Say Mabungan Dalin na Saray Venda

DIAD loob na apalabas a samploy taon, nankimey kami nen akulaw ko bilang sigpot-panaon ya ebanghelisador ed limog na saray taga-Venda. Saray Venda so manaayam ed abalaten na Limpopo River diad amianen na Abalaten ya Aprika, tan say nasyon da so tugyopen na pigaran tribu a ninmatnat ed Limpopo legan na apalabas iran siglo. Walaray Venda a mankuan a nampirmi iray inmuunan atateng da ditan, masulok a 1,000 taon lay apalabas.

On, sayan rehyon so datin kabiangan na kadaanan a sibilisasyon a tinawag a Mapungubwe Kingdom. Say inmunan baleg ya impanpirmi na Abalaten ya Aprika, tan angontrol ed maawang a lawak na Limpopo River, manlapud Botswana diad sagur anggad Mozambique diad bukig. Manlapud ngalngalin 900 K.P. anggad 1100 K.P., sinuplayan na Mapungubwe iray negosyanten Arabo na garing, saklor na rhino, katakatat na ayep, gansa, tan balitok ni ingen. Saray marakerakep a kinurtin kagawaan ya intubog ed balitok so akotkot diad sakey a maarin pukdol a ponponan a tinawag a Mapungubwe. Kaiba iraya ed “sankasakbayan iran pakapatnagan na panagminasay balitok diad mamaabalaten ya Aprika,” so isusuheri na sakey ya encyclopedia.

Agla manmiminas na balitok dia. Natan, say dalin na saray Venda so bantog lapud inkamabunga to. Diad abalaten na Soutpansberg Mountains so pasen na mabunan lawak, a pinasya iray prutas a singa saray abokado, ponti, mangga, tan bayawas. Likud ed saray kastanyas a singa say pecan tan macadamia, daakan met iray pising. Laktipen na saraya so balang a muroho, a singa taway na spinach tan labalabay na saray taga-diman.

Saray Venda so mareen tan maparawes a nasyon. Kaslakan la parad ulo na sankaabungan a mamalutoy manok parad ag-inilaloan a sankaili. Saya so ipapangan ed vhuswa, say manunan tagano, a gawa’d mais. Kayari na imbisita, ipatnubang na ulo na sankaabungan so sankaili to. Saya so kaugalian a panangipanengneng na respeto ed bisita. Saray ananak so abangatan a mangibano ed saray bisita diad magalang a paraan diad iyuko tan pangikaplas ed sakey a lima ed biek a lima. Diad sayan pahina et nanengneng moray duaran Venda a bibii a manbabanoan diad kustombrin paraan.

Sakey a Mairap a Lenguahe

Say lenguahen Venda so agnakalakalan nakabisado na totoon nanlapud Europa. Say sakey a paniirapan et dakel so salitan parehoy espiling balet ta nandurumay panangibalikas. Sakey ya agew legan a mangiiter na paliwawa ed Biblia diad sakey a Venda a kongregasyon na Tastasi nen Jehova, panggugunaetan kon pasesegen iray ondedengel a mitongtong ed kada too. Sakey ed saray ondedengel so manel-elek ta say nibagak et “kada gamet” imbes a “kada too.”

Sanen pilimeron sinalik so mansalitay Venda diad panpupulong, inyebat na sakey a marikit a Venda: “Agak makapansalitay Ingles.” Say amtak et natalosan lay impansalitak na Venda, balet ta say amta to et Ingles iman! Diad pamapaarap ko ed sakey ya abung ed sananey ya inkagawa, patatawag ko ed sakey a kalangweran so ulo na pamilya. Say salitan Venda parad ulo na pamilya et thoʹho. Balet ta say nibagak et thohoʹ, kanian say kekerewen kon napitongtongan et say bakes ed abung! Saray lingon singa onia so akadismayaan ko, balet lapud inkaanos min sanasawa et makapitongtong kami met lan maong natan na Venda.

Espiritual Iran Bunga

Say dalin na saray Venda so tuan mabunga ed espiritual a dalan. Diad dekada na 1950, sakey a kongregasyon na Tastasi nen Jehova so aporma ed limog na saray sinmakda a nanlalapud kabangibang iran bansa pian mantrabaho ed panagminasay gansa diad baley na Messina. Say maseseg ya aktibidad da so angiparungtal ed katuaan na Biblia ed dakel a Venda. Kalabas na sakey a dekada et sakey a grupo na Tastasin Venda so manaaral la ed sakey a pribadon abung diad baley na Sibasa.

Pian napapeles so idaraak, say sanga na Watch Tower Society ed Abalaten ya Aprika so angibaki na sigpot-panaon iran ebanghelisador ed sayan mabungan lawak. Ag-abayag say grupoy Sibasa so binmulaslas a nagmaliw a baleg a kongregasyon. Saray Kristianon miting so gagawaen ed sakey a kuartoy eskuelaan diad saman a panaon. Balet, diad tulong na Tastasi nen Jehova ed baley na Pietersburg, manga 160 kilometro ed mamaabalaten et nipaalagey so sakey a Kingdom Hall diad Thohoyandou, sakey a baley ed asingger.

Saray mansasalitay Venda ed amianen na Abalaten ya Aprika so manbilang na masulok a 500,000. Anggapo diman so Tastasin Venda sanen nigapo so panangipulong ed Panarian nen dekaday 1950. Natan et wala lay masulok a 150. Balet dakel niray ag-akimeyan a lugar tan baleg ni kimey a gawaen. Nen 1989 nila mi so baryo na Venda a tatawagey Hamutsha. Saksakey a Tasi so tagad’man diad saman a panaon. Natan et masulok lan 40 so manangiyabawag na Panarian a manaayam ed saman a baryo. Okupado kamin mangisusumpal ed Kingdom Hall mi, salamat lamet ed tulong na saray Tastasin nanlalapud saray kongregasyon ed Pietersburg ontan met ed pinansyal iran kontribusyon na agagi diad mas mayaman a daldalin.

Manaayam kami ed sakey a caravan (melag a trailer) diad sakey ya uma. Lapud pansiasiansiaen min simpli so bilay mi, walaan kami na mas malaem a panaon a nasabi iray totoo diman tekep na maong a balita. (Marcos 13:10) Bilang resulta, sikami mayamyaman ya abendisionan na pribilihyon ontulong ed dakel a mangidedikay bilay da ed si Jehova a Dios. Sakey ya alimbawa et say lakin manngaran na Michael, ya akaimano ed libron Makapambilay Kayo na Ando lan Ando ed Paraiso diad Dalin ed abung na kaaro to.a Binasa to itan tan amoria ton tampol so katuaan. Kanian sikatoy nansulat ed Watch Tower Society parad kaaruman nin literatura na Biblia. Diad sulat to et insalaysay nen Michael ya aganggano nin abinyagan bilang sakey a membro na Apostolikon relihyon ed lugar da. “Naamtaan ko,” intuloy to, “a wala ak ed lingon dalan pian mamaarap ed Panarian na Dios. Denisidik so pimembro ed sikayo, balet agko amtay gawaen ko.” Insan to inter so address to tan kinerew ton walay ibakin sakey ed Tastasi nen Jehova pian ontulong ed sikato. Aromog koy kawalaan nen Michael tan inyaralan ko na Biblia. Natan et sakey lan bautismadon Tasi tan matoor a manlilingkor ed si Jehova.

Nen Disyembre 1997, inmatendi kami ed “Pananisia ed Salitay Dios” a Distriton Kombension na Tastasi nen Jehova ya agawa ed sakey ya sport stadium diad Thohoyandou. Walay inmatendin 634, tan 12 balon abautismoan. Apribilihyoan ak a mangiter na duaran paliwawan Venda. Talagan sakey itan ya importantin agawa ed magayagan san-dekadan inusar mi diad sayan mabungan dalin!​—Innabang.

[Paimano ed leksab]