Saray Giyan Poste ed Dalan a Mamaarap ed Bilay

NO MANBIABIAHE ka ed agkabisadon dalan odino basbas, ipasen mo kasin makaskasbel iray giyan poste? Maseguron andi! Seguradon ipasen mo iratan bilang tulong pian ontulong ed sikan agnabalang ed rotan mamaarap ed destinasyon mo.

Balet, komusta met so nipaakar ed panagbiahe ed dalan a mamaarap ed bilay? Kasin matalonan nipakurang itan no anggapo iray giyan poste? Binidbir na sakey a kadaanan a propeta na Dios iray limitasyon na katooan ed sayan pamaakaran. Inkuanto: “Amtak, O KATAWAN, a saray dalan na too so aliwan ed dili ton panlabay; nisay parad sakey a too so panitermina ed kurang to ed bilay.”​—Jeremias 10:23, The New English Bible.

Sirin, iner so pakaromogan na nakakaukolan a panangiwanwan? Say napanmatalkan a lapuan na ontan a panangigiya et say Manamalsay too, tan saray piguratibon giyan poste so naromog ed Biblia. Si Jehova, panamegley na Salita to, kuanto: “Saray layag mo makadngel ira naani na sakey a salita ed beneg mo a kuanto: ‘Saya so dalan, ondalan kayo ed sikato,’ sano onarap kayo ed nikawanan, tan sano onarap kayo ed nikawigi.”​—Isaias 30:21.

On, say Salita na Dios so mangiiter na napanmatalkan a panangigiya ed kada aspekto na bilay tayo. (Isaias 48:17; 2 Timoteo 3:16, 17) Balet, makapaermen, karaklan ed katooan natan so mamabiahe ed dalan a mamaarap ed bilay a biig ed panangiwanwan na Dios. (Mateo 7:13) Anggaman kuan, saray giyan poste so malet a niletneg tan wala! Kasin talinengen mo iratan leleg a manaakar ka ed dalan a mamaarap ed bilay?