Makakasabi ed Kapalandeyan na Chiapas so Maong a Balita na Kareenan
“Diad sankagrabian a masaker a nanonotan na siopaman diad estado na Chiapas, 45 ya agmakalaban iran dumaralos, pati 13 ya ugugaw, so pinapatey na sakey a grupo na . . . armadon lalaki.” Ontan so impangibalita na peryodikon “El Universal” ed walan agawa diad Acteal ya Estado na Chiapas, nen Disyembre 22, 1997.
SAY Chiapas so sankaabalatenan ya estado na Mexico, ya onketeg ed Guatemala. Lapud abayag lan eras tan inkaduka, sakey a grupo na tubo iran Maya Indian so nan-ayura insan nanrebeldi nen Enero 1994, diad panangontrol na grupon Ejército Zapatista de Liberación Nacional (EZLN, National Liberation Zapatista Army). Anggapoy agawaan na saray negosasyon parad mareen a solusyon. Saray inlusob tan inyataki, na namparan rebeldi tan saray tropa na gobierno, so nanresulta ed panagpaagus na dala tan panagpatey. Lapud sayan kaguloan, nan-ibakwit so dakel a dumaralos pian makalegyas.
Anggaman ed saratan ya agmaligen a kipapasen, wala so sakey a grupo na mangaaro’d kareenan a nansiansian neutral ed panlalaban ed politika. Sikaray maseseg a mangipapaimano ed Panarian na Dios bilang alenleneg ya ilalo parad karesolbi na saray problema ya aarapen na totoo, diad lokal tan diad sankagloboan. (Daniel 2:44) Siopa ira? Sikaray Tastasi nen Jehova. Diad panutulok da ed ganggan nen Jesus, panggugunaetan dan itarok so maong a balita na Panarian na Dios diad sankasulinekan iran parti na kapalandeyan na Chiapas. (Mateo 24:14) Antoy kipapasen na panagpulong ed silong na ontan iran sirkumstansia, tan antoray resulta?
“Sakey Ak ed Tastasi nen Jehova”
Aminsan ya agew, si Adolfo, sakey a kalangweran ya agano nin nagmaliw a manangipalapag na Panarian, so mantratrabaho diad istasyon na radyo diad Ocosingo. Biglan walay tinmoktok na makmaksil. Sakey a grupo na akasukbot a lalaki so linmoob tan sikatoy pinatuyongan da. Nilooban dan tampol so transmission booth, tan sinublay da imay uusaren ed radyo, insan da inyanunsio a mi-guerra ira’d gobierno.
Ingganggan na saray armadon lalaki ed si Adolfo a sikatoy mibiang ed grupo ra. “Sakey ak ed Tastasi nen Jehova,” so inyebat nen Adolfo, anggaman sikatoy agni abautismoan. Impaliwawa to a say alenleneg ya ilalo parad kareenan et say Panarian na Dios, tan sikatoy mapekder ya agto awaten so unipormi tan paltog ya iyoopresi ra’d sikato. Lapud impakaimano ed determinadon talindeg to, sikatoy pinaalis da la. Diad pannononot ed inkagawa, inkuan nen Adolfo: “Saman ya inkagawa so talagan amabiskeg ed pananisiak.”
Insan linmigen so kipapasen, balet say lugar so siansian walad panangontrol na militar. Anggaman ed ontan a kipapasen, maliket ya inawat nen Adolfo so imbitasyon na saray mamatatken ed lokal a kongregasyon a mikimey ed niarawin grupo na saray Kristiano ed saman a lugar. Diad saray checkpoint a kaukolan ton dalanan, saray sundalo so nanrespeto ed sikato sanen inkabat toy inkasikato bilang sakey ed Tastasi nen Jehova. Sikatoy abautismoan ed saginonor tan alikna toy inkapenek ed itutulong ed niarawin grupo a nagmaliw a sakey a kongregasyon na saray Tastasi nen Jehova. “Natan ta bautismado ak la,” inkuan nen Adolfo, “nibagak tekep na sigpot a kombiksion a sakey ak la ed Tastasi nen Jehova!”
“Pinabiskeg Kami nen Jehova”
Ag-abayag kayarin indeklara na EZLN so guerra sumpad gobierno diad radyo, nan-ibakwit iray ombaley. Si Francisco, sakey a sigpot-panaon a ministro, odino payunir, so angipaliwawa no panon a sikato tan say akulaw to so pinabiskeg nen Jehova ed walan asagmakan da.
“Denesidi mi so mansalimbeng diad sakey a lugar ya akaren a taloy oras. Wala’d man so sakey a kongregasyon, kanian nakaulop miray agagi. Ag-abayag et nagawa la ed saman so sirkiton asamblea mi diad Palenque. Agmi labay a sanasawa a nasaew so espisyal a miting parad saray payunir, balet ta abalitaan min say dalan a paonla ed asamblea et sinaraan na EZLN. Dinmalan kami’d katakelan, a siam oras min inakar. Dugarugay insabi mi ed miting na payunir, a nanggayagaan min maong, ontan met ed intiron programa na asamblea.
“Diad insempet mi, asabian min apoolan so abung mi tan atakew iray ayayep mi. Say atilak labat et melag a bag na kawe-kawes. Nanermenan mi so aperdi’d sikami, balet sikami so mapangasin pinatuloy na agagi diad Ocosingo ed saray kaabungan da. Impanengneng da met ed sikami no panon a gawaen iray trabahon agmi nin balot asali lapud dumaralos kami. Sakey ya agin laki so angibangat ed siak a manlitrato, samay sakey et no panoy pan-apiger na sapatos. Ontan so paraan ya impanlegpet mi ed sikamin sanasawa anggad natan kanian agmi nitunda so pampapayunir mi. Diad impanmolimoli mi ed agawa, natalosan mi ya anggaman aliwan mainomay parad sikami so mansungdo, pinabiskeg kami nen Jehova.”
Resulta na Panagpulong a Kimey
Ag-inabuloyan na saray Tastasi diad Estado na Chiapas so kairapan tan kapeligroan a mangamper ed sikara diad magunaet a pibiang ed pangitarok na maong a balita ed totoo ed satan a lugar. Alimbawa, nen Abril tan Mayo 1995, sikaray akibiang ed saray kapara ran Kristiano ed sankamundoan diad kampanyan panangibunog ed Kingdom News No. 34, tekep na matukotukoy a teman Akin a Napno na Saray Problema so Bilay?
Legan na kampanya—diad pasen a tinawag a Pueblo Nuevo, si Ciro—sakey a regular payunir, so akaromog na sakey a pamilya ya angipanengneng na interes. Diad impawil to kayari taloy agew, nigapo toy panangiyaral na Biblia ed sikara. Balet sanen pinmawil lamet si Ciro tan say kaiba to pian ituloy so pangiyaral ed pamilya, anggapo’d man so lakin akan-abung. Imbes, walay sakey a grupo na akasukbot a lalaki a manaalagar ed sikato pian sikatoy sakitan da. Tinepetan day Ciro tan say kaiba to no siopay aanapen da tan sikaray pinagyaw dan pateyen. Kayarin nampikasi ed si Jehova, sayan duaran Kristiano so makpel ya angipaliwawa a sikaray linma diman pian bangatan na Biblia so pamilya. Diad satan et sikaray binulosan na saray akasukbot a lalaki. Lapud pigaran rason, samay lakin akan-abung so agbalot sinmempet ed saman ya agew.
Sakey ya agew ngalngalin taloy taon so apalabas, abigla si Ciro sanen linma’d abung to iman a laki. Agaylan aliketan si Ciro ed impakaamta a say intiron pamilya na saman a laki so abautismoan la tan natan et mililimog ira ed sakey a kongregasyon diad Guatemala! Sakey ed saray marikit to so manlilingkor ni ingen bilang regular payunir.
Pangapresia ed Espiritual a Tagano
Anggaman ed nantultuloy a kairapan diad Chiapas, sakey a manangasikasoy distrito so angireport a saray Tastasi diad saman a lugar et talagan mangaapresia ed kaimportantian na pantutuyaw. (Hebreos 10:24, 25) Insalaysay to so agawa diad agano nin espisyal ya agew ya asamblea, ya inyeskedyul ya onggapo ed kabkabuasan ta pian saramay onatendi so makasempet ed abung da leleg a walay agew ni. Anggaman maslak ed sikara so kaukolan a manakar na masulok a taloy oras diad katakelan pian makasabi ed pan-asambleaan, akayurong laran amin kasabi na ala-siete na kabuasan. Walay anemiran membro na grupoy EZLN ya inmatendi met, nandengel tan nantitipak, a mapatnag a nanggayagaan day programa. Sikara met so nanakar na taloy oras pian makaatendi ed asamblea. Duamplo ed sikara so inmatendi ed Memoryal na impatey nen Kristo, ya agawa ed lokal a Kingdom Hall.
Sananey nin kalangweran a laki a membro na guerilla so inyasain na saray superyor to pian manronda ed sakey a lugar ed takel. Diad insabi to’d saman a komunidad, nalmoan ton tinmaynan lan amin so manaayam diman, a say karaklan ed sikara et Tastasi nen Jehova. Kanian sikatoy nanayam ed sakey a kinaindanan lan abung. Lapud anggapoy nagawaan to, sikatoy anokdok na pigaran libro ya aromog to ed kaliberliber na abung tan binasa to. Asukayan to a publikasyon iraya na Watch Tower ya atilak na Tastasi. Diad pambukbukor to, say kalangweran a laki so walaan na panaon a mandalepdep ed babasaen to. Denesidi ton umanen so bilay to tan isuko toray paltog to. Tampol ya inanap toray Tastasi tan impaiyaralan na Biblia. Diad loob na anem bulan, ibabalita to la ed arum so maong a balita. Sikato tan talora nin membro na pamilya to a datin manusuporta ed ulopan na guerilla so bautismado la natan a Kristianos.
Inengneng ed Positibon Dapag
Anggaman kabaliksan na satan so pirmin irap, say gotgotan so diad tua et walaan na positibon impluensia ed awawey na totoo nipaakar ed panagpulong a kimey. Onia so insalaysay na sakey a matatken diad mismon syudad a ginapoan na gulo: “Ngalngali limay agew kayarin ginmapo so labanan, naorganisa mi lay panagpulong diad loob tan paway na syudad. Magunaet ya ondengel iray totoo ed sikami. Akapangipalima kami na literatura na Biblia tan akapangigapo na pigaran panangiyaral ed Biblia. Diad sakey a lugar, dakel so onsusumpa ed katuaan, balet lapud gotgotan, sikara lay ondengel, impaiyaralan na Biblia, tan inmatendi ed saray miting tan saray asamblea.”
Saray agagi so maliket lapud apansiansia ray teokratiko iran aktibidad da anggaman ed pirmin agmaligen iran kipapasen. Anggaman amta na saray puersa na gobierno tan say EZLN, intultuloy day nan-asamblea, ya amabiskeg ed sikara ed espiritual. Say imbibisita na saray managbiahen manangasikaso so mabiskeg met ya anagyat ed sikara pian mantultuloy ed panagpulong a kimey. Makapainteres ta saraman ni ingen so mibibiang ed labanan so mamapaseseg tan mabetbet a manasagyat ed saray Tastasi a mantultuloy ed panagpulong a kimey da.
Anggaman kinmepan agano iray subok tan kairapan a kinaukolan a sungdoan na saray totoo ed Chiapas, ag-iratan anampot. Anggaman kuan, sakey so segurado—saray Tastasi nen Jehova so determinado ya ag-ontunda ed saray sagpot da diad pangitarok ed totoo na maong a balita na kareenan manlapud Salitay Dios, say Biblia. (Gawa 10:34-36; Efeso 6:15) Namomoria ra, so singa inkuan nen propeta Jeremias, a “say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jeremias 10:23) Say Panarian na Dios lambengat diad panamegley na Anak to, si Jesu-Kristo, so makapangitarok na solusyon ed inkahustisya tan inkaduka diad mundo.—Mateo 6:10.
[Mapa ed pahina 9]
(Parad aktual a format, nengnengen so publikasyon)
Gulpo na Mexico
CHIAPAS
GUATEMALA
Dayat Pasipiko
[Credit Line]
Mountain High Maps® Copyright © 1997 Digital Wisdom, Inc.
[Litrato ed pahina 9]
Saray Tastasin onlan manpulong diad kapalandeyan na Chiapas