggaman ag-ira mibiang ed tinapay tan alak. Sikara met so nagunggunaan ed bagat nen Kristo, a mamakayari ed sikara a nawalaan na naabobonan a talindeg ed arap na Dios. (Apocalipsis 7:14, 15) Legan a tatalinengen da so diskurso, say apresasyon da parad sagradon bengabengatla so napapabiskeg, tan say pilalek da a mansiansian mikasakey ed totoo na Dios ed inerman so ombulaslas.

Diad sayan taon, kaselek na agew ed Martes, Abril 2, say Memoryal so ngilinan ed amin a kongregasyon na Tastasi nen Jehova ed masulok a 78,000 a kongregasyon ed interon dalin. Onatendi ka ta?

[Paimano ed leksab]

[Litrato ed pahina 8]

Kada taon et seselebraan na Tastasi nen Jehova so Memoryal