Kokonsideraen na Saray Espisyalista Iray Kasandi ed Dala
NAYARIN 200 ya espisyalista manlapud kaliberliber na Estados Unidos so nandaragup ed Cleveland, Ohio, nen Sabado, Oktubre 7, 1995, pian singbaten so tema ed ombabaleg ya interes ed medikal a lawak: anggapoy-dala a tambal tan panag-opera.
Pigaran makapaangat iran sirkumstasya so siningbat. Alimbawa, komusta no nidudunget so pasyente ed graben anemya? Panon a say ugaw a nianak a pirmin kulang ed bulan so natambal ya anggapoy dala? Kasin sitatalonan nagawaan so panag-opera ed puso ya anggapoy panagpasaksak. Makapainteres, say anggapoy-dala a panag-opera—mabetbet a manguusar na saray teknik ya ontutulong ed laman a manggawa na dilin suplay to na dala—so niyaplika la ed sarayan amin a situasyon tekep na maabig iran resulta.a
Akin a wala so pankaukolan parad saray kasandi ed panagpasaksak na dala? “Naaralan min say panagpasaksak na dala so mabetbet a mangiyaalis na saray sakit, nagkalalo la ed hepatitis,” kuan nen Sharon Vernon, direktor ed Center for Bloodless Medicine and Surgery diad St. Vincent Charity Hospital ed Cleveland. Intuloy to: “Anggan sano say dala so agmangiyalis na inpeksyon et nasebelan to so responde na immune system na pasyente.” Anggaman say pakaalisan na AIDS so abawasan diad panagsuri ed dala, siansian walay dakel a sakit ya agnaimano ed ontan iran panagsuri. Tan anggaman ed pankaukolan parad babaleg a preparasyon, napapaneknekan a say anggapoy-dala a panag-opera so agmagastos parad saray ospital, unong ta eekalen na satan so legal iran problema a nayarin manresulta sano say pasyente so akaawat na marutak a dala.
Parad Tastasi nen Jehova, wala so nagkalalon importantin rason ed pangipulisay a pangawat na dala: Isesebel itan na ganggan na Dios. (Gawa 15:29) Siansia, kaliktan da so makaawat na sankaabigan a medikal a panagtambal no nayari. Kanian, mikokoopera ira ed saray doktor a mangidadaulo ed saray panag-research ed anggapoy-dala a medikal a panagtambal. Say ontan so mangugungguna aliwa lambengat ed Tastasi nen Jehova noagta ontan met ed dakel nin arum a mapaga nipaakar ed saray kapeligroan na panagpasaksak na dala.
[Paimano ed leksab]
a Nengnengen iray paway na Awake! a Nobyembre 22, 1993, pahina 24-7, tan Enero 22, 1996, pahina 31.
[Picture Credit Line ed pahina 32]
WHO Litrato nen P. Almasy