Asingger lay Agew nen Jehova
“Denglen yo so saya, sikayo a mamasiken, tan talinengen yo, a sikayo ya amin a manaayam ed dalin.”—JOEL 1:2.
1, 2. Lapud anton situasyon diad Juda a pinuyanan nen Jehova si Joel a mangibalikas ed mabiskeg a propesiya to?
“KAWAEN la so agew; ta asingger la so agew nen Jehova, et onsabi naani a singa kabagbag a manlapu ed Makapanyarin-amin!” Agaylan mabiskeg ya anunsio! Satan so mensahe na Dios ed totoo to ya impasabi na propeta ton si Joel.
2 Saraman a salita na Joel 1:15 so nirekord ed Juda, nayarin sanen ngalngali taon 820 K.K.P. Sinaknapan na mabunan kapukdolan so dalin. Daakan so prutas tan trigo. Saray panagpastolan so maawang tan mabirdi. Ingen, walay nagagawan mauges a tuloy. Kinmayat so panagdayew ed si Baal diad Jerusalem tan ed dalin na Juda. Saray totoo so nanbuabuanges a nandayew ed arap na sayan palson dios. (Ikompara so 2 Awaran 21:4-6, 11.) Abuloyan kasi nen Jehova a mantultuloy iyan amin?
3. Anto so amasakbayan nen Jehova, tan nisengeg ed anto so panpaparaanan na nasyones?
3 Malinew so ebat na libro na Biblia a Joel. Iyalangon nen Jehova a Dios so inkasoberano to tan pasantosen toy masanton ngaran to. Asingger lay baleg ya agew nen Jehova. Diad ontan et ipaakseb nen Jehova so panangukom to ed amin a nasyon diad “lawak na Josafat.” (Joel 3:12) Manparaan la ra sirin a mibakal ed say Makapanyarin-amin, si Jehova. Sikatayo met so onarap ed baleg ya agew nen Jehova. Kanian usisaen tayo paray mapropetikon salita nen Joel parad agew tayo tan ed apalabas.
Ilulubak na Saray Insekto
4. Kaunongan kalaknab so pagmaliwan na ebenton impasakbay nen Joel?
4 Diad panamegley na propeta to, oniay kuan nen Jehova: “Denglen yo so saya, sikayo a mamasiken, tan talinengen yo, sikayo ya amin a manaayam ed dalin. Wala ta so saya nensaman ed saray agew yo, odino ed saray agew na saray atateng yo? Ibaga yo ed saray anak yo, tan saray anak yo ibaga ra komon ed saray anak da, tan saray anak da ed sananey a kailalakan.” (Joel 1:2, 3) Saray mamasiken tan amin a totoo so makapanilalo’d bengatlan agni agawa ed panaoy impanbilay da odino ed panaon na inmuunan atateng da. Ontanlan makapataktakot a napantongtongan ni anggad komatlon kailalakan! Anto ta iyan makatantandan ebento? Pian naamtaan, iyaliling pan pinmawil itayo ed agew nen Joel.
5, 6. (a) Deskribien so salot ya impropesiya nen Joel. (b) Siopay Lapuan na satan a salot?
5 Ontalineng! Narerengel nen Joel so ungol ed arawi. Ombibilunget so tawen, tan onkakasil itan a makapataktakot ya ungol legan ya onsasaknap so bilunget ed lampas na ulo. Insan mamapaleksab so singa-asewek a lurem. Sakey ya armada na minilyon ya insekto. Tan agaylan deral so intatarok da! Natan, konsideraen pay Joel 1:4. Sarayan managlubak ya insekto so aglabat di-payak ya alis-alis a duron. Aliwan satan labat, wala niray arum! Onsasabi met so narnarasan ya ulop na kurong-kurong, anggapoy payak iran lukton. Idadagem, akasabin tampol iray duron, tan say ungol da et singa saray karwahe. (Joel 2:5) Lapud inkasiba ra, minilyon ed sikara et maples dan pinagmaliw a kalawakan so malaparaison lugar.
6 Onaabanti met iray dangew—say agni-nanpayak a kipapasey bigibigis tan kompapey. Napaltongan na angkabaleg iran armada na narasan a dangew so bulobulong na tanaman anggad saray tanaman so naparotan ed inkabuna ra. Tan dakel ed say natilak da so kanen na saray duron. Tan antokaman ya itilak na duroduron, saray maples ya asipet so seguradon mangilaos. Balet imanoen pa iya: Diad Joel kapitulo 2, bersikulo 11, impaamta na Dios so armada na duron bilang “inayuraan to.” On, sikatoy Lapuan na salot na duron a maneral ed dalin tan mangitarok na pirmin eras. Kapigan? Sakbay a tuloy na ‘agew nen Jehova.’
“Liing Kayo, Sikayon Managbuek”!
7. (a) Anto so kipapasen na saray relihyoson lider ed Juda? (b) Panon a saray lider na Kakristianoan natan so walaay kipapasen a mipara ed saray relihyoson lider na Juda?
7 Sakey ya agnapagalangan ya ulop, saray relihyoson lider na Juda so nibiig sanen nibalikas so ganggan: “Liing kayo, sikayon managbuek, tan mannangis kayo; et managugol kayo, sikayo ya amin ya omiinum na alak, lapu ed masamit ya alak; ta sikato so nisian ed sangi yo.” (Joel 1:5) On, binagaan iray espiritual a managbuek na Juda ya ‘onliing,’ pian naimasmasan. Balet ag-ipapasen a kadaanan labat iyan awaran. Natan la, sakbay na baleg ya agew nen Jehova, saray klero na Kakristianoan so diad piguratibon paraan et ontanlan napno na masamit ya alak ya agda amta iyan ganggan a manlalapud Sankatagyan. Agaylay pakabigla ra sano naimasmasan la ra ed inkabuek da diad baleg tan makapataktakot ya agew nen Jehova!
8, 9. (a) Panoy panedeskribe nen Joel ed saray duron tan ed epekto na salot da? (b) Natan, siopay irerepresinta na saray duron?
8 Imanoen pa so baleg ya armada na duron! “Ta sakey a nasyon so tinmatdang ed dalin ko, mabiskeg, tan ag-ira nabilang; saray ngipen to sikara so ngipen na sakey a leon, tan wala ed sikato so saray pangal na sakey a leon a kabatyan. Binuybuyak to so ubas ko, inubakan to so kiew ko a higos; sikato so ginawa to ya inubakan a sigpot, tan inbantak to; saray sanga to agawa ra ya amputi. Mannangis ka a singa sakey a birhin ya abalkesan na abel a magaspang a nipaakar ed asawa a laki na inkaugaw to.”—Joel 1:6-8.
9 Kasin propesiya labat iya nipaakar ed “sakey a nasyon” na duroduron, makapal a duron, ya onlulubak ed Juda? Andi, nagkalalo ni kabaliksan to nen say satan. Namparan diad Joel 1:6 tan Apocalipsis 9:7, say totoo na Dios so nirepresinta bilang duroduron. Say modernon-agew ya armada na duron et anggapoy arum noagta say puersa militar na alanaan a duroduron nen Jehova, a natan et piuulopan na ngalngalin 5,600,000 ya “arum a karnero” nen Jesus. (Juan 10:16) Agka ta maliket a kabiangan na sayan baleg a bilang na managdayew nen Jehova?
10. Antoy epekto ed Juda na salot na saray duron?
10 Diad Joel 1:9-12, nabasa tayoray epekto na salot na duron. Sigpot ya apankibalatar so dalin lapud nantutumbokan ya ulop. Saray agmatoor a saserdote so agla makapanserbi lapud anggapo lay trigo, alak, tan larak. Pati say dalin managugol, lapud dineral na saray duron so trigo, tan naupot so bunga na kakiewan. Lapud aderal iray wakal na ubas, anggapo lay alak parad saramay managbuanges nen Baal ya abuanges met ed espiritual.
“Maney-ey Kayo, Sikayo a Saserdote”
11, 12. (a) Sioparay mangibabagan sikara kunoy saserdote na Dios natan? (b) Panon a naaapektoan iray relihyoson lider na Kakristianoan na say modernon-agew a salot na duron?
11 Talinengen pay mensahe na Dios ed saramay bangar a saserdote: “Manbalkes kayo na abel a magaspang, tan maney-ey kayo, sikayo a saserdote; managugol kayo, sikayo a mankatangbayan ed altar.” (Joel 1:13) Diad inmunan kasumpalan na propesiya nen Joel, nanlingkor iray Levitikon saserdote diad altar. Komusta balet ed pinal a kasumpalan to? Natan, saray klero na Kakristianoan so angala’d autoridad a manlingkor ed altar na Dios, a mangibabagan ministros tora kuno, ‘saserdotes’ to. Balet, antoy nagagawa natan ta onaabanti lay modernon-agew iran duron na Dios?
12 Sano nanengneng na ‘saserdotes’ na Kakristianoan iray totoo nen Jehova ya onkiwas la tan sano narengel day panangipasakbay da’d madibinon panangukom, sikaray nataranta. Tabyogen daray pagew da’d paningongot tan sanok lapud makaderal ya epekto na mensahe Panarian. Tan sikaray managugol lapud tataynanan lara na saray pulok da. Lapud saray panagpastolan da et napaparotan, manpuyat iran akakawes na magasal ya abel, a panagugolay impakalugi ra. Agmanbayag et naandi met iray trabaho ra! Diad tua, ibabaga ed sikara na Dios a sanlabin managugol lapud asingger lay anggaan da.
13. Kasin say Kakristianoan bilang intiraminti et paborablin onkiwas unong ed pasakbay nen Jehova?
13 Unong ed Joel 1:14, say ilalo ra labat so mandedependi’d panpataoli tan ikekerew ‘ed si Jehova parad tulong.’ Kasin nailaloan tayoy intiron klero a klase na Kakristianoan ya ompawil ed si Jehova? Siempre andi! Nayarin walaray indibidual ed limog da so onkiwas unong ed pasakbay nen Jehova. Balet say espiritual a kaeerasan na sarayan relihyoson lider pati saray membro ra bilang sakey a klase so mantultuloy. Oniay impasakbay nen propeta Amos: “‘Nia, onsabi ray agew,’ kuan nen Katawan a Jehova, ‘a payakar ko naani so eras ed dalin, aliwa ya eras ed tinapay, odino pega ed danum, noag ingen pandengel ed saray salita nen Jehova.’” (Amos 8:11) Diad biek a dapag, alay pisasalamat tayo lapud mayaman ya espiritual a piesta a simamaaron itatarya na Dios diad panamegley na “matoor tan makabat ya aripen”!—Mateo 24:45-47.
14. Antoy ipapaniring na salot na duron?
14 Say salot na duron et mangipapaniring na sakey a bengatla. Na anto? Malinlinew ya ibabaga ed sikatayo nen Joel, a kuanto: “Kawaen la so agew; ta asingger la so agew nen Jehova, et onsabi naani a singa kabagbag a manlapu ed Makapanyarin-amin!” (Joel 1:15) Say sankamundoan ya ilulubak na armadan duron na Dios natan so malinlinew a mangipapatnag a say baleg tan makapataktakot ya agew nen Jehova et asingger la. Segurado, panpipirawatan na amin a maptek-impanpuso itan ya espisyal ya agew na pikuekuentaan sano nipaakseb lay madibinon panangukom sumpad saray marelmeng tan manbiktorya la’d satan si Jehova bilang Sankatalbaan a Soberano.
15. Nisesengeg ed nankibalatar a kipapasey dalin, antoy reaksion na saramay tinmalineng ed madibino iran pasakbay?
15 Singa ipapanengneng na Joel 1:16-20, naupot so tagano dima’d kadaanan a Juda. Pati met lay inkagayaga. Saray kamarin so nankibalatar, tan kapilitan ya igeba iray kamalir. Anggapo lay napanpastolan lapud pinarotan na saray duron so tanamanan, nanteyengteyeng iray baka tan saray ulop na karnero so inaatey. Agaylan kalamidad! Diad utel na saratan a situasyon, komusta si Joel? Unong ed bersikulo 19, inkuanto: “O Jehova, dia ed sika mantagleey ak.” Natan met, dakel so ontatalineng ed madibino iran pasakbay tan onkekelyaw ed si Jehova a Dios diad pananisia.
“Say Agew nen Jehova Onsabi”
16. Akin a “saray amin a manaayam ed dalin” et nataranta?
16 Talinengen pa iyan ganggan a manlalapud Dios: “Paknolen yo so tambuyog dia ed Sion, paknolen yo so sakey a panliing dia ed masanto a palandey ko; onmayegmeg komon so saray amin a manaayam ed dalin.” (Joel 2:1) Akin ya ontan so reaksion da? Oneebat so propesiya: “Ta say agew nen Jehova onsabi, ta wala ed asingger la! Sakey ya agew na udiem tan kabilungetan, sakey ya agew na saray lurem tan makapal a bilunget, a singa say panbalatabat ya onkayat ed tapew na saray palandey.” (Joel 2:1, 2) Walay peteg ya inkaganatan a misiglaotan ed baleg ya agew nen Jehova.
17. Panon ya inapektoan na salot na duron so dalin tan say totoo ed Juda?
17 Isipen pay epekto na pasingawey na propeta no panon a pinagmaliw na saray matewet a duron so peteg a hardin na Eden a nankibalatar a basura. Talinengey deskripsion ed armada na duron: “Say nengneng da singa nengneng na saray kabayo; tan singa totoo a mangabkabayo, ontan so pambabtik da. Singa say ungol na saray luganan ed saray tapew na palpalandey ontan so pankogtot da; singa say danoldol na sakey a dalang na apuy a mangakmon na dayami, singa sakey a mabayani a baley a nauksoy nipaakar ed bakal. Dia ed arap da, saray balbaley wala ra ed kairapan; saray amin a lupa omposisaw ira.” (Joel 2:4-6) Legay salot na duron ed agew nen Joel, lalon naermenan iray managdayew nen Baal, tan say biglan kapagaan so napatnagan ed kalupaan da.
18, 19 Panon a say kimey na totoo na Dios natan et singa salot na duron?
18 Anggapoy makapatunda ed nantatalontonan, agnakekesawan iran duron. Sikaray manbabtik “a singa mabaybayani a lalaki” tan kinalab da ni ingen iray bakor. No ‘arum ed sikara naplag ed saray kampilan, et agnabuyak so inkadasig da.’ (Joel 2:7, 8) Agaylan mabilabilay a mapropetikon panangilitrato ed peles ya armada na Dios a piguratibo iran duron! Natan met et diritson onaabanti so armaday duron nen Jehova. Anggapoy “bakor” na isusumpa so makaamper ed sikara. Agda ikompromiso so integridad da ed Dios noagta mabulos iran onarap ed ipapatey, a singa ginawa na nilibon Tastasi a ‘naplag ed saray kampilan’ lapud ag-ira nansaludo ed si Hitler legay uley na Nazi ed Alemanya.
19 Say armadan duron na Dios natan so sigpot ya akapantasi la ed “syudad” na Kakristianoan. (Joel 2:9) Ontan so gagawaen da ed sankamundoan. Sikaray siansia nin mangakalab ed amin a babeng, onloloob ed minilyon a kaabungan, aasingeray totoo ed saray lansangan, kakatongtongen ira diad panamegley na telepono, tan pitotongtongan ira ed antokaman a posiblin dalan legan ya iyaabawag day mensahe nen Jehova. On, sikaray akapangibunog la na binilyon a palapagan na Biblia tan mangibunog ni na dakel, dakel ni diad tuloytuloy a panagministro ra—namparan diad publiko tan ed kabkaabungan.—Gawa 20:20, 21.
20. Siopay manusuporta ed modernon-agew iran duron, tan tekep na antoran resulta?
20 Ipapanengneng na Joel 2:10 a say makapal a duroduron so singa lurem a makasanib ed banwa, bulan, tan bibitewen. (Ikompara so Isaias 60:8.) Wala ta ni panduaruwa no siopay walad benegan na sayan puersa militar? Diad tagey na ungol na saray duron, narengel tayo irayan salita na Joel 2:11: “Si Jehova ibesngaw to so bosis to ed arap na inayuraan to; ta say pakalso to sankabalgan; ta sikato mabiskeg a manumpal na salita to; ta say agew nen Jehova sikato so baleg tan makapataktakot a tuloy; et siopa so makakpel?” On, ibabaki nen Jehova a Dios so puersa militar iran duron to natan—sakbay na baleg ya agew to.
‘Agbayagen nen Jehova’
21. Antoy resulta sano “say agew nen Jehova so onsabi a singa matakew”?
21 Singa si Joel, sinalita nen apostol Pedro so nipaakar ed baleg ya agew nen Jehova. Insulat to: “Say agew na Katawan [nen Jehova, NW] onsabi a singa matakew; a dia ed satan saray tawen mangangga ra a pati baleg ya ungol, tan say elementos natunaw ed manliob a petang, tan say dalin tan saray gawa a wala ed sikato napoolan ira.” (2 Pedro 3:10) Diad silong na impluensia nen Satanas a Diablo, say marelmeng a ginogobiernon “saray tawen” so manguuley ed “dalin,” salanti, katooan a nisian ed Dios. (Efeso 6:12; 1 Juan 5:19) Sarayan simbolikon katawenan tan dalin so agmakaliktar ed petang na madibinon sanok legay baleg ya agew nen Jehova. Imbes, sikaray salatan na ‘balon katawenan tan sakey a balon dalin ya aalagden tayo unong ed sipan to, tan ditan so panayaman na inkatunong.’—2 Pedro 3:13.
22, 23. (a) Panoy reaksion tayo ed mapangasin anos ya ipapanengneng nen Jehova? (b) Panoy reaksion tayo ed kinaasingger na agew nen Jehova?
22 Diad intiron kaplesan iran pakasbelan tan subsubok ed pananisia, nayarin naibaliwala tayo so inkaganatan na panaon tayo. Balet legan ya onaabanti so simboliko iran duron, dakel a totoo so onkikiwas unong ed mensahe na Panarian. Anggaman angiyabuloy la so Dios na panaon parad saya, agtayo komon ikuan ya inkatantan so inkaanos to. “Say Katawan [si Jehova, NW] agto bayagen so sipan to, a singa say arum igaton da a mabayag; noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.”—2 Pedro 3:9.
23 Bangta tatalaranan tayo so baleg ya agew nen Jehova, ipapuso tayoray salita nen Pedro a nirekord ed 2 Pedro 3:11, 12: “Diad inengneng a saraya ya amin a bengatla naderal ira naani, anton nengneng na inkatoo so nepeg yon pagmaliwan ed amin a masantos a panagbilay tan kasimpitan. Dia ed panalagar tan panpilalek yo ed isabi agew na Dios, a sikato so katunaw na saray tawen dia ed idalang da, tan saray elementos natunaw ed manliob a petang!” Peteg ya ilalaktip na sarayan kiwas tan gawa a mibansag itayo ed armadan duron nen Jehova diad tuloytuloy tan makabaliksan a pibibiang ed panangipulong na maong a balita na Panarian sakbay ya onsabi anggaan.—Marcos 13:10.
24, 25. (a) Panoy ikiwas mo ed pribilihyon pibiang ed kimey na armadan duron nen Jehova? (b) Anton makabaliksan a tepet so pinawala nen Joel?
24 Say armadan duron na Dios so ag-ontunda’d kimey to anggad kidapoy baleg tan makapataktakot ya agew nen Jehova. Say mismon kiwawala na sayan agnapatundan puersay duron so makatantandan prueba ya asingger lay agew nen Jehova. Agkayo ta maliket a manlingkor a kaibay alanaan iran duron na Dios tan ed kakaiba ra diad pinal ya ilusob sakbay na baleg tan makapataktakot ya agew nen Jehova?
25 Agaylan matalonggaring itan ya agew nen Jehova! Agpankelawan ya apawalay tepet a: “Siopa so makakpel?” (Joel 2:11) Sayan tepet tan dakel ni so nasingbat ed ontumbok a duaran artikulo.
Kasin Nisalaysay Yo?
◻ Akin ya amasakbay si Jehova na sakey a salot na saray insekto ed Juda?
◻ Diad modernon-agew a kasumpalan na propesiya nen Joel, sioparay duron nen Jehova?
◻ Panoy reaksion na saray lider na Kakristianoan ed salot na duron, tan panon a makaliktar so arum ed sikara ed saray pansumpalan na satan?
◻ Kaunongan lay kalaknab na salot na duron legay koma-20 siglo, tan anggad kapigan itan?
[Litrato ed pahina 9]
Say insekton salot et mangipapaniring na bengatlan mas grabe
[Credit Line]
Aparotan a kiew: FAO photo/ G. Singh
[Litrato ed pahina 10]
Si Jehova a Dios so walad benegan na modernon-agew a salot na duron
[Picture Credit Line ed pahina 8]
Duron: FAO photo/G. Tortoli; makapal a duron: FAO photo/Desert Locust Survey