Say Itatalona na Tuan Panagdayew so Asingger La

“Si Jehova sikato naani so Ari ed amin a dalin.”​—ZACARIAS 14:9.

1. Anto so eksperiensia na alanaan a Kristianos legan na Guerra Mundial I, tan panon a nipasakbay iya?

LEGAN na inmunan guerra mundial, asagmak na alanaan a Kristianos so dakel ya ir-irap tan inkipriso diad saray lima na manbabakal a nasyones. Say impansakripisyo ra ed pandayew ed si Jehova so asebelan a tuloy, tan sikaray naplag ed kipapasen na inkakautibo ed espiritual. Amin na saya so nipasakbay ed Zacarias 14:2, a manedeskribe ed internasyonal a panangataki ed Jerusalem. Say syudad na sayan propesiya et say ‘mangatatawen a Jerusalem,’ say mangatatawen a Panarian na Dios tan say kawalaan na “say trono na Dios tan say Kordero.” (Hebreos 12:22, 28; 13:14; Apocalipsis 22:3) Saray alanaan na Dios ed dalin so angirepresenta ed satan a syudad. Saray matoor ed limog da so akaliktar ed panangataki, ya agda labay so nadakep “manlapud say syudad.”a

2, 3. (a) Panon a tinmalona so panagdayew ed si Jehova nanlapulad 1919? (b) Nanlapulad 1935, anton aligwas so nagagawa?

² Nen 1919 saray matoor ya alanaan so nibulos manlapud akautibon kipapasen da, tan sikaran tampol so anganamot ed panaoy kareenan a tinumbokan na satan a bakal. Bilang embahadores na mangatatawen a Jerusalem, inanamot da so engranden pankanawnawa pian ipulong so maong a balita na Panarian na Dios tan pangasisti ed panugyop ed saray pinal a membro na 144,000. (Mateo 24:14; 2 Corinto 5:20) Nen 1931 et inadapta ra so matukoy a Makasulatan a ngaran a Tastasi nen Jehova.​—Isaias 43:10, 12.

³ Nanlapulad saman, saray alanaan a Tastasi na Dios so tuloy-tuloy ya inmabante. Anggan si Hitler a kaibay organisasyon to ed pibabakal a Nazi so agmakapatunda ed sikara. Anggaman ed sankamundoan a panamasegsegang, say kimey da so nanbunga ed amin a dalin. Nagkalautla nanlapulad taon 1935, et sikaray inulop na internasyonal a “baleg ya ulop,” a singa nipasakbay ed libro na Apocalipsis. Saraya met so dedikado, bautismadon Kristiano tan “inorasan da so kawekawes da, tan sikara so pinapoti ra ed dala na Kordero,” si Jesu-Kristo. (Apocalipsis 7:9, 14) Balet, sikaray aliwan alanaan, a walaay ilalon mangatatawen a bilay. Say ilalo ra et say panawir ed abalang nen Adan tan Eva, salanti, ayadyarin atooan a bilay ed paraison dalin. (Salmo 37:29; Mateo 25:34) Natan, say baleg ya ulop so manbilang na masulok a limaran milyon a kakamarerwa. Say tuan panagdayew nen Jehova so ontatalona, balet say pinal ya italona to so onsabi ni.

Saray Dayo ed Espiritual a Templo na Dios

4, 5. (a) Iner so pandadayewan na baleg ya ulop ed si Jehova? (b) Antoran pribilihyo so panggagayagaan da, tan diad kasusumpalan na anton propesiya?

⁴ Singa nipasakbay, say baleg ya ulop ‘so mandadayew [ed Dios] agew tan labi diad templo to.’ (Apocalipsis 7:15, paimano’d leksab, NW) Lapud sikaray aliwan espiritual, makasaserdoten Israelitas, maseguron anengneng nen Juan ira ya akaalagey ed templo diad paway a saban na saray Hentil. (1 Pedro 2:5) Agaylan maglorian espiritual a templo nen Jehova so nagmaliwan to, say kaliberliber to so napapano na sayan baleg ya ulop ya uulopen na saray nakdaan na espiritual ya Israel, a mangidadayew ed sikato!

⁵ Say baleg ya ulop so agmanlilingkor ed Dios ed kipapasen ya ililitrato na akindalem a makasaserdoten saban. Ag-ira niyabawag bilang matunong diad pagmaliw a tinagibin espiritual ya ananak na Dios. (Roma 8:1, 15) Anggaman kuan, diad pangagamil na pananisia ed dondon bagat nen Jesus, walaan ira na malinis ya alagey ed arap nen Jehova. Sikaray niyabawag a matunong tekep na gagalan magmaliw a kakaaro to. (Ikompara so Santiago 2:21, 23.) Sikara met so apribilihyoan a mangipresenta na naabobonan iran bagat ed espiritual ya altar na Dios. Kanian, diad sayan baleg ya ulop, maglorian nasusumpal so propesiya ed Isaias 56:6, 7: “Saray sankaili a mikakasakey ed Jehova, a manlingkor ed sikato, tan mangaro ed ngaran nen Jehova, . . . Anggan sikara yakar ko ra ed masanto a palandey ko, tan gawaen ko ra naani a malikeliket ed abung ko a panagpikasian. Saray napoolan a bagbagat da tan saray bagat da naawat ira naani ed tapew na altar ko. Ta say abung ko natawag naani ya abung na pikakasi a nipaakar ed saray amin a baley.”

6. (a) Antoran nengneng na bagat so iyaapay na saray dayo? (b) Anto so ipapanonot ed sikara na kargaan na danum ed makasaserdoten saban?

⁶ Arum ed saray bagat ya iyaapay na sarayan dayo et “say bunga na saray bibil [singa pinon tuloy a nitaryan iyaapay a butil] a mangiwakawak na ngaran [na Dios]” tan “say panaggawa na maabig tan say pannanabang.” (Hebreos 13:15, 16) Say baleg a kargaan na danum a kaukolan a pangurasan na saray saserdote na inkasikara so importanti met a panonot ed sarayan dayo. Sikara met so nepeg a manpasakop ed espiritual tan moral a kalinisan legan a progresibon nipapalinew ed sikara so Salita na Dios.

Say Masanto tan Saray Muebles To

7. (a) Panon so panmoria na baleg ya ulop ed saray pribilihyo na say masanton inkasaserdote? (b) Antoran kaaruman a pribilihyo so naawat na arum a dayo?

⁷ Walaan ta na antokaman a kabaliksan so say Masanto tan saray muebles to parad sayan baleg ya ulop na saray dayo? Bueno, ag-iran balot niwala ed kipapasen a singa ililitrato na say Masanto. Ag-ira nianak lamet a singa ed espiritual ya ananak na Dios a say pibabaley da et mangatatawen. Kasin saya so mamaibeg odino mamaagum ed sikara? Andi. Imbes, panggagayagaan da so pribilihyo ran manuporta ed nakdaan na 144,000, tan ipapanengneng da so aralem ya apresasyon ed gagala na Dios a managibi ed sarayan espiritual ya ananak, a miulop ed si Kristo diad pangagwat ed katooan a mamaarap ed inkayadyari. Ontan met, say baleg ya ulop na saray dayo et papablien da so baleg ya agkanepegan a kaabigan na Dios diad pangipagamor to’d sikara na mangaraldalin ya ilalo na andi-anggaan a bilay diad Paraiso. Arum ed sarayan dayo, singa say Netineo nensaman, so naikdan na pribilihyon pangasikaso diad pangasisti ed masanton inkasaserdote.b (Isaias 61:5) Manlapud saraya et manuturo si Jesus na “principes ed amin a dalin.”​—Salmo 45:16.

8, 9. Antoy gunggunan naala na baleg ya ulop diad pannodnonot ed saray muebles ed say Masanto?

⁸ Bangta ag-iran balot makaloob ed antitipikon Masanto, say baleg ya ulop na saray dayo so akaaral na mablin leksion manlapud saray muebles to. No panon a say lamparaan so naynay a mankakaukolan na larak, saray dayo met so mankaukolan na masanton espiritu ya ontulong ed sikaran natalosan so progresibon katuaan manlapud Salita na Dios a nipaparalan ed panamegley na “say matoor tan makabat ya aripen.” (Mateo 24:45-47) Niarum ni, ontutulong so espiritu na Dios ed sikaran onkiwas ed sayan imbitasyon: “Tan saman so espiritu tan saman so nobya [say alanaan a nakdaan] kuan da: ‘Gala!’ Tan say makadngel, kuan to komon: ‘Gala’ Tan say napgaan, ondago; et say malabay, mangala ed danum na bilay ya andi bayar.” (Apocalipsis 22:17) Kanian, say patoonan na lamparaan so sakey a panonot ed say baleg ya ulop ed obligasyon dan onsindag bilang Kristiano tan paliisan so antokaman diad awawey, diad kanonotan, salita, odino diad gawa a napaermen so masanton espiritu na Dios.​—Efeso 4:30.

⁹ Say lamisaan na impatnag-a-tinapay so mangipapanonot ed say baleg ya ulop a pian mansiansian mabunigas ed espiritual, sikaray nepeg a maparanay a mangan na espiritual a taganon manlalapud Biblia tan manlalapud saray palapagan na “say matoor tan makabat ya aripen.” (Mateo 4:4) Ipapanonot ed sikara na say altar na insenso so kaimportantian na masimoon a pikakasi ed si Jehova parad tulong ta pian napansiansia ray integridad da. (Lucas 21:36) Saray pikakasi ra so mangilaktip ed impapuso iran balikas na dayew tan pisasalamat. (Salmo 106:1) Say altar na insenso so mangipapanonot ed sikara a kaukolan ya idayew so Dios ed arum niran dalan, a singa diad panamegley na interon-puson panagkanta ra na saray kanta ed Panarian diad saray Kristianon miting tan diad panparaan da a maong pian nagawan epektibo so ‘mapublikon deklarasyon parad kilalaban.”​—Roma 10:10, NW.

Say Kompleton Italona na Tuan Panagdayew

10. (a) Diad anton engranden iilaloan so panpipirawatan tayo? (b) Anto so nepeg nin nagawan unona?

¹⁰ Natan “dakerakel a baley” a manlalapud amin a nasyon so onaagus ed abung na panagdayew nen Jehova. (Isaias 2:2, 3) Diad pamekder ed saya, oniay kuan na Apocalipsis 15:4: “Siopa so ag-ontakot ed sika, O Katawan, tan agmangigalang ed ngaran mo, ta sika lambengat so santo? Kanian amin a nasyones ondago ra tan mangigalang ira ed arap mo, ta saray gawam a matunong sikara so nipatnag.” Dedeskribien na Zacarias kapitulo 14 so ontumbok. Diad asingger ya arapen, say mauges ya awawey na maslak a totoo ed dalin so onsabi ed kapantokan to legan a diad unor a pankanawnawa et mandaragup iran mibakal sumpad Jerusalem​—saray representanti ed dalin na mangatatawen a Jerusalem. Insan si Jehova ed satan so onkiwas. Bilang sakey a Mibabakal-Dios, sikato so “ompaway, tan mibakal naani a sumpa ed saraman a nasyon” ya agmangingalngalep ed sayan panangataki.​—Zacarias 14:2, 3.

11, 12. (a) Panon so ikiwas nen Jehova ed onsasabin sankagloboan a panangataki ed saray managdayew ed templo to? (b) Anto so magmaliw a resulta na bakal na Dios?

¹¹ “Saya so lewet a pamakbak naani nen Jehova ed saray amin a baley ya akibakal a sumpa ed Jerusalem: Say laman da naopot naani leleg a manalagey ira ed saray sali ra, tan saray mata ra naopot ira naani ed saray abot da, tan say dila ra naopot naani ed sangi ra. At nagawa naani dia ed saman ya agew, a say baleg ya ingal a manlapu ed Jehova wala naani ed pegley da; et sikara ompeket ira naani balang sakey ed lima na kaabay to, et say lima to onalagey naani a sumpa ed lima na kaabay to.”​—Zacarias 14:12, 13.

¹² Balanglan sayan bakbak so literal odino piguratibo, kaukolan tayon talaranan no antoy pawayan to. Anggaman ontan, wala so sakey a bengatlan maseguro. Legan a saray kabusol na Dios so onkiwas ed sankagloboan a panangataki ed ariripen nen Jehova, sikaray napatunda na ekstraordinaryon panangidemostra na makapanyarin-amin a pakayari na Dios. Saray sangi ra so napepe. Singano saray dila ra na isusumpa so binmulok. Say nankakasakey a kalat da so omburagas ed pakanengneng da, a singano saray mata ra so binmulok. Saray pisikal a biskeg da, ya nampakpel ed sikaran mangataki, so naekal. Diad kawetwet, sikaray manaarapan tekep na baleg a panpapateyan. Diad ontan et amin a mangaraldalin a kakabusol na panagdayew ed Dios so napagit. Diad kaunoran, amin a nasyon so napilitan ed satan a mamidbir ed inkasoberano nen Jehova ed uniberso. Diad ontan et nasumpal so propesiya: “Si Jehova sikato naani so Ari ed amin a dalin.” (Zacarias 14:9) Manlapulad satan, si Satanas tan saray demonyo to so nabalur ed Sanlibon Taon ya Uley nen Kristo ya onggapo tekep na ankabaleg a bendisyones a nigana parad katooan.​—Apocalipsis 20:1, 2; 21:3, 4.

Say Mangaraldalin a Kioli

13. Sioparay “napaulian ed saray amin a nasyon”?

¹³ Intuloy na propesiya nen Zacarias ed Zac kapitulo 14, bersikulo 16: “Et nagawa naani, a balang sakey a napaulian ed saray amin a nasyon a linma a sumpa ed Jerusalem ontatdang naani a tinaon ya onla a manpikasi ed Ari, a si Jehova na saray ejercito, tan mangunor na liket na saray tabernakulo.” Unong ed Biblia, amin a totoon manbibilay natan a mantultuloy a manbilay ya anggad anggaan na sayan marelmeng a sistema tan naukom a magmaliw a kakabusol na tuan panagdayew so ondalan ed “dusa a salanti ed andi anggaan a kabalang.” (2 Tesalonica 1:7-9; nengnengen met so Mateo 25:31-33, 46.) Sikaray agnapaoli. Ontan met, saramay “napaulyan” et laktipen na saray membro na nasyones ya inatey sakbay na pinal a bakal na Dios tan parad sikara a wala so nibased-Biblian ilalon kioli. Insipan nen Jesus, “onsabi oras, ya amin so saray wala ed saray lobok narengel da so boses to. Et ompaway ira; saray nanggawa na maong, nipaakar ed kioli ed bilay; bang saray nanggawa na mauges, dia met kioli ed bilay ed kaukom.”​—Juan 5:28, 29.

14. (a) Anto so nepeg a gawaen na saray apaoli ta pian nagamoran da so andi-anggaan a bilay? (b) Anto so nagawa ed siopaman ya agda idedikay inkasikara ed si Jehova tan mangagamil na tuan panagdayew?

¹⁴ Amin na sarayan apaoli so nepeg ya onkiwas ta pian say inkioli ra so magmaliw a parad bilay tan aliwan ampait a kaukom. Sikara so nepeg ya onla ed mangaraldalin iran saban ed templo nen Jehova tan ondakmomo bilang dedikasyon ed Dios diad panamegley nen Jesu-Kristo. Siopaman ed saray apaoli ya agmanggawa ed saya so managmak ed parehon bakbak a nasagmak na kaplesan agew a nasyones. (Zacarias 14:18) Siopay makaamta no pigara so napaolin sigagayagan miulop ed baleg ya ulop a manselebra ed antitipikon Piesta na Kobongkobong? Agpanduaruwaan a dakel, tan say baleg ya espiritual a templo nen Jehova so magmaliw a lalon magloria bilang resulta!

Say Antitipikon Piesta na Kobongkobong

15. (a) Antoray pigaran matalonggaring a manunan nengneng na kadaanan a Piesta na Kobongkobong na Israelita? (b) Akin a niyapay iray 70 kalakian a baka legan na piesta?

¹⁵ Kada taon, say kadaanan ya Israel so kinaukolan a manselebra ed Piesta na Kobongkobong. Satan so manbayag ed loob na sakey simba tan manampot itan ed panaon na panaggapas. Satan so magayagan panaon na pisasalamat. Diad loob na satan a simba, kaukolan day manayam ed temporaryon alolong ya asakbongan na saray bulong na kakiewan, nagkalalo la ed saray sanga na palmas. Say piesta so angipanonot ed Israel no panon ya insalba na Dios so inmunan atateng da manlapud Ehipto tan no panon ton inasikaso ira legan na impanayam da ed kobongkobong ya alis-alis ed loob na ngalngali 40 taon ed kalawakan ya anggad insabi ra ed Insipan a Dalin. (Levitico 23:39-43) Legan na piesta, 70 kalakian a baka so nibagat ed altar na templo. Unong ed ebidensya, sayan nengneng na piesta so propetiko na ayadyari tan naspot a panangisalbay-bilay a kimey a ginawa nen Jesu-Kristo. Saray gungguna na dondon bagat to so diad kaunoran et onagus ed agnabilang iran kapolian na 70 pamilya na katooan a nanlapud si Noe.​—Genesis 10:1-29; Numeros 29:12-34; Mateo 20:28.

16, 17. (a) Kapigan a ginmapo so antitipikon Piesta na Kobongkobong, tan panon a nituloy itan? (b) Panon ya akibiang so baleg ya ulop ed say selebrasyon?

¹⁶ Kanian say kadaanan a Piesta na Kobongkobong so angidanet ed magayagan panutugyop na arondon iran managkasalanan ya onloob ed baleg ya espiritual a templo nen Jehova. Say kasumpalan na say piesta so ginmapo nen Pentecostes ed 33 K.P. tekep na inggapo na sayan magayagan panutugyop na espiritual ya Israelitas ed Kristianon kongregasyon. (Gawa 2:41, 46, 47) Sarayan alanaan so mangaapresya a sikaray ‘temporaryon manaayam’ ed mundo nen Satanas lapud say peteg a “pibabaley [da et] wala ed tawen.” (1 Pedro 2:11, NW; Filipos 3:20) Say magayagan piesta so temporaryon asakbongan na apostasya a nanresulta ed inkatibukel na Kakristianoan. (2 Tesalonica 2:1-3) Anggaman ontan, say piesta so nituloy nen 1919 diad magayagan pananugyop ed nakekeraan iran membro na 144,000 ya espiritual ya Israelita, a tinmumbok ed satan so pananugyop na internasyonal a baleg ya ulop na Apocalipsis 7:9.

¹⁷ Say baleg ya ulop so nilitrato a walaan na sanga na saray palma ed kalimaan da, a mangipapanengneng a sikara met so magayagan managselebra na antitipikon Piesta na Kobongkobong. Bilang dedikadon Kristianos, sikaray sigagayagan mibibiang ed kimey na pananugyop na dakel nin managdayew ya onloob ed templo nen Jehova. Niarum ni, bilang managkasalanan, atalason dan sikaray andian na permanentin kanepegan a manayam ed dalin. Sikara, pati ed arapen niran napaoli, so nepeg a mantultuloy a mangagamil na pananisia ed dondon bagat nen Kristo ya anggad nasabi ra so atooan ya inkayadyari ed anggaan na Sanlibon Taon ya Uley nen Kristo.​—Apocalipsis 20:5.

18. (a) Anto so nagawa ed anggaan na Sanlibon Taon ya Uley nen Jesu-Kristo? (b) Diad kaunoran et panon ya ontalona so tuan panagdayew ed si Jehova?

¹⁸ Insan, saray managdayew na Dios ed dalin so onalagey ed arap to diad atooan ya inkayadyari ya anggapo lay pankaukolan ed mangatatawen ya inkasaserdote. Nasabi ed satan so panaon sano si Jesu-Kristo so “iter to so panarian ed Dios tan Ama.” (1 Corinto 15:24) Si Satanas so nibulos “kayari na saraya” pian suboken so apayadyarin katooan. Siopaman ya agmatoor so naderal a maando, pati ed si Satanas tan saray demonyo to. Saramay mansiansian matoor so pagamoran na andi-anggaan a bilay. Sikaray magmaliw a permanentin manayam ed mangaraldalin a Paraiso. Diad ontan et say antitipikon Piesta na Kobongkobong so makasabi la ed satan ed magloria, matalonan konklusyon. Say tuan panagdayew so ontalona la ed satan diad andi-anggaan a gloria nen Jehova tan ed magnayon a liket na katooan.​—Apocalipsis 20:3, 7-10, 14, 15.

[Saray paimano ed leksab]

Repason Tepetepet

◻ Panon a say “Jerusalem” so inataki legan na inmunan guerra mundial?​—Zacarias 14:2.

◻ Anto so agawa ed totoo na Dios nanlapulad 1919?

◻ Siopa natan so mibibiang ed panagselebra na antitipikon Piesta na Kobongkobong?

◻ Panon a sigpot ya ontalona so tuan panagdayew?

[Litrato ed pahina 23]

Inusar iray sanga na palmas ed panselebra ed Piesta na Kobongkobong