Report na Saray Manangiyabawag na Panarian

Pinmarungtal ed Publiko Iray Tastasi Diad Pransya

MANLAPUD asasakbay iran oras na Biernes, Enero 29, 1999, a nantultuloy anggad sampot-simba, maligligsan imbubunog na Tastasi nen Jehova ed Pransya diad saray kalye insan diad saginonor et diad saray kaabungan, so 12 milyon a kopya na tract ya apauloan na People of France, You Are Being Deceived! Akin ya ontanlay impankampanya ra?

Diad sakey a press conference diad Paris ed saman met a kabuasan na Biernes, niiter so rason na pankakampanya. Impaliwawa na sakey a pinagkasangiyan na Tastasi: “Say labay min gawaen natan et say pangipakabat mi ed inkasikami tan patundaen iray nikakayat a balbalikas a mamapabanday ed sikami. Mabulos min awaten so panagkritiko, balet agmi lan balot dengelen iray katilaan tan komenton manederal ed reputasyon mi.”

Anggaman saray Tastasi nen Jehova so mikatlon sankabalgan a Kristianon relihyon ed Pransya, dakel ya ananak na Tastasi so iinsultoen tan susutilen diad eskuelaan. Naandian lay trabaho iray wala la’d edad tan nasesesga ira lapud relihyon da. Agayla, pati saray relihyoson kontribusyon ya aawaten da so papabuisan na 60-porsiento. Panon ya akatulong so kampanya nipaakar ed sayan panangidumaduma?

Oniay iyaabawag na tract: “Say 250,000 a Tastasi nen Jehova tan saray kaiba ran manaayam ed Pransya so MANPROPROTESTA sumpad agmatuan pangipapara ed Kristianon relihyon da, a niletneg diad Pransya manlapula’d nen 1900 ed saramay mapeligron sekta nen 1995 ni. . . . MANPROPROTESTA sumpad naynay a pananetdet a kidudungetan da.” Niwalwal so nipaakar ed artikulon mamapauges ed saray Tastasi diad Pransya tan saray mapalikdon paraan diad pamapawala na saray managderal ed negatibon publisidad. Oniay impanampot na tract: “Natan, walay masulok a duaran milyon a Tastasi nen Jehova tan say kakaiba ra diad Europa. Diad pangidedepensa ra ed kablian na Ebanghelyo, rerespetoen daray ley na Estado a no iner et mibabaley ira. Totoo ed Pransya, saraya so katuaan. Obligasyon min iparungtal iratan lapud tudtua iratan!”

Maples tan Positibon Kiwas

Minilyon a tract so nibunog ed pilimeron agew. Diad Paris lambengat, kasabi oras na panangogto et masulok a 7,000 a Tastasi so angibunog na masulok a 1.3 milyon a tract ed totoo. Say pakanengneng ed dakerakel a Tastasi a mangiiter na saray tract diad saray kalye so seguradon balobalo parad saray totoo. Say media, pati say nasyonal tan lokal iran peryodiko tan telebisyon, so walaan na paborablin reaksion ed pankakampanya. Inkuan na peryodikon Le Progrès de Lyon: “Sayan kiwas . . . so angiparungtal ed lingon impakatalos ed sakey a salita. Diad apalabas a samploy taon, say salitan ‘sekta’ . . . so tinalosan bilang agmanepeg, mapeligro, tan makapasakit a kabaliksan. . . . Saray Tastasi nen Jehova so aliwan mapeligro a nayarin makaderal ed sosyedad.”

Aapresiaen na saramay makapikabat ed Tastasi nen Jehova so mareen ya inkatoo ra tan say aralem a respeto ra ed niletneg lan uksoyan na sosyedad. Kanian inapresia tan sinuportaan na dakel ed saramay walad kalye so sinamplon libo a Tastasi ya akibiang ed kampanya. Walaran tampol so naawat a tawag ed telepono, saray fax, tan sulsulat manlapud totoo ya angibalikas na pisalsalamat da ed tract. Importanti’d amin, naikdan na pankanawnawa iray masimoon pian narengelan daray katuaan nipaakar ed Tastasi bilang kontra ed gawagawa labat tan makulangkulang iran komento, tan saramay apabpauges iray sisiaen da so akapangipalikna ed bengatlan papablien da.