Manalwar ed Pan-inap

SAKEY a prominentin ebanghelista ed telebisyon so parungtalan a nanmodmora’d pikakalugoran na kaparan managkalar. Balet, agni ataonan et nalmoay mangaakusan ebanghelista a kaibay sakey a paabang a bii.

Diad sananey a kaso, angibaki na saray manangilaman so manunan pakayari ed mundo pian pankakareenen so manbabakal a grupo. Kaleganan to, satan met lamlamang a nasyon so maamot ya angibaki’d saray managtagilako toy armas ed saray nasyon ed biek-taew pian lakoay mankantidad na binilyon dolyares iran armas.

Lapud kinmasmak lay butar-butar a pansimpisimpitan, pankelawan ta ni so insandi lay panduaruwa ed panagmatalek? Parad dakel, say panduaruwa ed motibo na arum so niyugali la.

Bilang Kristianos, nepeg tayoy manalwar ed ontan iran awawey a makaapekta’d siglaotan tayo ed matoor iran kapananisiaan. Anggaman pinaseseg itayo nen Jesu-Kristo a magmaliw a ‘mankalkalakal [malikas, NW] a singa saray uleg’ legan a walad leet na kakabusol, agto imbagan pansuspetsaan tayo iray tuan patumbok to. (Mateo 10:16) Kanian, anto sirin iray kapeligroan na pan-inap ed arum? Diad antoran pamaakaran so nepeg a nagkalalo lan panalwaran tayo pian napaliisay ontan ya ikikiling? Tan panon tayon naprotektaay mablin siglaotan tayo ed kaparan Kristianos?

Leksion Manlapud Apalabas

Say pan-inap ed arum so singa la ra huhusgaan. Singa itayo la manguhusga ed saray salita tan gawa ra bilang akintapew lambengat a panangiyamot ed bengatlan makapalikdo tan mauges. Mabetbet a say peteg a problema et say lingon panmoria ed saray pamaakaran, a singa nanengneng ed salaysay na Biblia a naromog ed Josue kapitulo 22.

Akubkob la na saray Israelita so Insipan a Dalin tan kapkapangawat da ed saray teritorya na tribu ra. Saray tribu na Ruben tan Gad tan kapalduan tribu na Manases so angipaalagey na altar a “baleg so nengneng to” diad arap na Ilog Jordan. Sililingon impasen na arum a tribu a saya et gaway panag-apostasya. Inisip dan usaren na taloran tribu iyan baleg a paalagey parad bagat imbes ya onlara’d tolda na doypo ed Shiloh, say aturon pasen a pandayewan. Tamtampol ya angisagana iray mangaakusan tribu pian onlusob.​—Josue 22:10-12.

Marakep ta sikaray akitalosan ni ed Israelitan agagi ra diad impangibaki’d opisyal a manangilaman ya indaulo nen Phinehas. Diad impakadngel da’d panamakasalanan na ag-inkamatoor, rebelyon, tan panag-apostasya a sumpa’d si Jehova, impaliwawa na naoopendi iran tribu no akin a wala iyan baleg ya altar. Imbes ya altar a panagbagatan, saya et “sikato naani so tasi” ed pankakasakey na saray tribu na Israel diad pandadayew ed si Jehova. (Josue 22:26, 27) Maliket a sinmempet iray manangilaman ya ag-abaloan iray agagi ra. Asigpay dia sirin so bakal a sibil tan pirmin panagpaagos-na-dala.

Agaylan leksion ed sikatayo ya agtampol pan-iinapay arum! Mabetbet a say naiimano ed akinpaway lambengat so duman tuloy ed maalwar a panangusisa. Tua iya ed dakel ya aspeto’d bilay na sakey a Kristiano.

Say Panmoria Tayo’d Mamatatken

Diad panusumpal da’d responsabilidad da a ‘pastolan so kongregasyon na Dios,’ panapanaon et kaukolan a konsehoan na mamatatken so nanduruman indibidual ed loob na kongregasyon. (Gawa 20:28) Singa bilang, panon so ikiwas tayo no mitongtong ed sikatayo so sakey a matatken nipaakar ed ananak tayo ya asunto’d mauges a pipiulop odino agmanepeg a kondukta ed sakey ya agkasekso? Ipasen tayo ta’n sikatoy walaay niamot a motibo tan ikuan tayo, ‘Agto kamin balot labay bilang pamilya’? No paimpluensyaan itayo ed ontan a liknaan, panbabawian tayo lamlamang itan ed saginonor. Napepeligro la so espiritual a pankaabiganan na ananak tayo, tan kaukolan tayon apresyaen so makatulong a konseho ed Kasulatan.​—Uliran 12:15.

Sano konsehoan itayo na matatken ed kongregasyon, agtayo nenengnengey akindalem a motibo. Imbes, usisaen tayoy inkasikatayo no nagunggunaan itayo ed nibase’d-Biblian konseho to. Oniay insulat nen apostol Pablo: “Tua ya anggapo so pananusa natan a singa sengeg na liket, noag ingen kaermenan; balet kayari to mangiter na bunga a mareen na katunongan ed saray nailuam la lapu ed sikato.” (Hebreos 12:11) Kanian pisalamatan tan tekep na gagalan umamengen tayoray pamaakaran. Tandaan ya aglawas mainomay parad mamatatken so pangonseho ed sikatayo a singa panangawat tayo met ed satan.

Saray Liknaan ed Atateng

Sano nipaarap ed pigaran panameget na ateng, panduaruwaan na arum a kalangweran iray motibo na atateng da. Nayarin ikuan na arum a tobonbalo: ‘Akin a gagawaen na atateng ko iray dakerakel a totontonen? Maseguron agda labay a panggayagaan koy bilay.’ Balet, imbes ya ibagay ontan, kaukolan ya analisaen na mamalangwer so situasyon tekep na gagala.

Dakel lan taon so pangaasikaso na atateng ed ananak da. Agawa iya ed baleg a panagsakripisyo’d materyal tan arum ni. Wala ta ni so rason pian ibagan determinado ira la natan a panermenen so bilay na tinedyer lan ananak da? Agta mas resonablin isipen ya aro so manadagdag ed atateng pian protektaan daray anak da tan asikasoen ira? Agta satan met ya aro so mamapakiwas ed sikaran manggaway pigaran panameget ed saray anak da, ya onaarap la natan ed balo iran angat ed bilay? Alay karuksaan tan inkaandi otang a linawa so pan-inap ed maaron atateng!​—Efeso 6:1-3.

Say Awawey Tayo ed Kaparan Kristianos

Niyugali na dakel so panhusga ed arum tan pangiyaliling ed sikara. Anto no walaan itayo na ontan ya awawey tan singa tayo la masuspetsa’d arum a totoo? Kasin naimpluensyaan itayo la na mundo ed sayan pamaakaran?

Alimbawa, no bilbilang ta walaan na marakep ya abung tan mablin luluganan so sakey ed espiritual ya agagi tayo. Tampol la kasin ibaga tayon sikato et materyalistiko ya agto iyuuna ed bilay to so intereses na Panarian? Arum a Kristiano so makasarag ed maabig iran bengatla, balet agto labay ya ibagan walaan iray mauges a motibo odino agda ‘aanapen nin unona so panarian.’ Anganko ta okupado iran tuloy ed espiritual iran aktibidad, a mabunbunlok a manguusar ed materyal a kaykayarian da diad kiyalibansa na intereses na Panarian, balet ta diad agmapalaway a dalan.​—Mateo 6:1-4, 33.

Say inmunan-siglo a Kristianon kongregasyon so tugyopen na totoo ed amin a nengneng​—mayaman tan mairap. (Gawa 17:34; 1 Timoteo 2:3, 4; 6:17; Santiago 2:5) Say Dios so ag-onnenengneng base’d pinansyal a kipapasen na totoo, tan ontan tayo met komon. Kaukolan tayon aroen iray asubok tan matoor a kapananisiaan (tayo), “ya anggapo so gawaen mo ed walay lalabien.”​—1 Timoteo 5:21.

Diad sayan mundon mandokdokol ed pakayari nen Satanas, say panangiyaliling tan panagsuspetsa so nipapatnag ed nanduruman dalan. Alimbawa, nayarin moriaen so sakey a too bilang marawal odino materyalistiko lapu lambengat ed abenegan to. Balet, bilang Kristiano, agtayo pabibiktima ed ontan iran awawey. Anggapoy inkaapag-apag tan panagsuspetsa ed muyongan nen Jehova. Nepeg ya aligen na amin a tuan Kristiano si Jehova a Dios, ya “anggapo so inkauges . . . nisay panangitalonggaring ed saray totoo.”​—2 Awaran 19:7; Gawa 10:34, 35.

Onkiwas ed Aro

Malinew ya ibabagay Kasulatan ya “amin nankasalanan tan makulang ira ed gloria na Dios.” (Roma 3:23) Kanian kaukolan tayon moriaen iray kaparan managdayew bilang akikasakey ed sikatayo ed panggugunaet a mangisaklang na naabobonan a serbisyo’d si Jehova. No abuloyan tayo so panagsuspetsa odino arum nin nigatibon liknaan a mangapekta ed siglaotan tayo’d espiritual ya agagi tayo, manpikasi tayo ed tulong na Dios a nalabanan so ontan ya awawey ta pian agtayo napatitan nen Satanas. (Mateo 6:13) Kinombinsi to si Eva a si Jehova et walaay mauges iran motibo, ya agto iimanoen so pankaabiganan to, tan mangikikibot ed saray kawayangan a peteg a mamaliket ed sikato. (Genesis 3:1-5) Say pan-inap tayo’d saray agagi tayo so onkana ed saray gagala to.​—2 Corinto 2:11; 1 Pedro 5:8.

No nalilikas tayon walaan tayoy tendensyan man-inap ed arum, konsideraen so alimbawa nen Jesu-Kristo. Anggaman sikatoy ayadyarin Anak na Dios, agto aanapey mauges iran motibo ed babangatan to. Imbes, say aanapen to et say walan maabig ed sikara. Sanen pansasamsaman na babangatan to so posisyon na inkapromininti, agto impasen a sikaray walaan na mauges a motibo tan salatan tora na 12 balon apostol. (Marcos 9:34, 35) Lapud ag-inkayadyari, anggan panon et naimpluensyaan ira ed kultora na apostatan Judaismo, tekep na panangidanet ed kinon tan panangibiig. Amta nen Jesus a say manunan motibasyon na papatumbok to et say aro ed si Jehova. Diad panangiwandag ed ontan ya aro tan diad inkamatoor ed si Jesus, sikaray mayamyaman ya atumangan.​—Lucas 22:28-30.

No masuspetsa itayon onnengneng ed saray matoor a kapananisiaan tayo, kuanmono itayo nenengnengen iray bengatla diad aburagas a salming (lens). Agnanengneng iray bengatla diad inkapeteg. Onnengneng itayo sirin diad salming na aro. Daakan so ebidensyan inararo itayo na kaparan matoor a Kristianos tan sirin et makanepegan ed maabig a konsiderasyon tayo. (1 Corinto 13:4-8) Kanian ipanengneng tayo komon so panangaro tan paliisay pan-inap.

[Litrato ed pahina 26]

Panon mon moriaey arum a sitotoor a mandadayew ed Dios?

[Litrato ed pahina 27]

Pankakasakeyen na talek tan respeto iray Tastasi nen Jehova bilang maliket a pamilya