‘Sinaliw Day Katuaan!’

“Saliwen mo so tua, tan sikato so agmo ilako.” (Uliran 23:23) Ontan so impaseseg na makabat a lakin si Solomon. Bangta nibaga iya nipaakar ed katuaan diad inkalapagan, nagkalalo lan ontan no nipaakar ed katuaan a naromog ed Salita na Dios, say Biblia. Say ontan a katuaan so makapangitonton ed magnayon a bilay! (Juan 17:3, 17) Balet, imanoen a say pakagamor na ontan a katuaan et kaukolan toy sagpot. Nepeg a mabulos so sakey a ‘manaliw’ ed satan, salanti, isakripisyo odino isukoy sakey a bengatla ta pian nagamoran itan. (Ikompara so Mateo 13:45, 46.) Diad inkalapagan, agmabulos iray totoo a manggawa ed satan. Balet diad dakel a daldalin, ondarakel so makpel ya indibidual a manasaliw ed katuaay Biblia​—mabetbet diad baleg a personal a panagsakripisyo.

Alaen pan alimbawa iray Tastasi nen Jehova ed Sagur a bansay Aprika a Ghana. Nen Hunyo na 1989, walay masulok a 34,000 totoo ed satan a dalin ya angabrasa ed katuaan na Biblia tan aktibon manginanabang ed arum. Insan nipaakseb iray legal a panameget ed mapublikon panagpulong. Anggaman kuan, saray matuan-impanpuso so nantultuloy a ‘mangaliw na katuaan’​—anggaman walaay babeng lapud ley. Anampot nen Oktubre 31, 1991 so panameget, tan diad kapegleyan na 1995, talora tan kapalduan taon labat kayari impangekal ed saraman a panameget, say bilang na aktibon Tastasi nen Jehova ed Ghana so dinmaak anggad 46,104! Tan diad sayan taon say bilang et asabi toy masulok a 52,800.

Antoy akasagyatan na totoo ed katuaan na Salitay Dios? Antoran sakripisyo so kaukolan a gawaen na arum pian ‘saliwen so katuaan’? Bilang ebat, imanoen tayoray eksperiensia na taloran Kristianon taga-Ghana.

Asagyat ed Saray Bangat na Biblia

Konsideraen tayon unona so sakey a biin mantaon na masudsulok labat nin 20. Say ama to et sakey a pastor, ingen, pinili ton taynanan so relihyon nen ama to. Say rason? Lapud panangaro to’d katuaan.

Aminsan et impaliwawa to: “Dati lan oonla iray Tastasi ed abung mi legan a mankakabkaabungan ira. Kayari pigaran impitongtong ed sikara, amoriak a say ibabangat da et niletneg a maong ed Biblia. Nantetepet ak nipaakar ed teman singa say Trinidad, impiernon apuy, imortalidad na kamarerwa, tan nagkalalo la et say nipaakar ed faith healing. Panisiaan kon maong a sarayan doktrina et nanlapud Biblia. Balet ta tinulongan ak na Tastasi pian naamtaan ya aliwan ontan manaya.”​—Parad pakaamtaan ed panmoria na Biblia ed sarayan tema, ipangasin nengnengen so Marcos 13:32; Roma 6:23; Gawa 10:40; tan 1 Corinto 13:8-10.

Intuloy ni na malangwer a bii: “Anggaman ontan, sumpan maong so pamilyak, nagkalalo la ed si amak. Liknaen ton nababalang ak. Balet, amtak a say naaaralan ko manlapud Tastasi nen Jehova et katuaan. Sinalik ya ipakabisado ed amak irayan bengatla manlapud Biblia, balet ta agto ondengel. Diad tua, pinmalaloy isusumpa.

“Balet, nanpakpel ak. Amtak a say tuan pikakabat labat so mangitonton ed magnayon a bilay diad Paraiso, tan determinado ak ya ompeket ed satan. Sanen nadngelan na lokal a Tastasi iray probleman aarapen ko, simamaaron tinulongan da ak, a papasesegen tan itataryaan da ak na saray nakaukolan. Tinmulong iya’d siak a natalosan iray salita nen Jesus a naromog diad Juan 13:35: ‘Lapu ed saya amin a too nabirbiran da a sikayo ray babangatan ko, no wala so aro yo ed sakey tan sakey.’ Apaaralem so kombiksyon ko a saray Tastasi nen Jehova so mangaagamil na tuan relihyon. Saginonor, sanen naimano na atateng ko a minmaong so kabibilay ko, aliketan ira’d naiimatonan da, tan anguman so ugali ra’d siak​—ontanlan tuloy ya agano ni et impaiyaralan nen amak si kuyak ed Tastasi!”

Paneknekay Katuaan ed Sarili

‘Say panaliw na katuaan’ so sakey met ya angat ed pigaran kalangweran a pinabaleg na Tastasin atateng. Arum a tobonbalo so kinmiling ya ibaliwalay katuaan na Biblia. No agda kayarianen iratan a katuaan, onkapuy so pananisia ra, ataptapew. (Ikompara so Mateo 13:20, 21.) Si Nathaniel, sakey a taga-Ghanan laki diad lagpas a taon ton 30, so mangibabaga ed no panon ton ‘sinaliw so katuaan’ legay inkatobonbalo to.

“Imbangat ed siak na atateng ko so Biblia manlapud inkaugaw ko,” natandaan to ni. “Legay ibabaleg ko, akilkila ak ed sikara diad panagpulong, balet ta agak ni talagan nandesidin magmaliw a Tasi. Asabi panaon, amoriak a kaukolan kon usisaey Biblia ed inkasiak.

“Unona, kaukolan a nakombinse ak a say Biblia, ya aliwan dinanman nin arum a sagradon libro na relihyon, so Salitay Dios. Diad panamegley na personal a panagaral, naaralan kon satan labat so alenleneg a sagradon libro a mankarga na dakerakel a malinew iran propesiya ya asumpal a suston tuloy. Naaralan ko met a say Biblia so mankarga na dakel a sientipikon katuaan​—singa bilang, say dalin so ‘akabitin ed anggapo.’ (Job 26:7) Sarayan salita so nisulat ed nilibon taon sakbay ya akabatan na saray sientista so nipaakar ed solar system tayo. Say Dios labat so makapamuyan ed totoo a mangisulat ed ontan iran bengatla!a

“Insan, labay kon naamtaan no dinan a relihyoson organisasyon so mangibabangat tan mangaagamil na saray katuaan a nibangat ed Biblia. Ibabangat na maslak a relihyon so impiernon apuy, say Trinidad, tan say imortal a kamarerwa a makaliktar ed ipapatey. Balet sarayan doktrina so agmakabaliksan ed siak. Inrason ko: Agta sakey a marelmeng ya ama so mangitaksaw ed lima na anak to ed manlelwag a danum na kaserola bilang dusa? Panon, sirin a say maaron Dios so mangipasen ed ananak to ed mangapoy-apuy ya impierno tan abuloyan toran manirap? Balet, ibabangat na Tastasi nen Jehova a mitunosan ed saray teksto na Biblia a singa say Roma 6:23, a kuanto: ‘Say bayar na kasalanan say patey.’​—aliwan mangapoy-apuy ya impierno. Saya so makabaliksan ed siak.

“Naobserbaan ko met a kakaukolanen ed Tastasi nen Jehova ya amin a membro so manbilay ed saray estandarte na Biblia tan didispelosipen day amin ya agmagbabawin mangaagamil na kasalanan. Nisengeg ed sayan amin, nikuankon talagan walad Tastasi nen Jehova so katuaan, tan nandesisyon ak a magmaliw a sakey ed sikara. Nankimeyan koy onkualipikan nabautismoan bilang sakey a Tasi.”​—1 Corinto 5:11-13.

Iyiilustran maong na eksperiensia nen Nathaniel ya anggan saray tobonbalo a pinabaleg na Kristianon atateng so nepeg a ‘manaliw na katuaan.’ Ag-ira labat paspasaray ya onatendi ed saray miting ed kongregasyon. Singa saray kadaanan a taga-Berea, kaukolan dan ‘inagew-agew ya usisaen so Sulat, no peteg so sarayan bengatla.’ (Gawa 17:11) Saya so mankakaukolan na panaon tan sagpot, balet manresulta itan ed putel a pananisia tan kombiksyon.​—Ikompara so Efeso 3:17-19.

Pinalikdo na Palson Relihyon

Sakey a lakin taga-Ghana a manngaran na Godwin so ngalngali la man-70 sanen tinaynan toy Presbyterian Church tan sakey a Masonic Lodge. “Walaray bengatlan nagagawa ed relihyon a nalmoan kon makapuy,” kuanen Godwin. “Alimbawa, wadtan so dakel ya irangan, tan siansian nagagawa ni. No maminsan say polis so kaukolan ya onla pian mamareen tan mangayos! Agko inisip a manepeg iya parad papatumbok nen Kristo. Insan linmesay problema ed siak tan ed kaparan Presbiteryano. Sakey a publikon korte so nandengel ed kaso tan hinusgaan toy sananey a too a nankasalanan. Balet, dinapagan na ministroy relihyon iyan too tan sinali ton pabaingan ak ed arap na intiron kongregasyon! Prangkan imbagak ed sikato so opinyon ko nipaakar ed sayan pamaakaran tan pinmaway ak la ed simbaan​—ya aglan balot ompawipawil.

“Linmabas so pigaran panaon, tan dinmalaw iray Tastasi nen Jehova ed ayaman ko. Diad inmuna, dinmengel ak labat lapud agko labay ya ipulisay so totoon mangitotongtong nipaakar ed Dios. Balet naimanok ya anggano Presbiteryano ak ed loob na pigara lan dekada, dakel ni agko amta ed Biblia. Alimbawa, agkon balot naamtaan a say Biblia so mangitatarya na ilalon pambilay a maando ed Paraiso diad dalin.b Sanen ginapoan koy onatendi ed saray miting na Tastasi nen Jehova, saray walna, tan nagkalalo la ed panangawes tan panag-ayos na tobonbalo ed limog da, so nandinayewan kon maong. Saraya so totoon talagan manbibilay unong ed saray prinsipyoy Biblia!”

Siansia, kinaukolan na ‘panaliw na katuaan’ ed sikato a mansagpot pian iyarunsay kabibilay to. Onia so natandaan ni nen Godwin: “Membro ak na Masonic Lodge. Tan anggaman akabatan itan bilang inaagin muyongan ya ontutulong ed saray membro to, nginilinan koray ritual a nasasaglawiy panangusar na saray bungo tan pukepukel tan panagpikasi ed saray espiritu. Sarayan espiritu so panisiaan ya ontulong ed saraman so mitalosan ed sikara pian onaligwas ed espiritual.

“Tinmulong ed siak so panaaral ko a naamtaan a kagula nen Jehova a Dios so dinanman a pibabali ed espiritismo lapud nisilong toy sakey ed impluensia nen Satanas tan say marelmeng ya espiritu iran puersa to.c Itultuloy ko kasi pimembrok ed Masonic Lodge tekep na amin a mistisismo to, odino itundak la tan paliketen si Jehova? Pinilik so komadua. Dinederal kon amin so Freemason a garetget ko, anggan say aysing ya uusaren ko parad pimimiting ed Lodge. Naeksperiensiak so katuaan na sipan nen Jesus sanen inkuanto, ‘Say katuaan sikayo so gawaen to a bulos’! (Juan 8:32) Natan et maliketak a manginanabang ed arum ed saray bengatlan nanaaralan ko. Anggapon balot so pagbabawian ko.”

Dakel a nilibon matuan-impanpuso so manggagawa met na baleg iran panagsakripisyo ta pian ‘manaliw na katuaan.’ Singa say taloran Kristianon asingbat dia, agda nambabawian so pananguman a ginawa ra. Inikdan ira na katuaay Biblia na “maabig a pangiletnegan a niparaan ed panaon ya onsabi, pian nabembenan da so bilay, a sikato so bilay a peteg.” (1 Timoteo 6:19) Satan a ‘peteg a bilay’ tan amin niran bendision to so nakayarian mo met a magnayon no ‘saliwen moy katuaan.’

[Saray paimano ed leksab]

[Litrato ed pahina 9]

Nathaniel

[Litrato ed pahina 9]

Godwin