Nanggayaga so Sakey ya Isla Lapud Maawaran ya Imbisita

Cuba, sakey ya islan marakdakep diad Caribbean et agano nin akaeksperiensia na agnaparaan a tiempo na espiritual ya impakarepreskoan. Nitarok ed pansampot la na 1998 so abayag ya inalagar a bendision parad Tastasi nen Jehova a manaayam ed sayan bansan West Indian. Diad unonan pankanawnawa ed masulok a 30 taon, binmisita iray membro na Mananguley ya Ulop na Tastasi nen Jehova tan sikaray inulop na 15 ya arum nin delegado. Saray bisita et mibabaley na Australia, Austria, Belgium, Great Britain, Italya, New Zealand, tan Puerto Rico.

SAYA so maawaran ya ebento parad saray 82,258 a manangipalapag na Panarian diman tan ed 87,890 ya akibiang ed sikara a nanselebra ed Pangdem na Katawan diad subol na 1998.

Manlapud Disyembre 1 ya anggad 7, 1998, sikara di Lloyd Barry, John Barr, tan Gerrit Lösch so binmisita ed Bethel Home dima’d Havana tan inatendian day pigara ed “Dalan na Dios ed Bilay” iran Distrito Kombension ya agawa ed Cuba. Nanliketan da so impitongtong ed saray managbiahen mamatatken ontan met ed impikabkabat ed opisyales na gobiernoy Cuba.

“Makapalikliket iyan kabiangay teokratikon bilay min sanasawa,” inkuan nen John Barr. “Saray pinablin agagi tayon lalaki tan bibii ed Cuba so napnapno na seseg parad katuaan! Talagan alikliknak a say sankamundoan ya impanaagi tayo so mabmablin tuloy!” “Lapud sayan makatantandan simba et lalon atalosan koy kipapasen na agagi tayo diman,” inyarum nen Lloyd Barry.

Diad apalabas a limaran taon et apagamoran la iray Tastasi nen Jehova na babaleg a kawayangan ed panagdayew diad Cuba, tan saray komento na saray autoridad ed Cuba so angitonton ed sakey a manisia a pirawat dan mantultuloy iyan nagagawa.

Nen Setyembre 1994, niletneg so panag-imprinta diad Bethel Home ed Havana. Parungtalan a makapantitipon tan makapankabkaabungan lamet iray Tastasi nen Jehova. Saginonor, nen 1998, inyabuloy na saray walad pakauley iyan ibibisita na internasyonal a delegasyon na 18 Tastasi nen Jehova, pati ed taloran membro na Mananguley ya Ulop.

Makapalikliket a Reunion

Sanen sinmabi so delegasyon ed José Martí airport ed Havana, sikaray maparawes ya inawat na saray ag-inilaloan a publikon opisyales tan sakey a grupon nanlapud Bethel Home, a sakey ed sikara so agin laki ya atandaan to ni unor ya imbisita na sakey a membro na Mananguley ya Ulop ed Cuba​—si Milton Henschel​—nen 1961. Say agin laki so 12 años labat ni ed saman; a natan et sikato lay sakey a managbiahen manangasikaso.

Kasabi na saray delegado ed Bethel Home, sikaray inabrasa diad panamegley na saray bouquet na gladyola, roses, jasmine, tan duyaw tan ambalanga iran daisy, ya intanem na sakey ya agin laki a ginagala parad sayan okasyon. Inmagus iray lua legan ya aabrasaen na pamilyan Bethel iray delegado. Saginonor, nandurungoan da so inkalot a karne-baboy a luto’d Cuba, niluto tan buke-bukel, insalada, yucca a nanlaok na mojo (sarsan gawa ed bawang tan larak ya olibo), tan kapanbudbor a prutas. Kayari panangan et kada membro na Mananguley ya Ulop so angiter na makapabiskeg a paliwawa nipaakar ed kayamanan a serbisyo’d Bethel. Saray komento nen Brother Lösch so nagkalautlan makatenyeg, legan a mansasalita ed saray agagi ed Español. Say pamilyan Bethel so tugyopen na 48 regular iran boluntaryon komikimey tan 18 temporaryon mitutulongan.

Anggaman saray libro tan Biblia so iyiimprinta ed Italya parad saray agagi ed Cuba, saray duaran kolor ya edisyon na Panag-Bantayan tan Awake! iran magasin so napapawala ed mismon bansa, diad panamegley na duaran mimeograpikon makina. Baleg a panaon tan paulit-ulit a kimey ed lima diad mainget iran kuarto so nakakaukolan pian napawalay amin a magasin a nakakaukolan. Papablien a tuloy na saray boluntaryo so kayamanan dan serbisyo ed si Jehova ed nikadkaduman dalan.​—2 Corinto 4:7.

Saray Pabitar ed Kombension

Saray 18-membron delegasyon so inapag ed taloran grupo ta pian atendian iray distrito kombension ya agawa ed taloran lugar​—Havana, Camagüey, tan Holguín. Kada sakey ed taloran agew, sakey a baleg a grupo na agagin lalaki tan bibii, pati dakel a mamatatken tan payunir, so naimbitaan ya onatendi ed kada lugar. Pinakabatan iray Tastasi diman a saya so nikadkaduman okasyon, balet ta agda amta a wala manaya iray onatendin membro na Mananguley ya Ulop. Isipen pay impakasurprisa ra sanen anengneng da irayan pinablin agagi a kaibay kaasawaan da ya oneepas ed inarkila iran bus diad kabuasay Biernes!

Agawa iray kombension ed saray anggapoy dingding a pasilidad ya impaalagey na saray agagi diad impangiyabuloy na saray autoridad. Diad impankombensionan ed Havana, niukit ed sakey ed saray bato diad lolooban so tekston “Salmo 133:1.” Angipanonot iya ed saray agagi ed saray salitan naromog ed satan a teksto: “Nengneng yo, alay kaabigan tan alay kaligliwaan na panayam na sanaagi ed inkasaksakey!” Petepeteg, legay kombension et walay maabig tan makapaliket a Kristianon pantutuyaw ed saman ya akagawaan.

Naimano na saray bisita so ekselentin inkagawa na saray paliwawa tan interbio, tan nandinayewan day inkipresenta na drama, a nibase’d istorya’d Biblia nipaakar ed Daniel kapitulo 3, a say eksena et diad kadaanan a Babilonia. Oniay komento na sakey ya agin bii: “Amin a walaay betang so marunong, tan say kibabansag na bosis so marakerakep ya agmo nalikas a nirekord la . . . Talagan aliwliway nengneng na saray mauges a taga-Babilonia, tan saray taloran Hebreo so mapekder tan determinado.”

Saray manangilaman na State Security tan say Office of Religious Affairs tan arum ya opisyal na gobierno a linma pian nengnengen iray kombension so angomenda ed saray agagi ed inkaorganisa tan ed maabig a kondukta ra. Imbalikas nen Brother Barry so masimoon ya otang a linawa parad maabig a tratamento ya innatnat na saray autoridad ed Cuba ed saray ombibisitan delegado. Inmalagey a mantitipak, mabetbet et manbayag ed pigaran minuto, imbalikas na agagi so apresasyon da ed saray paliwawa, ontan met ed impangiyabuloy na saray wala’d autoridad ed saray kombension, “Mas ni iya nen say inilaloan mi​—melag ya internasyonal a kombension!” inkuan na sakey a Kristianon pamilya. “Makapalikliket, ta amaneknek iya ed baleg a pakayari nen Jehova ed panoor na sipasipan to.”

Saray kombension so angitarok met na pankanawnawa ed arum pian lalon nakabkabat ni iray Tastasi. Sakey ed saray drayber na bus so inmatendi ed kombension ed Sabado tan diad Simba lamet. Inkuanton dakel a bengatla so nadngelan to nipaakar ed Tastasi nen Jehova, balet ta naamtaan to la natan a sikaray maong tan mareen a totoo manaya.

‘Bengabengatlan Agmin Balot Nalingwanan’

Nandinayewan na saray taga Cuba iray delegado lapud ligsa tan inkamakaaro ra. Saray taga Cuba so makukuli, walaay prinsipyo, tan makalakal. “Aminpigapigan sikami labay a tulongan na saray estranghero,” inkuan na sakey a delegado.

Nandinayewan na saray delegado so pananisia, liket, tan aron impanengneng na saray kaparan Tasi ed Cuba. Anggaman ed angkabaleg iran babeng, pinagmaliw day Jehova a salimbengan da. (Salmo 91:2) Inkuan nen John Barr: “Dakerakel a bengatlay anurprisa ed siak, ed inmunan imbisitak ed Cuba​—say dakep na say Bansa, say maabig ya ugali na totoon akabat ko, tan nagkalalo ed amin, say mapatnag a gayaga na saray taga-Cuba a Tastasi. Anggapo ni nadngel kon ontanlan impapuson panangansion na saray kanta tayo nipaakar ed Panarian ed intiron bilay ko tan ontanlan kabayag na tipak sano walaray espiritual a pamaakaran ya akatenyeg ed kapusoan da! Sarayan bengatla so agmin balot nalingwanan. Lawas min pabpablien iraya.”

Oniay kuan na Salmo 97:1: “Say kinarakel na saray polpolo manliket ira.” Petepeteg a nanggayagaan na saray Tastasi nen Jehova ed isla na Cuba so apadaak a kawayangan dan mandayew ed Dios, tan ed maawaran ya imbisita na sayan internasyonal a delegasyon.

[Saray litrato ed pahina 8]

Dakel a pamilya so inmatendi ed espisyal a “Dalan na Dios ed Bilay” iran Distriton Kombension ed Cuba

[Litrato ed pahina 8]

Say Bethel Home ed Havana ya alukasan lamet nen 1994

[Litrato ed pahina 8]

Nanpipirma iray membro na Mananguley ya Ulop ed saray regalon Biblia parad opisyales na gobierno