Talaga Ta’n Nayarian Mon Aroen so Dios?
“ANGGAPOY toon makanengneng ed siak tan ingen manbilay,” kuan na Dios. (Exodo 33:20) Niarum ni, nanlapulad inkakompleto lay Biblia anggapo so ebidensyan walay siopaman a toon direktan akitalosan ed sikato. Agta ompatnag a mairap—imposibli ni ingen—so pamayubo na aralem a panamabli ed sakey ya agmon balot direktan apinengnengan odino arengel? Talaga ta’n posibli pakawalaan na maaron relasyon ed Manamalsa na uniberso?
Talagan anggapo so duaruwan posibli so pamayubo na ampetang a personal a pisisiglaotan ed Dios. Diad Deuteronomio 6:5 et nabasa tayo a ginanggan so nasyon nen Israel: “Nepeg mon aroen si Jehova a Dios mo ed amin a pusom tan ed amin a kamarerwam tan ed amin a makanan puersam.” Diad saginonor et pinekderan lamet iyan ganggan nen Jesu-Kristo ed saray patumbok to tan inyarum: “Saya so sankabalgan tan unaan a ganggan.” (Mateo 22:37, 38) Kasin pasesegen itayo na Biblia ya aroen so Dios no say ontan a relasyon so agnadampot?
Kasin iilaloan itayo nen Jehova a sikatoy aroen lapu labat ta ingganggan to itan? Andi. Pinalsa na Dios so inmunan atooan a sanasawa tekep na kapasidad a sikatoy aroen. Agpinilit si Adan tan Eva ya onloob ed sakey a maaron relasyon ed Manamalsa ra. Imbes, pinaliberan ira na Dios na panuliranan iran sirkumstansya pian nabayuboan da so aralem a panamabli ed sikato. Wala ed sikara so panpili—say pakaapit odino pakaarawi ed Dios.
Pinili nen Adan tan Eva so panrebelde. (Genesis 2:16, 17; 3:6, 7) Anggaman ontan, walaan na potensyal iray kapolian da a mamayubo na maaron relasyon ed Manamalsa ra.
Manakar a Kaiba so Tuan Dios
Alimbawa, diad Biblia, asalitan si Abraham so “kaaro” na Dios. (Santiago 2:23) Ingen seguradon ag-alenleneg si Abraham a nanggayagaan toy maapit a relasyon ed Dios. Dakel niran ag-ayadyarin totoo so sasaglawien na Biblia ya angipanengneng na tuan panamabli ed si Jehova tan “nanakar a kaiba so tuan Dios.”—Genesis 5:24; 6:9; Job 29:4; Salmo 25:14; Uliran 3:32.
Saray ariripen na Dios ed panaon na Biblia so agniyanak a walaan lay aro tan panamabli ed Dios. Kaukolan dan bayuboan itan. Panon? Diad pangamta ra ed sikato diad panamegley na personal a ngaran to, Jehova. (Exodo 3:13-15; 6:2, 3) Diad pagmaliw a sinononot ed kiwawala tan inka-Dios to. (Hebreos 11:6) Diad naynay a pandalepdep ed maaro iran gawa to. (Salmo 63:6) Diad pangipikasi ed Dios ed sankaaralman a kanonotan da. (Salmo 39:12) Diad pangamta nipaakar ed kamaongan to. (Zacarias 9:17) Diad lalon pangipatnag na mabunigas a takot a sikatoy naopendi.—Uliran 16:6.
Nayarian mo kasi magmaliw a kaaro na Dios tan manakar a kaiba to? Tua, ya agmo nanengneng so Dios odino narengel so boses to. Anggaman kuan, si Jehova so mangukombida ed sika a magmaliw a ‘bisita ed tolda to,’ kaaro to. (Salmo 15:1-5) Kanian, posiblin naarom so Dios. Balet panon mon napabulaslas so maapit tan pinablin relasyon ed sikato?