Report na Saray Manangiyabawag na Panarian

Sikatoy Pinakiwas na Programa ed Telebisyon Pian Idayew so Dios

INKUAN nen apostol Pablo a “saray arum . . . impulong da si Kristo ed sibletan tan pisangsangan; et saray arum met dia ed maong a linawa.” (Filipos 1:15) No maminsan et agnaam-amtaan na anggan saramay mamapauges ed totoo nen Jehova a napapakiwas da iray maptek-impanpuson totoo ya onkamang ed katuaan.

Nen Nobyembre 1998 et impalabas ed nasyonal a telebisyon ed Pransya so sakey a dokumentaryo a mangipaparungtal ed itsura na Bethel, saray pasilidad na sanga na Tasi nen Jehova ed Louviers, Pransya. Anggaman nanduruma so reaksion a naawat na satan, ag-inilaloan a say programa so amawala na positibo iran resulta.

Sakey ed saramay akabantay ed programa et si Anna-Paula, a 60 kilometro so kaarawi na ayaman to manlapud Bethel. Manaanap ed saman na trabaho si Anna-Paula, sakey ya inan sian-ed-asawa a walaan na duaran anak. Kanian diad kaimbuasan et tinmawag ed Bethel pian mantepet no walay napantrabahoan diman. “Anengneng ko ed telebisyon a marakep itan a pasen tan makanakana so kimey a gagawaen ditan,” so inkuan to. Sikatoy nikelawan a maong sanen naamtaan to ya amin a manseserbi diad Bethel et ministros a boluntaryon manguusar na panaon da! Kayari na antikey ya impangipaliwawa ed saray aktibidad na saray Tasi nen Jehova, sikatoy inmabobon a dalawen na sakey a Tasi.

Sanen dinmalaw ed sikato si Léna, sakey a sigpot-panaon a ministro diad sakey a kongregasyon diman, abaybayag iran nantongtong, tan inawat nen Anna-Paula so libron Pikakabat a Mangitonton ed Andi-Anggaan a Bilay.a Diad tinmumbok ya indalaw, abasa la nen Anna-Paula so interon libro tan dakdakel so tepet to. Inawat to a tampol so panangiyaral ed Biblia. Inkuan nen Anna-Paula: “Saya la so pankanawnawa pian naamtaan ko so Salita na Dios. Agak nin balot awalaan na Biblia nensaman.”

Nen Enero et binmisita ed Bethel si Anna-Paula, tan diad tinmumbok a simba et sikatoy primeron inmatendi ed Makristianon miting. Kayarin tuloy na satan, sikatoy nanaral na Biblia a kaiba so ananak to tan pinulongan to iray kakaaro to. “Agko nayarian ya iyamot ed arum so naaaralan ko,” so inkuanto. “Labalabay kon inabang iray katuaan na Biblia ed saray totoo pian natambayo ira.” Sanen atalonaan la nen Anna-Paula so pigaran personal a problema to, sikatoy regular lan inmatendi ed saray miting. Sikatoy maples ya inmaligwas tan abautismoan nen Mayo 5, 2002.

Niarum ni, lapud maabig ya ehemplo tan inkaseseg nen Anna-Paula a manpulong, apakiwas so nanay to a manaral na Biblia tan ag-abayag et sikatoy abautismoan. “Agko nibalikas ed salita so liket a naliliknak,” so inkuan nen Anna-Paula. “Pisasalamatan ko si Jehova ed kada agew lapu ed impakapikabat ko ed sikato tan ed amin a bendisyon ya ipapagamor to ed siak.”

[Paimano ed leksab]

[Saray litrato ed pahina 8]

Tagey: Si Anna-Paula

Leksab: Wangalan na sangan opisina diad Pransya