Tepetepet Manlapud Managbasa

Ipapanengneng na saray report ed pigaran taon a say bilang na mibibiang ed saray emblema na Memoryal so dinmaak na daiset. Kasin isusuheri na saya a dakel a balo ni so nalalanaan na masanton espiritu?

Wala so maabig a rason pian sisiaen a say bilang na 144,000 alanaan a Kristianos so akompleto la ed pigaran dekada lay apalabas.

Diad Gawa 2:1-4, nabasa tayo so nipaakar ed saray inmuna ed satan a limitadon grupo: “Sanen sinmabi agew na Pentecostes walara ya amin ya atipon ed saksakey a pasen, et kapagdakan sinmabi a nanlapu ed tawen so sakey a tanol a singa sakey a dagem a mabiskeg a sinmabi a maksil, et pinano to so sankaabungan a kawalaan dan akayurong. Et pinmatnag ed sikara so diladila na apuy a niutob, et dinmapo ed tapew na sinansakey ed sikara, et sikaray napno ya amin na espiritu santo et ginmapo ra a nansalita na salitan nagsikasikmat unong na inpangiter ed sikara na espiritu a pakapansalita.”

Kayari na satan, amili si Jehova na arum, tan sikara so nilanaan to na masanton espiritu to. Nilibu so niarum ed asasakbay a tuloy iran taon na Inkakristiano. Diad Memoryal a selebrasyon ed panaon tayo, mabetbet ya ipapaimano na espiker iray salita nen apostol Pablo diad Roma 8:15-17, a manasaglawin saray alanaan so ‘akaawat ingen na espiritu na inkipaanak.’ Inyarum nen Pablo a say masanton espiritu a naawat da so ‘mamatua ed espiritu ra, ya anak ira na Dios, mitatawir ed Kristo.’ Saraman so peteg a walaan na sayan inkalanaan-ed-espiritu so makaamta ed satan tekep na kaseguroan. Aliwa itan a pirawat lambengat odino sakey a sindag na emosyonal tan agrealistikon panmoria ed inkasikara.

Natatalosan tayo a sayan mangatatawen a tawag so nantultuloy diad loob na saray siglo, anggaman legan na tatawagey Ambilunget a Panaon, nayarin walaray panaon sanen say bilang na saray alanaan so dagdaiset.a Diad inkiletneg lamet na tuan Inkakristiano ed pansamposampot na unor a siglo, dakel ni so atawag tan pinili. Balet ompatnag a diad kapegleyan na dekaday 1930, say interon bilang na 144,000 so manunan akompleto la. Kanian ginmapon pinmatnag so sakey a grupo na matoor a Kristianos a walaan na mangaraldalin ya ilalo. Tinawag nen Jesus itan bilang “arum a karnero,” a mikakasakey ed panagdayew a kaiba na saray alanaan bilang sakey a naabobonan a pulok.​—Juan 10:14-16.

Iyaaninag na saray katuaan diad loob na saray dekada so namparan say inkakompleto na tawag ed alanaan tan panamendisyon nen Jehova ed ombabaleg a “baleg ya ulop,” a maniilalon makaliktar ed “baleg a kairapan.” (Apocalipsis 7:9, 14) Alimbawa, diad Memoryal a selebrasyon nen 1935, ya inatendian na 63,146, saramay mibibiang ed saray emblema bilang ebidensya na pangibabaga ran sikaray alanaan so manbilang na 52,465. Talomplon taon ed saginonor, odino nen 1965, say inmatendi so 1,933,089, bangta saray mibibiang so inmabeba ed 11,550. Diad inlabas na 30 taon, nen 1995 say inmatendi so linmukso ed 13,147,201, balet ta 8,645 lambengat so akibiang ed tinapay tan alak. (1 Corinto 11:23-26) Malinlinew, legan na inlabas na saray dekada, say bilang na saramay mangibabagan kabiangan na saray alanaan so dinmaiset a tuloy​—nayarin 52,400 nen 1935; 11,500 nen 1965; 8,600 nen 1995. Anggaman ontan, saramay walaan na mangaraldalin ya ilalo so abendisyonan, tan say bilang da so dinmaak a tuloy.

Say sankaganoan nin nipalapag a report et say taon 1995, tan ipapanengneng na satan a 28 a kaaruman nin mibibiang nensay nen katantaon anggaman say ratio na saray mibibiang ed saramay onaatendi so peteg ya inmabeba. Diad impangikonsidera ed amin, say katuaan a pigara ni amilin mibiang ed saray emblema so agsengegay kapagaan. Diad inlabas na saray taon et pigara, anggan saray balo nin abautismoan, so tampol a mibibiang. Diad pigaran kaso, kayari aganon panaon et inaksobi ran saya so lingo. Arum so akamorian sikaray akibiang bilang emosyonal ya ikikiwas ed anganko pisikal odino mental a tensyon. Balet kaunoran et amoria ran sikara so peteg ya ag-atawag ed mangatatawen a bilay. Kinmerew ira na mapangasin pakatalos na Dios. Tan sikara so nantultuloy a manlilingkor ed sikato bilang maabig, matoor a Kristianos a walaan na ilalo ed andi-anggaan a bilay diad dalin.

Anggapo so pankaukolan parad siopaman ed sikatayo a manpaga no say sakey a too so onggapon mibiang ed saray emblema odino itunda so panggawa ed satan. Peteg ya aliwan sikatayoy makauley no kasin say sakey so talagan alanaan na masanton espiritu tan atawag ed mangatatawen a bilay odino andi. Nonoten so mabiskeg a panamaseguro nen Jesus: “Siak so maong a pastol, et kabat ko so saray kayarian ko.” Unong a maseguro, amta nen Jehova iramay pinili to bilang espiritual ya ananak. Wala so amin a rason pian panisiaan a say bilang na saray alanaan so mantultuloy ya ondaiset unong a say inkatatken tan ag-iilaloan iran nagawa et sampotan to so mangaraldalin a bilay da. Balet, anggan legan a sarayan peteg ya alanaan so napaneknekan a matoor anggad patey, ya akalinya parad say korona na bilay, say arum a karnero, ya anguras ed kawekawes da ed dala na Kordero, so makapanilalo ed arapen ed kiliktar ed manasingger lan baleg a kairapan.​—2 Timoteo 4:6-8; Apocalipsis 2:10.

[Paimano ed leksab]