“Makaay-ayat a Kanding ed Palandey”

MASLAK ed sikatayo so agmanguusar ed salitan makaay-ayat pian deskribien so sakey a kanding. Nayarin isipen tayon saray kanding so mausar ya ayayep a mangan na antokaman tan mangiter ed sikatayo na mananam a karne tan masustansian gatas​—balet agtayon balot natawag iratan bilang makaay-ayat.

Anggaman kuan, dedeskribien na Biblia so asawan bii bilang “maaro ya ulsa a kabatyan tan mapaliket ya ulsa a kabatyan [“makaay-ayat a kanding ed palandey,” NW].” (Uliran 5:18, 19) Si Solomon, a managsulat na libron Uliran, so maobserban maong ed bilay na saray atap a palsa diad Israel, kanian agpanduaruwaan a makatunongan so impangusar toy ontan a panangiyaliling. (1 Arari 4:30-33) Nayarin singa say ama ton David, naobserbaan toray kanding ed palandey a mabetbet ya oonla’d kaliberliber na En-gadi, ya asingger ed saray gilig na Inatey a Dayat.

Saray angkekelag a pulok na saray kanding ed palandey diad kabangibang a Desierto na Judea so naynay ya oonla ed subol na En-gadi. Lapud satan labat so agnaeekatan a subol ed sayan kelang a lugar, say En-gadi so labalabay a pasen a pan-inuman na saray kanding ed palandey diad loob na saray siglo. Diad tua et say ngaran ya En-gadi so nayarin mankabaliksay “subol na kilaw a kanding,” paneknek a talagan mabetbet iray malangwer nin kanding ed sayan lugar. Si Arin David so nansalimbeng ed sayan lugar manlapud panamasegsegang nen Arin Saul, anggaman sikato so nambilay bilang sakey a pugante “ed saray bato na atap a kanding ed palandey.”​—1 Samuel 24:1, 2.

Diad En-gadi et siansian makanengneng kayo ni na kabatyan a kanding ya atap, odino kanding ed palandey, a balibali kalalasor to ed mabaton kelas legan ton tutumtumboken so kalakian a kanding a mamaparaap ed subol. Diad ontan et natalosan yo no akin ya impareng so kabatyan a kanding ya atap ed matoor ya asawan bii. Say inkadeen tan marakep a kakikiwas na sayan kanding so pakapatnagan met na saray kalidad na bii. Mapatnag a tutukoyen na salitan “makaay-ayat” so maabig a kakikiwas tan marakep ya itsura na kanding ed palandey.a

Say kabatyan a kanding ya atap so kaukolan a magmaliw ya aliwa lambengat a mapaot noagta makaroyroyo. Singa impabitar la nen Jehova ed si Job, say kanding ed palandey so mananak diad saray kabatoan, diad mabato tan diad saray lugar a daiset so tagano tan pirmi so petang. (Job 39:1) Anggaman ed oniaran irap, aasikasoen toray anak to tan ibabangat toran onkalab tan onkulagtit ed saray kabatoan a singa kakitsing to. Say kanding ya atap so makpel a manalimbeng ed saray anak to manlapud saray managsimaw. Anengneng na sakey a manag-imaton so sakey a kanding ed palandey a mangaablog ed sakey ya agila ed loob na kapalduay oras, legan a say anak to so akakebkeb ed silong na ina to.

Mabetbet a pababalegen na Kristianon kaasawaan a bibii tan kainaan iray anak da anggaman ed mairap iran sirkumstansia. Singa say kanding ed palandey, nipapanengneng day dedikasyon tan ag-inkasiblet diad panusumpal da’d sayan inter-Dios a responsabilidad. Tan makpel dan pambabanikelan a salimbengan so ananak da ed saray pakapeligroan ed espiritual. Kanian, aliwan panleglemew ed bibii iyan panangiyaliling, diad tua et ipapabitar nen Solomon so maabig a kakikiwas tan ganggana na bii​—espiritual iran kualidad a napapatnagan anggan diad sankairapan a kaliberliber.

[Paimano ed Leksab]

[Saray litrato ed pahina 30, 31]

Nipapanengneng na sakey a Kristianon asawan bii tan ina iray mararakep ya espiritual a kualidad sano susumpalen toray inter na Dios a responsabilidad to