Say Interon Mundo so Aderal!

Imanom so mundo ed kaliberliber, a wadtan iray syudad, kultura, agawaan ed siensia, tan binilyon a populasyon. Mainomay so pakasagyat ed singano inkapermanente na satan, agta ontan? Kasin isipen mo ya onsabi panaon et sigpot a naandipat iyan mundo? Nayarin mairap itan ya ilitrato ed kanonotan. Balet, amtam ta ya unong ed napanmatalkan a lapuan et walay akaunan mundo nensaman tan sigpot ya aderal itan?

AGMI tutukoyen so sakey a mundo na saray inmunan tribu. Say mundon aderal et sibilisado, walaan na saray syudad, artistikon agawaan, tan pikakabat ed siensia. Ingen, ibabaga ed sikatayo na rekord ed Biblia a nen koma-17 ya agew ed komaduan bulan, 352 a taon sakbay a nianak si patriarkan Abraham et ginmapo so delap a niyanep na satan so interon mundo.a

Kasin susto itan a rekord? Peteg kasin agawa itan? Peteg kasin walay mundo nensaman sakbay na sayan mundo natan ya inmaligwas insan aderal? No ontan, akin ya angangga itan? Anto so problema? Tan kasin walay naaralan tayo manlapud inkaderal na satan?

Peteg Kasin Aderal so Mundo Nensaman?

Satan a nikadkaduman desyang, no peteg ya agawa so agbalot sigpot a nalingwanan. Kanian, diad dakel a bansa et walaray pakanonotan ed satan ya inkaderal. Alimbawa, konsideraen pa so eksakton petsa a nikurit ed Kasulatan. Say komaduan bulan ed kalendaryo nensaman so mipetekan natan ed kapegleyay Oktubre anggad kapegleyay Nobyembre. Kanian say koma-17 ya agew so ngalngalin mipetekan ed Nobyembre uno. Agnayarin nibanbana labat, sirin, a diad dakel a daldalin et seselebraan iray piestay inatey diad satan a petsa na taon.

Saray arum ya ebidensya na Delubio so mansiasiansia ni ed saray tradisyon na katooan. Ngalngalin amin lawarin totoo nensaman so walaan na alamat o istorya ya akaliktar iray inmunan atateng da ed sankagloboan a delap. Saray African Pygmy, European Celt, South American Inca​—amin da so walaan na manulibayan iran alamat, ontan met ed saray totoo diad Alaska, Australia, India, Lithuania, Mexico, Micronesia, New Zealand, arum a pasen ed North America, tan Tsina, diad pamitla labat na pigara.

Siempre, diad inlabas na panaon saray alamat so pinarakep, balet amin iratan so angilaktip ed pigaran detalye a mangipapabitar na saksakey a lapuan na istoryan: Say Dios so asanokan lapud inkarelmeng na katooan. Intarok to so baleg a delap. Aderal so katooan ed intiraminte. Balet, aliktar so pigaran matunong a totoo. Saraya so nanggawa na baleg a baloto ya akasalbaan na totoo tan ayayep. Asabi panaon, saray manok so imbulos pian mananap na amagan dalin. Diad kaunoran et asakda so baleg a baloto diad palandey. Kaepas da ed biong, saray akaliktar so angiyapay na bagat.

Antoy papaneknekan na saya? Saray panuulibayan so imposiblin nibanbana labat. Say nantetekep ya ebidensya na sarayan alamat so manusuporta ed kadaanan a paneknek na Biblia ya amin a totoo so nanlapud kapolian na saray akaliktar ed delap ya aneral ed mundo na katooan. Kanian, agtayo la kaukolan so ompapeg ed saray alamat odino tongtong labat pian naamtaan so agawa. Walaan itayo la na inalwaran a nipreserban rekord ed Hebreon Kasulatan diad Biblia.​—Genesis, kapitulo 6-8.

Lugan na Biblia so sakey a pinuyanan a rekord na awaran a saknapen toy manlapud gapoan na bilay. Ingen, ipapabitar na ebidensya a nagkalalo ni itan nen say basta awaran. Say ag-onsaew a propesiya tan aralem a kakabatan na satan so mangipapatnag a satan imay ibabagan​—pitatalosan na Dios ed katooan. Aliwan singa saray tongtong labat, kalaktip ed maawaran a salaysay na Biblia so kangaranan tan saray petsa pati saray detalye nipaakar ed kapolian tan lugar. Ipapanengneng na satan ed sikatayo no antoy itsura na bilay sakbay na Delap tan ipaparungtal na satan no akin a biglan angangga so interon mundo.

Anto ta so problema ed saman a sosyedad antis na delap? Say ontumbok ya artikulo so mangonsidera ed satan a tepet. Importantin tepet itan parad saraman so nayarin panumamengan da no panon kaligen so arapen na sibilisasyon tayo natan.

[Paimano ed Leksab]

[Tsart ed pahina 4]

(Parad aktual a format, nengnengen so publikasyon)

Saray Alamat ed Delap Diad Sankamundoan

Bansa Pipetekan 1 2 3 4 5 6 7 8 9 10

Gresya 7 ◆ ◆ ◆ ◆ ◆ ◆ ◆

Roma 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Asirya 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

New Zealand - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington E.U.A. - Yakima 7 ◆ ◆ ◆ ◆ ◆ ◆ ◆

Mississippi E.U.A. - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

Abalaten Amerika - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Asanokan so Dios lapud inkarelmeng

2: Inkaderal panamegley na delap

3: Ingganggan na Dios

4: Niiter so pasakbay na Dios

5: Pigpigara ed katooan so akaliktar

6: Nisalba ed baleg a baloto

7: Nisalba so ayayep

8: Imbaki so manok odino sananey nin pinalsa

9: Asakda ed palandey diad kaunoran

10: Angiyapay na bagat