Saray Madibinon Pabitla tan Gagala na Dios

SANO ag-amta na sakey so ebat, walay irap-irap to; balet sano amta na sakey, sirin singa anggapo itan. Anto itan a natutukoy? Sakey a pabitla.

Diad peles a sosyedad a masyadon realistiko, ipapasen na totoo a say pabitlaan et parad ugaw, balet nensaman a panaon say pabitla “et sakey a pakasubokan na kakabatan,” inkuan na The Interpreter’s Dictionary of the Bible.​—Ikompara so Uliran 1:5, 6.

Imbes a mabitar ton idatak so linawa odino gagala to, no maminsan et gagalaen a buragasen nen Jehova iray mapropetikon balikas to, a mangusar na saray piulibayan, makawetwet a “makilot iran balikas,” odino makakewkew iran pabitla. (Salmo 78:2, King James Version; Numeros 12:8, The Emphasized Bible) Diad tua, anggaman 17 danay labat a nausar ed Biblia so Hebreo a salita parad pabitla, diad literal a paraan et napno na saray pabitla tan proverbio so Kasulatan.

Amayamay a Pabitla ed Biblia

Nibagan si Arin Solomon so makaebat ed makapakewkew a tuloy iran tepet, odino pabitla, ya intepet ed sikato. (1 Arari 10:1, NW, paimano’d leksab) Seguradon saya so resulta lapud inter-Dios a kakabatan. No tua so balita na saray manag-awaran nensaman ya aminsan et atalo si Solomon ed pabitlaan da nen Arin Hiram na Tiro, nayarin agawa itan kayari lay inkaandi na espiritu nen Jehova ed sikato bilang resulta na impan-apostasya to. Labalabay met nen Ukom a Samson so mipabitlaan. Aminsan ya inkagawa, diad impangantabay na masanton espiritu et atalagnaw to so kapusoan na kakabusol na Dios lapud sakey a pabitla.​—Uko-ukom 14:12-19.

Anggaman ontan, dakel iray pabitla ed Biblia a direktan angilanor ed saray gagala nen Jehova. Alimbawa, konsideraen pa so Genesis 3:15. Sayan propesiya, ya akaletnegan na tema na Biblia, so mismon mairap a talosan, sakey a “sagradon sekreto.” (Roma 16:25, 26, NW) Likud ed impakaawat nen Pablo na mamilagro iran pasingawey tan puyan, anengneng to met so pigaran aspekto na gagala na Dios diad “salming ed mabilunget,” odino diad literal et “maamot a salita.” (1 Corinto 13:12; 2 Corinto 12:1-4) Tan komusta met so agmanganggan panagpalbeng ya akapaliber ed misteryoson numero na atap ya ayep​—“anem a lasus tan anemaplo tan anem”​—a biglan linmesa tan andiay eksplinasyon ed Apocalipsis 13:18? Siopa so makapangebat ed sarayan madibinon pabitla, tan anton gagala so kanaan na saratan?

Pangiparungtal ed Saray Sagradon Sekreto

Parad dakel ed sikatayo et say pakanengneng so sankaimportantian ed say limaran sentido tayo. Balet no anggapoy liwawa, ngalngalin anggapoy kana so pakanengneng na too. Singa itayo la bulag. Ontan met so nipaakar ed kanonotan na too. Walaan itan na makapakelkelaw ya abilidad a mangitunos ed saray kalareker, mangikanay panagkatunongan, diad ontan et naebatan iray mairap a pabitla. Ingen, walay bengatlan mas kaukolan pian niparungtal iray sagradon sekreto. Anggaman sasalien ya ebatan na arum iray pabitla ed Biblia, si Jehova, say alenleneg ya Autor, say Dios na liwawa so makapangiparungtal na ginetman kabaliksan na saratan.​—1 Juan 1:5.

Makapaermen ta saray totoo so mabetbet a masyadon malastog tan agmakalkaalagar ed ebat nen Jehova. Lapud naiintriga ed misteryo, wala iramay manaanap na matudion pakalagyatan balet ta agmet talagan tua, so manaalmo na ebaebat ya aliwan unong ed Salitay Dios. Alimbawa, kinonsidera ed Judion mistisismo a singa nibalikas ed Cabala so atekepay salamangka a kabaliksan na saray numero tan letra na Hebreon alpabeto. Diad biek a dapag, inusar na saray Gnostiko nen komaduan siglo so Hebreo tan Griegon Kasulatan pian salien dan ekalen so sekreton kabaliksan na saratan.

Balet, amin na saratan a panagsukimat so lalon angitonton ed sikara ed saray paganon ritual odino anito tan kinmasipa ira ed katuaan na Dios. ‘Agayla, lapud napnoy kaugsan so mundo,’ inkatunongan na saray Gnostiko, ‘sirin say Manamalsa to, si Yahweh et mauges a Dios.’ Kasin saya la so sankaabigan a nibaga ra? Ataptapew so panagkatunongan na too! Agpankelawan no akin a si apostol Pablo, a sinmumpa ed saray apostatan ideya a pinarakep ed saginonor na saray sektan Gnostiko et pirmin angipasakbay diad saray sulat to: “Agyo pasusulokan iray bengatlan nisulat”!​—1 Corinto 4:6, NW.

Pangiparungtal ed “Makilot Iran Balikas”

Ingen, akin et salitaen ni na Dios na liwawa so “makilot iran balikas?” Say mismon nengneng na pabitla so manasagyat ed kanonotan tan pakasarag a pandetermina na sakey. Kanian, niiyan iratan ed intiron Kasulatan a singa mananam iran rekado diad balibalin kakanen, a no maminsan et panagyat labat ed interes na dumerengel odino ta pian nipasabi a lalon mabitar so mensahe. Diad sarayan kipapasen, maslak et nipapaliwawa irayan tamtampol.​—Ezequiel 17:1-18; Mateo 18:23-35.

Mabulbulos ya ipapagamor nen Jehova so kakabatan balet ta agbalot nagsi-nagsi so pangipapagamor to. (Santiago 1:5-8) Konsideraen pa so libro na Uliran, sakey ya apuyanan a tugyop na dakel a makapakewkew iran balikas a nayarin moriaen na arum bilang saray pabitla. Nakaukolay panaon tan pandalepdep pian natalosan iratan. Balet kaunongan karakel a totoo so mabulos a mansagpot? Say kakabatan a lugan da so naala labat na saramay mabulos a mangotkot ed satan.​—Uliran 2:1-5.

Angusar met si Jesus na saray ilustrasyon pian napapaway so awawey na pusoy dumerengel to. Sikatoy minukot na totoo. Panlikliketan da iray istorya to. Labalabay daray milagro to. Ingen, kaunongan karakel so mabulos a manguman ed istiloy kabibilay da pian sikatoy tumboken da? Agaylan miduma iray babangatan nen Jesus, a paulit-ulit a nanggunaet pian natalosan iray bangat nen Jesus tan mabulbulos ya angitalirak ed inkasikara pian magmaliw a papatumbok to!​—Mateo 13:10-23, 34, 35; 16:24; Juan 16:25, 29.

Inengneng ed Liwawa

Inkuan na sakey a libro, “Say pan-interes ed saray pabitla et singa mipanaonan ed matudion inkiliing.” Apribilihyoan tayon tuloy natan a manbibilay ed panaon a say espiritual a ‘liwawa so onsisindag’ ed totoo na Dios. (Salmo 97:11; Daniel 12:4, 9) Maanos tayo kasin alagaren si Jehova ed pangiparungtal to na saray gagala to unong ed say panag-orasan to? Lalon importanti, kasin onkiwas tayon tampol pian pasimbaloen so kabibilay tayo sano akabatan tayo la no panoy pipaknan nagkalalo ed niparungtal a linawa na Dios? (Salmo 1:1-3; Santiago 1:22-25) No gawaen tayo itan, bendisionan nen Jehova iray sagpot tayo, ta pian, singa ed pamalinew na antipara ed pakanengneng, say masanton espiritu so mangiter na balibalin litrato nipaakar ed gagala na Dios a malinlinew a nanengneng na mata na kanonotan tayo, a mamatarem ed espiritual a pakanengneng tayo.​—1 Corinto 2:7, 9, 10.

On, itatandoro na Makasulatan iran pabitla si Jehova bilang say “Manangiparungtal na saray sekreto.” (Daniel 2:28, 29, NW) Sakey ni, sikato met so Managsukimat na kapusoan. (1 Awaran 28:9) Agtayo nepeg a pankelawan a say kipaparungtal na liwawa na madibinon katuaan et lawas a progresibo. (Uliran 4:18; Roma 16:25, 26) Imbes ya anapen so pikakabat ed aralem iran bengatla na Dios diad panamegley na mistisismo odino ed atapew a kakabatan na too, a mangitonton labat ed kaapaan, matalek itayo komon a manilalo ed si Jehova a Dios a mangisindag ed liwawa na katuaan ed “makilot iran balikas” to, ya ipaamta to iray makapakelaw iran gagala to parad matoor iran lingkor to diad aturon panaon to.​—Amos 3:7; Mateo 24:25-27.

[Picture Credit Line ed pahina 26]

Biblia Hebraica Stuttgartensia, Deutsche Bibelgesellschaft Stuttgart