Walaray Mabilay ya Ankablin Bato ed Namibia! — Watchtower ONLINE YA LIBRARYA

Walaray Mabilay ya Ankablin Bato ed Namibia!

SAKNAPEN na Namibia so ngalngali 1,500 a kilometro diad abalaten-sagur a baybay na Aprika. Say wala ed intiron baybay na bansa et saray nipukpukdol a kabueran, mabato iran kapugaroan, tan maaw-awang iran patar na graba. Say nilaok ed saray bato na madalakirik iran baybay na Namibia et saray ankablin bato a nandurumay kolor. No maminsan et wala ni ingen iray naromog diman a diamante. Balet sayan bansa so walaan ni na bengatlan mas ankabli nen sarayan bato. Say Namibia so walaan na saray mabilay ya ankablin bato—saray totoon kabiangay dakerakel a klase na nasyon a nanlapuan.

Say sankaunaan iran nanaayam ed Namibia so mansasalita na sakey a grupoy lenguahen tinawag a Khoisan. Balitadoy panagsalita ra lapud manlaltik iran tanol to. Arum ed saray mansasalita natan na Khoisan et saray andeket-impanbaog a Damara, saray amputin-impanbaog balet ta abeban totoo a tinawag a Nama, tan saray bantog a Bushman a manag-anop. Dakel a tribu na saray andeket so akasabi met diad Namibia ed mas agano niran siglo. Napambibiigan iraya ed taloran manunaan a grupo ed bansa: say Ovambo (say sankabalgan ya etnikon grupo diad Namibia), say Herero, tan say Kavango. Ginmapon nanpirmi iray taga-Europa diad Namibia legan na koma-19 siglo. Dakel nin dayo so sinmabi kayarin adiskobre iray diamante diad kabueran na desierto.

Walay kablian na saray manaayam ed Namibia lapud kabiangan ira ed mundo na katooan ya impangiteran na Dios ed Anak to, sirin et nilukas so dalan parad andi-anggaan a bilay. (Juan 3:16) Nilasus iran taga-Namibia a nanlapud dakel a tribu so kinmiwas ed mensahe na kilalaban. Niyaliling iraya ed mabilay iran ankablin bato lapud kabiangan ira na “makaparoyroyo iran bengatla na amin a nasyon” a natitipon la natan ed abung a pandayewan ed si Jehova.—Aggeo 2:7, NW.

Ginmapo so Espiritual a Panagminas

Nen 1928 so inggapoy panagminas ed espiritual iran bato na Namibia. Legan na satan a taon say sanga na Watch Tower Society ed Abalaten ya Aprika so angipawit na 50,000 a piraso na literatura na Biblia ed totoon ataytayak ed intiron bansa. Diad tinmumbok a taon, sakey ya alanaan a Kristiano a nanlapud Abalaten ya Aprika a manngaray Lenie Theron so nampawil ed saray interesado. Diad loob na apat-bulan et binaroy ton bukor so maaw-awang a bansa, ya angipalimay masulok a 6,000 a katulongan ed panagaral na Biblia diad saray salitan Afrikaans, Aleman, tan Ingles. Amin na sayan kimey so maseguron anggapoy kaapaan.

Alimbawa, konsideraen pay Bernhard Baade, sakey a mineron Aleman. Nen 1929 et sikatoy mangaawat na abasto ya iknol manlapud sakey a dumaralos a babalkoten toy kada iknol na sakey a pahinan nanlapud publikasyon na Watch Tower. Magunaet a binasa nen Bernhard so kada pahina, a manuumameng no siopay nansulat ed libro. Diad kaunoran et abasa toy unor a pahina, a kawalaay address na Watch Tower Society diad Alemanya. Sinmulat si Bernhard parad dakel nin literatura tan sikato so pilpilimeron taga-Namibia a tinmalindeg ed katuaan.

Sinmabi Iray Sigpot-Panaon a Komikimey

Nen 1950, sinmabi ed Namibia so apatiran misionaryo ya impasal ed Watchtower Bible School of Gilead. Kasabi 1953 et naaruman so bilang na saray misionaryo anggad walora. Kaiba ed saratan et si Dick tan Coralie Waldron, sanasawan taga-Australia a siansia nin manlilingkor dia a sitotoor. Dakel nin sigpot-panaon a manangiyabawag na Panarian a nanlapud Abalaten ya Aprika tan arum a bansa so angiba ed panagminas na espiritual iran ankablin bato diad Namibia. Arum nin misionaryo, ontan met ed saray nangraduar ed Ministerial Training School, so nibaki ed Namibia.

Say sakey nin akatulong ed espiritual ya ibubulaslas diad Namibia et say panagpatalos tan panangipalapag ed literaturay Biblia diad manuna iran lenguahe diman, a singa say Herero, Kwangali, Kwanyama, Nama/Damara, tan Ndonga. Manlapula’d 1990, onkukurang la so marakep ya opisinan panagpatalosan tan ayaman na saray sigpot-panaon a boluntaryon komikimey diad kabisera, say Windhoek. Oniay inkuan nen Karen Deppisch, a kaiba nen masiken to diad sigpot-panaon a panag-ebanghelyo ed nanduruman parti na Namibia: “Dakel so mankelaw sano opresian mi iray literatura diad dili ran lenguahe, nagkalalo la sano dagdaiset iray walan libro ed satan a partikular a lenguahe.”

Panagpino ed Saray Ankablin Bato

Arum ed saray literal ya ankablin bato ed Namibia so napipino diad panamegley na galaw na saray daluyon tan buer diad inlabas lay minilenyo iran panaon. Balet, siempre, say ontan iran natural a proseso so agmakapawalay mabilay iran ankablin bato. Kakaukolanen na satan so pansagpot na saray ag-ayadyarin totoo pian ‘lakseben da so daan ya inkatoo’ tan ikawes day balo tan singa-Kriston inkatoo. (Efeso 4:20-24) Alimbawa, say panagdayew ed inaatey laran inmuunan ateng so mabiskeg a tradisyon na dakel a tribu ed Namibia. Saramay agmangagamil na say panagdayew ed saray inmuunan ateng so mabetbet a pasegsegangen na kapamilyaan tan kakaabay. Sano naamtaan na sinansakey manlapud Biblia a saray inaatey et “agda amta so bengatla,” nasubok ira. (Eclesiastes 9:5) Diad anton dalan?

Oniay impaliwawa na sakey a Tasin Herero: “Baleg ya angat so pagmaliw a matulok ed katuaan. Impaiyaralan ak na Biblia ed saray Tastasi nen Jehova, balet binmayag ni insan ko niyaplika iray bengatlan naaralan ko. Unona, kaukolan kon seguroen no kasin anggapoy nagawa ed siak no agko agamilen iray abangonan min sisiaen. Alimbawa, manmaneho ak a labasan koy pigaran lugar ed Namibia ya ag-ontutunda pian mangiyan na bato ed sakey a lubok odino mangitagey na sombrerok bilang pangilugay ed saray inaatey. Kalkalna, akombinse ak ya anggapoy nagawa’d siak no agko dayewen iray inaatey lan inmuunan ateng. Agaylay liket ko ta binendisionan nen Jehova iray sagpot kon ontulong ed pamilyak tan ed arum nin interesado a makaaral na katuaan!”

Pankaukolan Parad Espiritual Iran Minero

Sakbay na insabi na saray misionaryo nen 1950, saksakey ni labat so manangipalapag na maong a balita diad Namibia. Say bilang so tuloytuloy a dinmaak anggad asabi toy pantok a 995. Ingen, dakel nin kimey so kaukolan a gawaen. Diad tua, agnin balot akimeyan iray pigaran rehyon. Kasin wala ka’d kipapasen a manlingkor ed lugar a baleg so pankaukolan parad maseseg a manangiyabawag na Panarian? Sirin, ipangasin ombatak ed Namibia tan ontulong ed sikamin mananap tan mamino ed dakel nin espiritual iran ankablin bato.—Ikompara so Gawa 16:9.

[Mapa/Saray litrato ed pahina 26]

(Parad aktual a format, nengnengen so publikasyon)

APRIKA

NAMIBIA

[Saray litrato]

Say Namibia so sakey a bansan kawalaay masansanting iran ankablin bato

[Credit Lines]

[Saray litrato ed pahina 26]

Nipipupulong la so maong a balita ed amin na saray etnikon grupo diad Namibia

[Litrato ed pahina 28]

Nayarian mo kasi so manlingkor ed lugar a babaleg so pankaukolan arad saray manangiyabawag na Panarian?