Nayarian na Pananisia ya Umanen so Bilay Mo

“TALAGAN posibli so pakawalaan na maabig iran estandarte ed moral anggano anggapoy Dios.” Ontan so inyabawag na sakey ya agnostiko. Inkuan ton pinabaleg toray ananak to a walaan na atagey iran estandarte ed moral, tan sikara met so amabaleg ed ananak da a walaan na mipadpara iran atagey ya estandarte​—balet ta amin da et anggapoy pananisia ed Dios.

Kasin kabaliksan na saya ya agla nakaukolan so pananisia ed Dios? Mapatnag ya ontan so inisip na sayan too. Tan tua ya aliwan mauges a too so amin ya agmanisia ed Dios. Sinaglawi nen apostol Pablo so nipaakar ed “saray Gentiles” ya agmikabat ed Dios balet ta “gawaen da ed ugali ra a nianakan so saray onnepeg ed ganggan.” (Roma 2:14) Amin​—pati saray agnostiko​—so nianak a walaan na konsiensia. Dakel so manutumbok ed ididikta na konsiensia ra anggano ag-ira manisia ed Dios ya angiter ed sikara na satan a kasiporan a pakatebek ed maong tan mauges.

Balet, mas mabiskeg a puersa parad kamaongan so putel tan nibase ed Biblia a pananisia ed Dios nen say konsiensian ag-akinlongan ed panangigiya. Say pananisian nibase ed Salitay Dios, say Biblia, so mangidirehi ed konsiensia, a pagmaliwen ton lalon maples a manebek ed maong manlapud mauges. (Hebreos 5:14) Sakey ni, say pananisia so mamapabiskeg ed totoo a manmantini ed atagey iran estandarte diad arap na pirmin desdes. Alimbawa, legan na koma-20 siglo, dakel a bansa so walad silong na pakayari na abulok iran mapolitikan pananguley, ya amaskar ed totoon ompatnag a walaan na moralidad pian manggawa na grabe iran inkauges. Balet, saramay walaan na tuan pananisia ed Dios so ag-angikompromiso ed saray prinsipyo ra, anggan sengegan lay pateyan da. Niarum ni, say nibase ed Biblia a pananisia so makapanguman ed totoo. Nayarian na satan ya isalba so bilay ya ompatnag a nababalang la tan ontulong ed totoo a makapaliis ed seryoso iran lingo. Konsideraen so pigaran alimbawa.

Nayarian na Pananisia ya Umanen so Bilay na Pamilya

“Lapud pananisiam et agawaan moy imposibli.” Ontan so inkuan na taga-Inglateran huis sanen inyawat toy desisyon to nipaakar ed panangasikaso ed ananak di John tan Tania. Sanen atawag so imano di John tan Tania ed saray autoridad, sikaray agni kasal tan mabanbanday so kabibilay da. Si John, a say problema ed sikato et say panagdruga tan sugarol, so binmaling ed krimen pian walay panggastos to ed saray bisyo to. Inkaindan toy ananak to tan say ina da. Kanian, anton “milagro” so agawa?

Sakey ya agew, nadngel nen John so ugaw nin kaanakan to a mangiistorya nipaakar ed Paraiso. Lapud nainteresan et nantepet ed atateng na ugaw. Tastasi nen Jehova iray atateng, tan tinulongan day John a makaaral ed satan manlapud Biblia. Kalkalna, abayuboan di John tan Tania so nibase ed Biblia a pananisia ya anguman ed kabibilay da. Nampakasal ira tan atalonaan daray bisyo ra. Saray autoridad a nan-inspeksion ed sankaabungan da so akaimano ed bengatlan ompatnag ya imposiblin nagawaan ed aganon panon​—sakey a maliket a pamilya ed loob na malinis ya ayaman, marakep a pasen a pamabalegan da’d ananak da. Duga imay huis ed impangisiglaot to’d sayan “milagro” ed balon aromogan a pananisia di John tan Tania.

Nilibon kilometro manlapud Inglatera, sakey ya ugaw nin asawan bii diad Asingger a Bukig so ngalngali met la magmaliw a sakey ed makapaermen a tuloy a bilang. Sikatoy manplaplanon magmaliw a kabiangan na minilyon kada taon a saray panamaley da et mansusumpal ed diborsio. Sikatoy walaan na anak, balet say masiken to so panguloan na amayamay nen say sikato. Lapud sayan rason, sikatoy sinagyat na kakanayon ton midiborsio la, tan talagan ginapoan to lan gawaen itan. Balet, sikatoy iyaaralan na sakey ed Tastasi nen Jehova nipaakar ed Biblia. Sanen naamtaan na Tasi so kipapasen, impaliwawa toy ibabaga na Biblia nipaakar ed panamaley​—alimbawa, say panangasawa so regalon nanlapud Dios tan agnepeg a basta labat la ibaliwala. (Mateo 19:4-6, 9) Minolimoli na bii, ‘Dumaruma iya, a sayan bii anta sakey a sankaili et panggugunaetan ton isalba so pamilya mi bangta saramay kakanayon ko et labay dan buyaken itan.’ Say balobalon agamoran ton pananisia so tinmulong ed sikaton nipreserba so panamaley to.

Say makapaermen a bilang a mangaapekta ed bilay na pamilya et say nipaakar ed aborsion. Unong ed report na Nasyones Unidas, kada taon et akalkulan walay ag-onkulang a 45 milyon a lukon nin ugugaw a ginagalan inekal. Kada aborsion et makapasinagem. Say pikakabat ed Biblia so tinmulong ed sakey a bii diad Pilipinas pian paliisay pagmaliw a sakey ed satan a bilang.

Say bii so akatongtong na Tastasi nen Jehova, angawat na sakey a brosyur ya uusaren ed panagaral na Biblia ya atituloan na Anto so Kakaukolanen na Dios ed Sikatayo?,a tan ginmapon nanaral na Biblia. Kayari pigaran bulan, insalaysay to no akin a sikatoy impaiyaralan na Biblia. Say bii so malukon sanen sikatoy pilpilimeron binisita na Tastasi, balet sikara nen masiken to et desidido lan paekal so anak da. Balet, say litrato na lukon nin ugaw ed pahina 24 na brosyur so anenyeg ed puso na bii. Sikatoy atangguyor ed samay akatekep a nibase ed Biblia ya eksplinasyon a say bilay et sagrado lapud ‘[say Dios] so subol na bilay,’ kanian agto la impaekal so lukon to. (Salmo 36:9) Natan et sikatoy ina na maganggana tan malikliksin ugaw.

Tutulongan na Pananisia Iramay Memelmelagen

Diad Etiopia, duaran lalaki a maringdingot so kawes da so inmatendi ed sakey a miting parad panagdayew a gagawaen na Tastasi nen Jehova. Kayari na miting, inkabat na sakey a Tasi so inkasikato ed sikara diad makaaron paraan. Mipapayabol iraman a lalaki. Sikaray inikdan na Tasi, aliwan kuarta, noagta bengatlan magmaong. Pinaseseg toran bayuboan day pananisia ed Dios, a “mamabli nen say balitok.” (1 Pedro 1:7) Sakey ed sikara so kinmiwas tan nanaral na Biblia. Saya so anguman ed kabibilay to. Legan a sikatoy ombubulaslas ed pananisia, intunda to lay panagsigarilyo, alabas a panag-inum, imoralidad, tan say panangusar na khat (makaadik a pampaligsa). Naaralan ton legpeten so inkasikato imbes a mipayabol tan natan et malinis tan marakep lay panagbilay to.

Sakey a mantaon na 47 a laki diad Italya so asentensiaan na samploy taon a kipriso tan nipudir ed sakey a walad panangasikaso na husgado a psychiatric ospital. Sikatoy inyaralan na Biblia na sakey ed Tastasi nen Jehova ya autorisadon onloob ed saray institusyon na prisoan pian mangiter na espiritual a tulong. Maples so inyaligwas na laki. Baleg so angumanan na kabibilay to lapud pananisia kanian saray arum a priso natan so ontutupleg ed sikato parad simbawa no panon dan arapen iray problema ra. Say nibase ed Biblian pananisia to so akagamoran toy respeto, galang, tan panagmatalek na saray autoridad na prisoan.

Nibalita ed saray peryodiko nen agano niran taon so nipaakar ed sibil iran bakal ed Aprika. Say nagkalautlan makapakebbiew et saray salaysay nipaakar ed ugugaw nin lalaki a nipasal bilang sundalo. Sarayan ugugaw so impandruga, dinuduksa, tan pinuersan mibiang ed inaayep a walna sumpa ed saray kanayon da ta pian naseguron say katooran da labat et diad partidon ilalaban da. Kasin magenap lan mabiskeg so nibase ed Biblia a pananisia pian nauman na satan so kabibilay na saratan a kalangweran? Magenap la itan ed duaran inkagawa.

Diad Liberia, nansakristan si Alex ed Iglesia Katolika. Balet diad edad ton 13, sikatoy akibiang ed milalaban a partido tan nagmaliw a balitadon ugaw nin sundalo. Pian onsebeg ed bakal, sikatoy angagamil na salamangka. Anengneng nen Alex so dakel a kakaiba ton pinapatey, balet ta sikatoy akaliktar. Nen 1997 et sikatoy akapitongtong ed Tastasi nen Jehova tan naimano ton agda minelmelag. Imbes, sikatoy tinulongan dan makaaral ed no antoy ibabaga na Biblia nipaakar ed karawalan. Si Alex so inmekal ed panagsundalo. Legan ya ombubulaslas so pananisia to, tinumbok toy ganggan na Biblia: “Arawian to so mauges, tan gawaen to so kaabigan: Anapen to so kareenan tan tumboken to.”​—1 Pedro 3:11.

Kaleganan, sakey a datin ugaw a sundalo a manngaran na Samson so linma ed baley a panaayaman nen Alex. Sikatoy membro na choir balet ta nen 1993 et sikatoy nansundalo tan alanor ed panag-druga, espiritismo, tan imoralidad. Nen 1997 sikatoy nakal a sundalo. Mamapaarap si Samson ed Monrovia pian mibiang ed puersa na special security sanen sikatoy tinangguyor na sakey a kaaro a paiyaralan na Biblia ed Tastasi nen Jehova, tan bilang resulta et abayuboan toy nibase ed Biblia a pananisia. Saya so angiter ed sikato na pakpel pian ikaindan iray inka-guerrero to. Si Alex tan Samson natan so manbibilay a mareen tan malinis ed moral. Wala ta ni so makauman ed ontanlan inaayep a panagbilay likud ed nibase ed Biblia a pananisia?

Say Dugan Klase na Pananisia

Saraya labat so pigara ed dakerakel ya alimbawa a nabitla pian iyilustra so pakayari na puron pananisia a nibase ed Biblia. Siempre, aliwan amin a mankuan lambengat a manisia ed Dios et manutumbok la ed saray atagey ya estandarte na Biblia. On, arum ya ateista so nayarin manbibilay a mas maabig nen saray pigaran mankuan a Kristiano. Satan so lapud say nibase ed Biblia a pananisia et saglawien toy nagkalalo ni nen say basta labat pankuan a manisia ed Dios.

Tinawag nen apostol Pablo so pananisia ya “agpanduaruwa ed saray bengatla ya iilaloan, say panangipatnag ed saray bengatla ya agni anengneng.” (Hebreos 11:1) Kanian, say pananisia et laktipen toy mabiskeg a panisia ed agnanengneng iran bengatla, a nibase ed agnasuppiat ya ebidensia. Nagkalalo lan sasaglawien toy agpanduaruwan wala so Dios, a sikatoy interesado ed sikatayo, tan bendisionan to iramay manggawa na linawa to. Inkuan met na apostol: “Say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.”​—Hebreos 11:6.

Saya so klase na pananisian anguman ed kabibilay di John, Tania, tan saray arum nin abitla ed sayan artikulo. Satan so angitonton ed sikaran sigpot a mankompiyansa ed Salita na Dios, say Biblia, a giya ed panagdesisyon. Tinmulong itan ed sikara a mansakripisyon magano ta pian napaliisan da so kombenienti, balet ta mauges, a kurang. Anggaman nanduruma so balang eksperiensia, amin et ginmapo ed saksakey a paraan. Sakey ed Tastasi nen Jehova so angiyaral na Biblia ed sarayan indibidual, tan naeksperiensia ra so katuaan na ibabagay Biblia: “Say salita na Dios sikatoy mabilay tan mabiskeg.” (Hebreos 4:12) Say pakayari na Salitay Dios so tinmulong ed balang indibidual a mangipaalagey na mabiskeg a pananisia ya akapanguman ed bilay da parad magmaong a kabibilay.

Saray Tastasi nen Jehova so aktibo ed masulok lan 230 a daldalin tan isla na dayat. Iimbitaan da kan manaral na Biblia. Akin? Lapud kombinsido ira a say nibase ed Biblian pananisia so mangitarok na baleg iran iyaaligwas ed bilay mo met.

[Paimano ed leksab]

[Saray litrato ed pahina 3]

Uumanen na nibase ed Biblian pananisia so kabibilay parad magmaong

[Picture Credit Line ed pahina 2]

Title card of Biblia nieświeska by Szymon Budny, 1572