Panangipatalos ed Biblia​—Siopan Impluensia?

SAY sakey a kabaliksan na salitan “panpatalos” et “talosan unong ed punto de bista na sisiaen, opinyon, odino sirkumstansia na indibidual.” (Webster’s Ninth New Collegiate Dictionary) Kanian, say panangipatalos na sakey ed dinanman a bengatla so kaslakan a naimpluensiaan na eksperiensia, edukasyon, tan binalegan na sakey.

Balet, komustay panangipatalos ed Biblia? Kasin bulos itayon mangipaliwawa ed saray balikas ed Biblia unong ed dili tayon “sisiaen, opinyon, odino sirkumstansia”? Siempre, say ikuan na maslak iran iskolar tan managpatalos na Biblia et agda gagawaen itan noagta sikaray igigiya na Dios.

Say sakey ya alimbawa et say nibaga ed paimano’d-leksab na Juan 1:1 diad A New Version of the Four Gospels, a nipalapag nen 1836 nen John Lingard ed silong na pangaran ya “A Catholic.” Kuanto: “Aanapen na saray totoo ed kada pananisia so prueba parad nikaduma iran opinyon da ed sagrado iran tomo: ta, diad tua et aliwan say Kasulatan so mangipapaamta ed sikara, noagta itetekep day dili ran interpretasyon ed Kasulatan.”

Anggaman makatunongan so punto, antoy getma na managsulat? Say komento to et panuporta ed impangipatalos to’d satan a bersikulo, ya impatalos ton: “Diad gapo et ‘say salita;’ tan ‘say salita’ et walad Dios; tan ‘say salita’ et Dios,” kaslakan a maka-Trinidad a patalos.

Antoy amakiwas ed sayan managsulat pian ipatalos so Juan 1:1 bilang panuporta ed doktrinan Trinidad? Kasin “say Kasulatan so angipaamta” ed sikato a gawaen itan? Imposibli itan, ta anggapoy nabasa ed Biblia nipaakar ed bangat a Trinidad. Imanoen pay inkuan na The New Encyclopædia Britannica nipaakar ed sayan punto: “Agpinmatnag ed Balon Sipan so salitan Trinidad nisay say pihon doktrina.” Niarum ni, inkuan na propesor na Yale University a si E. Washburn Hopkins: “Mapatnag ya agkabat di Jesus tan Pablo so doktrinan trinidad; . . . anggapon balot so sinalambit da nipaakar ed satan.”

Anto sirin so nikuan tayo nipaakar ed saramay manusuporta ed maka-Trinidad a panangipatalos ed Juan 1:1 odino ed dinanman ya arum a bersikulo ed Biblia? Diad panamegley na dilin estandarte nen Mr. Lingard, “aliwan say Kasulatan so mangipapaamta ed sikara, noagta itetekep day dili ran interpretasyon ed Kasulatan.”

Makapaliket, walaan itayo na mismon Salitay Dios a mangiya ed sikatayo ed saya. “Amtaen yo ya unona,” inkuan nen apostol Pedro, “ya anggapo so impropeta a sulat ya impatpatalos ya indumaduma. Ta anggapo so propesiya a nanlapu ed linawa na too, noag saray totoo nansalita ra a nanlapu ed Dios, diad impanenyeg ed sikara na espiritu santo.”​—2 Pedro 1:20, 21.