Sakey a “Bunton a Tasi” ed Dalin na “Palandey na Dios”

DIAD sakey a mapa na kontinenti, no nengnengen mon maong so gilig na dayat na Sagur Aprika tan manpabukig ed Gulpo na Guinea, diad lugar a say baybay et manpaabalaten, naromog mo so Cameroon. No itultuloy moy manpaabalaten, makasabi ka ed maawang a parukey na andeket a buer iran beach. Say andeket a buer so resulta na imbetag na bulkan na Palandey Cameroon.

Sayan patayusok, 4,070 a metron toktok na palandey so sigpot a matalonggaring ed saman a lugar. Sano aamesen na sinag na onseselek a banwa so alosarsar na Palandey Cameroon, satan so mangiiter na alay dakep a mabitar iran kolor​—ube, kolor-dalandan, balitok, tan magket ya ambalanga. Nasalming ed dayat tan kabangibang iran linok so amin na sarayan kolor, a ngalngalin imposiblin nibiig so tawen ed dalin. Kanian mainomay a talosan no akin a nginaranan na saray tribu na animista ed rehyon a Mongo Ma Loba, ya impatalos a “Karwahe na dirios,” odino mas kabkabat a, “Palandey na Dios.”

Diad bandad abalaten ni, walay minilyan amputin gilig na dayat, ya atalonton na kaniogan. Nilikud ed marakep a gilig na dayat, say babaleg a kabiangan na bansa so kinobrian na makapal a katakelan ya ekuwador, a nasaknapan toy anggad ketegan na Congo tan Central African Republic tan diad manpaamianen ya anggad Nigeria tan ed Chad a walad bandad leksab na Sahara. Say mamasagur a parti na bansa so mapalandey, a mangipanonot ed managbiahe ed saray parti na Europa. Balet, say ampetang a klima, so mangipanonot ed sika ya asingsingger ka la ed ekuwador. Saray panduruma na alog to so manasagyat ed dakel a tourist guide a deskribien so Cameroon bilang sakey a melag a modelo na Aprika. Sayan impresyon so pinabiskeg na nanduruman etnikon grupo tan masulok a 220 so nirehistron lenguahe tan dayalekto.

No ompasyar ka ed Cameroon, nayarin sika so manayam ed sakey ed ankakabaleg ya hotel ed daungan na Douala, odino ed kabesiran syudad, a Yaoundé. Balet ompan nasaew moy pankanawnawan naamtaan so nipaakar ed kabibilay na totoo, nagkalalo la ed masulok a 24,000 a Tastasi nen Jehova, ya okupadon mamapabaleg ed “bunton a tasi” ed interon dalin na sayan “Palandey na Dios.”a Akin ya ag-ompasyar ed bansa pian nakabat so pigara ed sikara? Say pansukisok mo ed sayan Mamasagur a dalin na Aprika so maseguron siyayaman a natumangan.

Diad Panamegley na Dugout Canoe, Bush Taxi, Odino Bisikleta?

No iner so Sanaga, a sankadukeyan ya ilog ed Cameroon, so onaabot ed kadayatan, satan so mamorma na baleg a delta. Pian nasabi so amin a manaayam ed sayan maawang a rehyon, mabetbet a manbaroy so Tastasi nen Jehova ed dugout canoe. Onia so gagawaen na siameran manangipalapag na Panarian ed melag a grupo diad Mbiako. Duara ed sikara so manaayam ed baryo na Yoyo a 25 kilometro ed kaarawi. Pian nasabi ra so Mbiako et kakaukolanen toy impasyan panbelsay, balet maparanay iran presenti ed saray Kristianon miting. Legan a bibisitaen iyan grupo, sakey a managbiahen manangasikaso so angisuherin mangipanengneng ed video a Jehovah’s Witnesses​—The Organization Behind the Name. Balet satan so agmainomay a gawaen. Diad ontan a nisulinek a baryo, iner so pakaromogan to na videocassette recorder, telebisyon, tan koryenti a mamaandar ed saratan?

Legan na simba na bisita, pigaran manangipalapag so dinmalaw ed pastor na simbaan ed saman a lugar. Diad inkasurprisa ra et ampetapetang ya inabrasa ira na pastor, tan mabilabilay so impitongtong da ed sikato nipaakar ed Biblia. Diad impakaimanon say pastor so aglambengat walaan na VCR noagta walaan met na electric generator, nanpakpel iray agagi ya ontepet no kasin nayarin bayesen da so kagawaan to. Lapud nanggayagaan to ed inmuna so impantotongtong da nipaakar ed Biblia, inmabuloy so pastor. Diad labi na Sabado et 102 a totoo so nanbantay, pati say pastor tan maslak ed saray membro na simbaan to. Say duaran Tasi a nanlapud Yoyo so angitagar na pigaran interesado ya akasakay ed duaran dugout canoe. Agda impasen a mairap so panbelsay a pasuba ed agus na mamapaatagey ya etab. Kayari impakabantay da ed video, sikaray apakiwas a tuloy tan apaseseg, tan ikinon da so pakabilang ed ontan a baleg ya organisasyon a say gagala to et say pangigalang ed si Jehova.

Pian naakar so agnasabi na saray dugout canoe, say sakey so onlugan ed sakey a bush taxi. Naynay ya okupado tan matoo so paradaan ya alagaran na sarayan taxi ed saray pasahero. Lapud napapaliberan na saray managlakoy ambetel a danum, ponte, tan saray kargador, magmainomay so pakawetwet. Trabaho na saray kargador so pangipalugan ed saray pasahero a manaalagar na saray bush taxi, a kuanmono, unong ed sikara, so “akaparaan lan ombuat.” Balet, agnepeg a talosan itan a salita unong ed talagan kabaliksan ton “akaparaan.” Saray managbiahe so kaukolan a manalagar na pigaran oras, no maminsan et pigaran agew ni ingen. Bektaman a manseseksekan la iray pasahero ed loob tan say drayber so angikarga la diad parilya na saray bagahe, akasako iran inani, tan no maminsan ni ingen et anggan saray mabilay a manok tan kanding, say bush taxi so onabante lan mamaarap ed makitog, marabok a dalan.

Lapud sinmawa la ed onian nengneng na kabiabiahe, say managbiahen ministro so nandesiden mansulo. Sikato natan so manbiabiahen akabisikleta. Oniay inkuanto: “Nanlapulad denisidik so manbiahen akabisikleta manlapud kongregasyon a mamaarap ed saray kongregasyon, naynay a dugad oras so isasabik parad bisita. Tua, say biahe so mangalay pigaran oras, balet anggan panon et agkaukolan a mangusar na sakey odino duaran agew pian manalagar na saray bush taxi. Legan na mamauran, arum a kalsada so ngalngalin agnanengneng lapud delap. Kaukolan mon ekalen so sapatos mo pian baliwen irayan mapitek tan maranum a dalan. Aminsan et naplag so tupag na sapatos ko ed agus tan agla aromog anggad inlabas na pigaran simba, sanen anengneng itan na marikit na sakey ed Tastasi diad kibanbana legan a manbabangwit! Aliketan ak ed pakapangisulong ko lamet ed sayan nantupag a sapatos, kayarin say tupag to so nanlebleb a kaiba na saray sira. No maminsan et nadadalanan koray lugar ya agnin balot akapanpulongan na Tastasi nen Jehova nensaman. Naynay ak a tetepetan na saray taga baryo no antoy awit ko. Kanian mangaawit ak a naynay na saray magasin tan brosyur. Diad kada itundak, iyopresik irayan nibase ed Biblia iran publikasyon tan mangiiter na antikey a pantasi. Sisiaen kon patuboen nen Jehova irayan bukel na katuaan.”

Nisulinek a Tuloy

Panbabanikelan na Tastasi nen Jehova so panginabang na maong a balita na Panarian ed arum anggan diad nisulinek na Cameroon, diad saray baryo a nisukong ed loob na katakelan. Saya so mankakaukolan na baleg a sagpot, balet say resulta so makapaligsay puso.

Si Marie, sakey a sigpot-panaon a ministro, so akapangigapo na panangiyaral na Biblia ed kalangweran a biin tinawag ya Arlette. Diad pansamposampot na inmunan impanaral, akikasi si Marie ed si Arlette ya ipatnubang to ed puerta, bilang kinaugalian ed sayan parti na Aprika. Balet, impaliwawa na kalangweran a bii a nairapan ya onakar lapud panotot na sali to. Say sali nen Arlette so naimpektaan na sakey a klase na timel a satan so sinmeksek ed laman, a sengeg na pannena. Sitetepel ya inekal nen Marie iray timel a sansakey. Saginonor, naamtaan to met a diad labi sayan marikit so papairapen na saray demonyo. Siaanos ya impaliwawa nen Marie no panon so panmatalek na sakey ed si Jehova, nagkalalo la diad itawag ed ngaran to a maksil diad pikakasi.​—Uliran 18:10.

Maples ya inmaligwas si Arlette. Diad inmuna et anggapoy problema ed pamilya to nipaakar ed panaaral to lapud makatantandan iyaaligwas to ed namparan pisikal tan kaisipan. Balet sanen amoria ra a labay toy magmaliw a sakey ed Tastasi nen Jehova, sinebelan da ed pangituloy to na panagaral. Taloran simba ed saginonor say ina nen Arlette et inanap to si Marie tan kinerew ton ituloy so panagaral lapud impakamorian ontanlan pakakagonigon na marikit to.

Sanen asabi so panaon ya onatendi ed sirkiton asamblea, angupado si Marie na drayber a mangibiahe ed si Arlette parad duaran agew. Balet, agnilabay na drayber ya onla ed ayaman nen Arlette, lapud impandesiden agnadalan so paralan a mamaarap ed kalsada. Kanian nanggaway paraan si Marie pian naawit so marikit ed kalsada. Talagan benindisyonan nen Jehova irayan sagpot. Natan et aatendian nen Arlette so amin a miting na kongregasyon. Pian natulongan a nagawaan iya, andi-kesaw si Marie a manamar ed sikato. Sikaran dua so manaakar na 75-minuto a paonla. Lapud say miting ed Simba so onggagapo ed alas 8:30 n.k., kaukolan ya ombuat si Marie ed abung ed alas 6:30; ingen nagagawaan day onsabin duga ed oras. Iilaloan nen Arlette ya isimboloy inkasikato ed dedikasyon diad bautismo ed danum ed maganon panaon. Onia so inkuan nen Marie: “Siopaman ya ag-akanengneng ed sikato sanen ginmapon manaral so agmakaisip no kaunongan so impanguman to. Misalsalamat ak a maong ed si Jehova ed paraan ya impamendisyon to ed sikato.” Si Marie so peteg a maabig ya alimbawa na dilin-manangisakripisyon aro.

Diad Bandad Amianen Ni

Diad Mamaamianen a Cameroon et napno na pandurumaan tan surprisa. Legan na mamauran, satan so magmaliw a maawang, mabungan tanamanan. Balet sano onagew a mansasnit, say karikaan so nalenes. Diad kaagwan, sano kapetapetangan na agew tan mairap so pananap na siroman, manseseksekan iray karnero ed pader na saray abung a ginawa ed ambalangan-pitek. Diad pegley na kabueran tan amagaan a karikaan, say nanengneng labat a kaberdian et saray pigaran bulong na baobab a kakiewan. Anggaman saraya so ag-atagey a singa ed kapara ran kiew ed ekuwador a katakelan, saratan labat so mapaot. Say abilidad da a makapansungdo ed mairap a kaliberliber so mangiyiilustran tuloy ed seseg tan pakpel na pigaran Tastasi ya inmalis pian manayam ed sayan rehyon ta pian nisindag so liwawa na katuaan.

Arum ed saray kongregasyon ed sayan lugar so nanarawian na 500 ya anggad 800 a kilometro, tan say liknaan na niarawi so peteg a tuloy. Balet dakel so interesado. Inmalis dia so Tastasi a nanlapud arum iran lugar pian ontulong. Pian magmaliw ya epektibo ed ministeryo, kaukolan iran manaral na Foufouldé, sakey a dayalekto diman.

Deniside na sakey a Tasin nanlapud Garoua so pangusar na pigaran agew a nanpupulong ed baryo to, manga 160 a kilometro ed kaarawi. Akaromog na pigaran interesado, balet say bili na pamasahe so akasbel ed sikato ed ipawil a maparanay. Pigaran simba ed saginonor, akaawat na sulat so Tasi nanlapud sakey ed saray interesadon totoo a mikakasi ed sikaton ompawil tan ombisita lamet. Lapud siansian kulang ni pamasahe to, sikatoy ag-akakar. Isipen pa so inkabigla na Tasi sanen binmisita iman a too ed ayaman to diad Garoua pian pakabatan a samploran totoo ed baryo so manaalagar ed ibisita to!

Diad sananey a baryo, asingger ed ketegan na Chad, sakey a grupo na 50 interesadon totoo so angorganisa ed dili ran panagaral ed Biblia. Inyareglo ra so talora ed sikara ya onatendi ed saray miting ed sankaasinggeran a kongregasyon ed Chad. Diad impawil da, saraya la’d satan so makapangikondukta ed panagaral na Biblia ed interon grupo. On, saray salita nen Jesus so onaplikan tuloy dia: “Dakel a tua so aaniyen, daiset ira balet so manani. Pikasi yo sirin ed Katawan na aaniyen, pian mangibaki na saray manani ed aaniyen to.”​—Mateo 9:37, 38.

Panagtasi Diad Saray Syudad

Kayari na dakel a taon na kakisiray literatura, ngalngalin duaran taon lay apalabas, say Panag-Bantayan tan Awake! iran magasin so mainomay lan naala ed Cameroon. Wala so baleg ya entusiasmo tan interes ed sarayan magasin unong a dakel a totoo so manbabasa ed saratan ed unonan pankanawnawa. Sakey a sanasawan ugaw nin espisyal payunir so niasain ed sakey ed saray syudad so akapangipalima na 86 a magasin ed unonan kabuasan a panpupulong da ed balon teritorya. Arum a manangipalapag so akapangipalima na anggad 250 a magasin ed sakey bulan labat! Anto so sekreto na intalona ra? Iyopresi iray magasin ed amin.

Sakey a Tasi a mantratrabaho ed sakey ya opisina a panpubliko so lawas mangipaparayag na saray magasin. Sakey a bii so akanengneng ed saray magasin balet ag-angala na anggan sakey. Atebek na Tasi so interes to tan inopresian to na sakey a kopya, tan inawat to. Say tasi so asurprisa ed impakanengneng ton pinmawil ed ontumbok ya agew. Aliwan lapu lambengat ta labay toy mankontribusyon parad magasin ya inala to noagta onkerew ni na dakel. Akin? Lapud biktima na panagpasoot, pinili to so magasin nipaakar ed satan a tema. Sanlabi ton binasa lan binasa so simbawa a niiter. Lapud aligliwaan a tuloy, labay ton naamtaan so nagkalalo ni nipaakar ed Tastasi nen Jehova.

Anggan saray angkelag ya ananak so makapibiang ed panangilaknab ed mensahe na ilalo na Biblia. Sanen kinerew na maestro na sakey a mantaon na anemiran Tasin bii a mangansion na Katolikon himno, ag-inmabuloy, ya inkuan ton sikato so sakey ed Tastasi nen Jehova. Sirin kinerew na maestro to a mangansion na dilin kanta na relihyon to ta pian naikdan to na grado ed satan. Pinili to so kanta ya atituloan na “God’s Promise of Paradise” tan kinansion itan ya impatlep. Tinepetan na maestro, a kuanto: “Sinalambit mo so paraiso ed kansion mo. Iner iyan paraiso?” Impaliwawa na ugaw so gagala na Dios ed pangiletneg na Paraiso ed dalin diad asingger ya arapen. Diad impakasurprisa ed ebat to, kinerew to ed atateng na ugaw so libron aaralen to. Labay ton markaan base ed saya, imbes a based nanaaralan to legan na leksyon nipaakar ed relihyon. Insuheri na atateng ed maestro a no labay ton suston nagradoan, kaukolan nin unonan aralen ton mismo. Sakey a panagaral na Biblia so nigapo ed sikato.

Manplaplano Ka Ta’n Ombisita?

Diad dakel a parti na mundo natan, saray totoo so agmanginenen ed maong a balita na Panarian. Agmet makapainteres ed sikara so Dios tan say Biblia. Arum lapud takot tan basta labat la mangipulisay ed siopaman ya ondadalaw ya agda kabat. Amin na saya so peteg ya angat ed Tastasi nen Jehova ed ministeryo ra. Balet agaylan pidumaan ed Cameroon!

Say panpulong ed kada puerta so makapalikliket dia. Imbes ya ontoktok, kaugalian so pangitawag na, “Kong, kong, kong.” Insan diad loob et walay onebat na onia, “Siopa itan?” kayari to ed ikabat mi inkasikami bilang Tastasi nen Jehova. Kaslakan et iganggan na atateng iray anak da a mangawit na saray bangko tan iyakar iratan ed sirom na kiew, nayarin diad silong na mangga. Insan makapaliket a panaon so usaren ed pangipaliwawa ed no anto so Panarian na Dios tan no anto so gawaen na satan pian nainawaan so pakaskasin kipapasen na katooan.

Diad panutumbok ed ontan a tongtongan, sakey a bii so angipaamta na liknaan to, a kuanto: “Nagogonigon ak a makanengneng a say katuaan ya aanapen ko so agnaromog ed relihyon ya abangonan ko tan tinatkenan ko. Misalsalamat ak ed Dios ta impanengneng to ed siak so katuaan. Sakey ak a diakono ed relihyon ko. Say estatua na Birhen a Maria so panayamen a sakey simba ed ayaman na kada diakono ta pian nipaamta ra iray kerew da ed sikato. Parad siak, lawas kon kekerewen ed Maria a tulongan toak a naamtaan so katuaan. Natan et impanengneng na Dios ed siak a say katuaan so anggapo ed sikato. Misalsalamat ak ed si Jehova.”

Kanian no nasabi agew et liknaen mo so pankaukolan a panali ed pirmin gayaga a nagamoran ed panangipulong na maong a balita na Panarian na Dios, akin ya ag-onbisita ed sayan parti na Sagur Aprika? Nilikud ed pakadiskobre ed “Aprika ed melag a kabiangan,” balanglan diad panamegley na dugout canoe, bush taxi, odino bisikleta, sikayo met so makaarum ed “bunton a tasi” a satan so nipapaalagey ed dalin na “Palandey na Dios.”

[Paimano ed leksab]

[Credit Line ed pahina 22]

Mapa: Mountain High Maps® Copyright © 1995 Digital Wisdom, Inc.