Kasin Sika so Makabat?

DIAD impanuro nen Moises na saray ukom ed Israel et nambanikelan ton inanap iray “marunong tan makabat tan atalitalin lalaki.” (Deuteronomio 1:13, NW) Say pagmamaliw dan atalitali lapud edad et aliwan say mogmon kakaukolanen. Importanti met so karunongan tan kakabatan.

Nipapanengneng na makabat a too so maong a disposisyon diad panagsalita tan diad kondukta to. Unong ed Webster’s Ninth New Collegiate Dictionary, say makabat a too et “nayarian ton ag-ibesngaw so dunong to.” On, wala so “panaon ya ag-yesel,” tan walay “panaon a pansalita,” tan amta na makabat a too so pandumaan na satan. (Eclesiastes 3:7) Mabetbet a wala so maabig a rason ed ag-iyesel, ta ibabaga na Biblia: “Dia ed karaklan na saray salita ag-onkulang so pakalukso; balet say mamokpok ed saray bibil to sikato so makabat.”​—Uliran 10:19.

Pampepelengan na saray Kristiano so magmaliw a makabat ed pidedeneng da ed balang sinansakey. Samay mansasalitan naynay odino mapilit et aliwan sikato imay lawas importanti odino kakkaukolan. Nonoten a si Moises so “makapanyari ed saray salita [to],” balet ta agto ni epektibon makapangidaulo ed nasyon na Israel anggad sanen abayuboan to la so inkaanos, inkauyamo, tan dangka. (Gawa 7:22) Kanian, saramay angimatalekan na pakauley ed arum so nagkalalo lan nepeg dan pambanikelay magmaliw a mapaabeba tan makatunongan.​—Uliran 11:2.

Saramay angimatalekan nen Jesu-Kristo na “amin a wala ed sikato” so nadedeskribe ed Salitay Dios bilang “matoor tan makabat.” (Mateo 24:45-47) Agda bengatbengat ya uunaan si Jehova; nisay mapaleen sano say direksion na Dios nipaakar ed sakey a pamaakaran et malinew la. Amta ra no kapigan so pansalita tan no kapigan so panalagar ya andi-esel ed kaaruman a panamalinew. Alay abig no amin a Kristiano so aglambengat mangalig ed pananisia ra noagta paneknekan da met a sikaray makabat, a singa met ed aripen a klase.​—Hebreos 13:7.