Espisyal ya Okasyon​—Kasin Onatendi Ka?

DIAD sakey a makatantandan agew, masulok a 3,500 taon lay apalabas, ingganggan nen Jehova a Dios ed kada sankaabungan na naaripen iran Israelita ed Ehipto a mamatey na sakey a kordero odino kanding tan ipurapor day dala na saratan ed saray pasindeg tan ed bandad tagey na saray pinto na abung da. Diad saman a mismon labi et nilampasan na anghel na Dios iray abung a walaay ontan a tanda balet ta pinatey toray panguloan ya anak a lalaki ed kaabungan na amin ya Ehipsios. Kayari to et saray Israelita so nibulos. Diad anibersaryo na saman ya inkagawa et sinelebraan na saray Judio so Paskua.

Kayarin tuloy na impanselebra nen Jesu-Kristo ed kaunoran a Paskua a kaiba iray apostol to, inletneg to so sakey a pangdem a mangipanonot ed masakripisyon ipapatey to. Inderew to ed apostoles to so andi-lebaduran tinapay tan inkuanto: “Ala yo, kanen yo; saya sikatoy laman ko.” Insan sikara so inikdan to na kopa a walay alak tan inkuanto: “Oninum kayo ya amin ed saya; ta sikato ya’y dalak ed sipan, a sikatoy naibung nipaakar ed amayamay a pangekal ed saray kasalanan.” Inkuan met nen Jesus: “Gawa yo iya a pakanodnonotan ed siak.” (Mateo 26:26-28; Lucas 22:19, 20) Kanian ingganggan nen Jesus iray patumbok to a ngilinan iyan pakanodnonotan ed impatey to.

Say anibersaryo na impatey nen Jesus ed sayan taon so ombana ed Mierkoles na Abril 19, kaselek na agew. Saray Tastasi nen Jehova ed intiron mundo so mandaragup ed sayan espisyal a labi pian ngilinan iyan Memoryal unong ed paraan a kinerew nen Jesus. Sika so ampetapetang ya iimbitaan pian nakaiba mi bilang manangimaton. Ipangasin tepeten ed Tastasi nen Jehova diad lugar yo so eksakton oras tan pasen na pantiponan.