Pagmaliwen si Jehova a Dios Mo

DIAD panaon na Biblia, ontan lay inkaapit na pigaran totoo ed si Jehova a sikatoy sinalambit bilang Dios da. Alimbawa, diad Kasulatan et deneskribe si Jehova bilang “Dios nen Abraham,” “Dios nen David,” tan “Dios nen Elias.”​—Genesis 31:42; 2 Arari 2:14; 20:5.

Panon ya awalaan na maapit a relasyon ed Dios irayan lalaki? Anto so naaralan tayo ed sikara ta pian niletneg tan napansiansia tayo met so malet a personal a relasyon ed Manamalsa?

‘Anisia si Abraham ed si Jehova’

Si Abraham so sankaunaan a too a sinalambit ed Biblia ya anisia ed si Jehova. Say pananisia so manunan kalidad nen Abraham ya akagamoran toy panangabobon na Dios. Diad tua, ontan lay panamalabo nen Jehova ed si Abraham a diad saginonor et impakabat na Manamalsa so inkasikato ed si Moises bilang “Dios nen Abraham,” nen Isaac ya ilalak to, tan nen Jacob ya apo to.​—Genesis 15:6; Exodo 3:6.

Panon ya abayuboan nen Abraham so onian klase na pananisia ed Dios? Unona, inletneg nen Abraham so pananisia to ed malet a pundasyon. Nayarin sikatoy imbangat nipaakar ed dalan nen Jehova na ilalak nen Noe a si Sem, ya akaimaton ed impangiliktar na Dios. Atasian a mismo nen Sem so ‘impangilaban nen Jehova ed si Noe, sakey a managpulong na katunongan, a pati arum nin pitora, dia ed impangitarok to na delap ed mundo na saray momoan’ odino, agmaridios a totoo. (2 Pedro 2:5) Nayarin naamtaan nen Abraham ed si Sem a kada mangisipan si Jehova, seguradon nasumpal itan. Antokaman so agawa, sanen naawat a mismo nen Abraham so sipan na Dios, sikatoy nanggayaga tan nambilay unong ed pihon pikakabat a natoor itan a sipan.

Lapud walaan na malet a pundasyon so pananisia nen Abraham, satan so pinekderan na saray gawa to. Oniay insulat nen apostol Pablo: “Lapu ed pananisia si Abraham, sanen atawag, pian onla ed sakey a pasen ya awaten ton singa tawir, tinmulok; tan pinmaway, ya agto amta no iner so laen to.” (Hebreos 11:8) Satan ya inkamatulok so amaputel ed pananisia nen Abraham, a nipaakar ed satan et inkuan nen babangatan a Santiago: “Nanengneng mo la so impanggawa na pananisia pati saray gawa to, tan lapu ed saray gawa say pananisia agawa ya ayadyari.”​—Santiago 2:22.

Niarum ni, inabuloyan nen Jehova a nasubok so pananisia nen Abraham, pian mas ombiskeg itan. Oniay intuloy ya inkuan nen Pablo: “Lapu ed pananisia, si Abraham, sanen sikato so asali, insaklang to si Isaac.” Say panalsali odino pananubok so mandalisay tan mamabiskeg ed pananisia, a pagmaliwen to itan “a mamabli nen say balitok.”​—Hebreos 11:17; 1 Pedro 1:7.

Anggaman agnaimatonan nen Abraham so kasumpalan na amin ya insipan na Dios, sikatoy magayagan akaimaton ed impangalig na arum ed ehemplo to. Say asawa ton si Sara tan say talora nin membro na pamilya to​—si Isaac, Jacob, tan Jose​—so sinalambit met ed Biblia bilang napanuliranan lapud nikadkaduman pananisia ra.​—Hebreos 11:11, 20-22.

Pananisia a Mipara ed si Abraham Natan

Say pananisia so makana parad siopaman a manpipilalek a pagmaliwen si Jehova a Dios to. “No anggapo so pananisia agnayarin paliketen [so Dios],” so insulat nen Pablo. (Hebreos 11:6) Panon a nabayuboan na sakey a lingkor na Dios natan so mabiskeg a pananisia a mipara ed si Abraham?

Singa si Abraham, nepeg a say pananisia tayo so niletneg ed malet a pundasyon. Say sankaabigan a paraan a nagawaan itan et diad regular a panagaral na Biblia tan saray imbase ed Biblia a publikasyon. Say pambasa ed Biblia tan pandalepdep ed abasa tayo so mangipaseguro ed sikatayo a natoor iray insipan na Dios. Diad saya et napakiwas itayo ya itunos so paraan na panagbilay tayo base ed satan a seguradon iilaloan. Nagkalalon ombiskeg so pananisia tayo panamegley na katutulok tayo, a laktipen na satan so pibibiang ed mapublikon ministeryo tan iyaatendi ed saray Makristianon pantitipon.​—Mateo 24:14; 28:19, 20; Hebreos 10:24, 25.

Seguradon nasubok so pananisia tayo, a nayarin panamegley na isusumpa, graben sakit, ipatey na inadaro, odino arum nin bengatla. Say pansiansian matoor ed si Jehova sano nasusubok so mamaputel ed pananisia tayo, a pagmaliwen to itan a mas makana nen say balitok. Naimatonan tayo man odino andi so kasumpalan na amin a sipasipan na Dios, say pananisia tayo so mamaapit ed sikatayo ed si Jehova. Niarum ni, say ehemplo tayo so mamaseseg ed arum pian aligen da so pananisia tayo. (Hebreos 13:7) Ontan so agawa ed si Ralph, ya akaimano tan angalig ed pananisia na atateng to. Impaliwawa to:

“Sanen wala ak ni’d pudir na atateng ko, pinaseseg da so interon pamilya mi ya ombangon a masakbay pian mankakaiba kamin manbasa na Biblia. Ontan so paraan na impakabasa mi ed interon Biblia.” Siansia nin babasaen nen Ralph so Biblia a kinabuasan, kanian maabig ton nigagapo so sanagew. Nipasal nen Ralph so sinimban manpulong a kaibay tatay to. “Diad satan ko naaralan so panggawa na panagpawil tan panangiyaral na Biblia.” Si Ralph so manlilingkor la natan bilang boluntaryo diad sakey ed saray sangan opisina na saray Tasi nen Jehova diad Europa. Agaylan abig a tumang ed pananisia na atateng to!

Lakin Makapaliket ed si Jehova

Si David, a nianak manga 900 a taon kayari nen Abraham, so sakey ed saray matalonggaring a lingkor nen Jehova ya asalambit ed Kasulatan. Oniay inkuan nen propeta Samuel nipaakar ed si David a pinili nen Jehova a manari ed arapen: ‘Si Jehova so mananap na laki [a makapaliket] ed dili a puso to.’ Ontan lay inkaapit nen Jehova tan si David a diad saginonor et sinalambit nen Isaias ed Arin Hezekias si “Jehova, a Dios nen David ya ateng mo.”​—1 Samuel 13:14; 2 Arari 20:5; Isaias 38:5.

Anggaman makapaliket si David ed si Jehova, walaray pankanawnawa ya inabuloyan ton sikatoy diktaan na pilpilalek to. Amitlon sikatoy akagawa na graben lingo: Inabuloyan to so kaban na sipanan ya iyalis ed Jerusalem diad agsuston paraan; akikalugoran ed si Batseba tan impapatey to si Urias ya asawa nen Batseba; tan impabilang to so totoo ed Israel tan Juda anggaman ag-ingganggan nen Jehova. Diad amin na saratan, asumlang nen David so Ganggan na Dios.​—2 Samuel 6:2-10; 11:2-27; 24:1-9.

Balet, sanen si David so kinompronta lapud saray kasalanan to, binidbir to so eebatan to ed saratan tan agto intetel ed arum a totoo. Inaksobi to ya aliwa ray uksoyan ed impangiyalis ed Kaban, ya inkuan to nin “agtayo inanap [si Jehova] unong ed panguksoyan.” Sanen inwalwal nen propeta Natan so impikalugoran nen David, oniay ebat to: “Nankasalanan ak sumpa ed Jehova.” Tan diad bektan amoria nen David so kakulangkulangan na impamilang ed totoo, oniay binidbir to: “Nankasalanan ak na balbaleg dia ed saman a ginawak.” Nagbabawi si David ed saray kasalanan to tan nansiansian maapit ed si Jehova.​—1 Awaran 15:13; 2 Samuel 12:13; 24:10.

Sano Makapankasalanan Itayo

Legan itayon mansasagpot a pagmaliwen si Jehova a Dios tayo, napaseseg itayo na ehemplo nen David. No say lakin makapaliket a maong ed si Jehova et makapankasalanan na ontan kabelat, nepeg ya ag-itayo nadidismaya no nalingo itayo no maminsan odino makagawa itayo ni ingen na graben kasalanan, anggaman pinasya lay pansasagpot tayo. (Eclesiastes 7:20) Naligliwa itayo na katuaan a sanen nagbabawi si David, sikatoy pinerdona ed saray kasalanan to. Ontan so agawa ed si Uwea pigay taon la so apalabas.

Si Uwe so manlilingkor bilang matatken diad sakey a kongregasyon na saray Tasi nen Jehova. Diad sakey ya inkagawa, sikatoy nampadaeg ed mauges a pilpilalek to tan akilawanan. Diad gapo et sinali nen Uwe, a singa si David, a sakbongan so agawa, diad paniilalon ibaliwala nen Jehova so impankasalanan to. Diad kaunoran, sikatoy ginonigon a maong na konsiensia to ya anggad impatua to itan ed kapara ton matatken tan ginawa so nakakaukolan a kundang pian tulongan si Uwe a makabangon ed espiritual ya impakadesyang to.

Si Uwe so nagbabawi ed saray kasalanan to tan nansiansian maapit ed si Jehova tan ed kongregasyon. Ontan lay pisalsalamat to ed impanulong ed sikato, ya apalabas so pigaran simba et sikatoy nansulat ed mamatatken pian ibalikas so masimoon tan impapuson pisasalamat to ed tulong da. “Tinulongan yo ak ya agnapabanday so ngaran nen Jehova,” so insulat to. Apansiansia nen Uwe so relasyon to ed si Jehova tan asabi panaon et sikatoy akapawil bilang lingkor ed saman lanlamang a kongregasyon.

“Toon Walaan na Liknaan a Mipara ed Sikatayo”

Si Elias, a nambilay diad samay siglo kayari nen David, so sakey ed saray manunan propeta diad Israel. Inyalibansa nen Elias so tuan panagdayew legan na panaon a kasmak so inkakurakot tan imoralidad, tan agbalot kinmapuy so debosyon to ed si Jehova. Agpankelawan no akin a say kasandi ton si Eliseo so aminsan ya anawag ed si Jehova bilang “Dios nen Elias”!​—2 Arari 2:14.

Anggaman ontan, si Elias et aliwan sakey ya ekstraordinaryon too. Oniay insulat nen Santiago: “Si Elias so toon walaan na liknaan a mipara ed sikatayo.” (Santiago 5:17, NW) Singa bilang, sanen pirmin tinalo to iray managdayew ed si Baal, sikatoy pinagyaw nen Reyna Jezabel a pateyen. Antoy reaksion to? Sikatoy ataktakot tan batik ed kalawakan. Diman et yinmurong si Elias ed silong na kiew ya enebro a nantagleey: “Sarag la; natan O Jehova, ekalen mo so bilay ko; ta agak magmaong nen saray ateng ko.” Agla labay nen Elias so manpropeta tan kaliktan to lay ompatey.​—1 Arari 19:4.

Balet, tinalosan nen Jehova so liknaan nen Elias. Sikatoy pinabiskeg na Dios, a pinaseguroan to lamet si Elias ya agto bukbukor, lapud walaray arum a matoor ed tuan panagdayew. Niarum ni, siansian nampiyaan nen Jehova si Elias tan wala ni impakimeyan To ed sikato.​—1 Arari 19:5-18.

Say pirmin impakagonigon nen Elias et aliwan tanda a naandi so panangabobon na Dios ed sikato. Manga 1,000 taon so apalabas, sanen angumay nengneng nen Kristo Jesus diad imaton di Pedro, Santiago, tan Juan, siopay pinili nen Jehova ya ompayawar ed dikingan nen Jesus? Si Moises tan Elias. (Mateo 17:1-9) Malinew ya impasen nen Jehova si Elias a napanuliranan a propeta. Anggaman si Elias et “toon walaan na liknaan a mipara ed sikatayo,” pinabli na Dios so impansagpot ton ipawil so puron panagdayew tan pasantosen so ngaran To.

Emosyonal a Paniirap Tayo

No maminsan et nadidismaya odino naaaburido iray lingkor nen Jehova natan. Agaylan makaligliwan naamtaan ya alikna met manaya nen Elias iratan! Tan agaylan makapaseseg a no panon ya atalosan nen Jehova so liknaan nen Elias, natatalosan To met so emosyonal a paniirap tayo.​—Salmo 103:14.

Diad biek a dapag, inaro tayo so Dios tan say kapara tayon too tan pipilaleken tayon gawaen so kimey nen Jehova a panangiyabawag ed maong a balita na Panarian. Balet, nayarin nadismaya itayo na agpanangisengan-sengan na totoo ed panagpulong tayo odino naaburido tayo ni ingen lapud pamapagyaw na saray onsusumpa ed tuan panagdayew. Anggaman ontan, no panon a kininlongan nen Jehova si Elias pian makapantultuloy, kinlongan To met iray lingkor to natan. Alimbawa, konsideraen pa so agawa ed si Herbert tan Gertrud.

Si Herbert tan Gertrud so abautismoan bilang Tasi nen Jehova diad Leipzig, dia ed datin Demokratikon Republika na Aleman, nen 1952. Mairap so kabibilay ed saman na saray lingkor na Dios lapud sebel so mapublikon ministeryo ra. Anto so alikna nen Herbert nipaakar ed panagpulong ed kabkaabungan?

“No maminsan et naaaburido kamin maong. Sano mankakabkaabungan kami, agmi naseseguro no kasin biglan onsabi iray autoridad tan arestoen da kami.” Panon ya atalonaan nen Herbert tan saray arum ni so takot da? “Lanang min aaralen a personal so Biblia. Tan inikdan kami nen Jehova na biskeg pian nitultuloy mi so panagpulong mi.” Diad impanpupulong nen Herbert, dakel so naeksperiensya to ya amabiskeg tan nanligliwa ni ingen ed sikato.

Apitongtongan nen Herbert so sakey a walad kapegleyan ya edad a bii ya interesado ed Biblia. Sanen pinawil nen Herbert so bii kalabas na pigay agew, walay balolaki a wadman ya ondedengel ed tongtongan da. Kayari pigaran minuto, apasikmatan nen Herbert so bengatlan amagiwgiw ed sikato. Diad yurongan a walad sukong et walay sakey a sombrero na polis. Kayarian iman na balolaki, a mapatnag a sakey a polis a determinadon mangaresto ed si Herbert.

“Sakey kan Tasi nen Jehova!” so inyeyag na balolaki. “Nengnengen ko pay ID’m.” Inderew nen Herbert so card a pakabidbiran ed sikato. Insan agawa so ag-inilaloan. Nilingaw na bii so polis tan pinasakbayan to: “No walay nagawa ed sayan too na Dios, agka la makadakat ed sayan abung.”

Ag-akasel so balolaki, inderew to so ID ed kinen Herbert, insan to la pinaalis. Naamtaan nen Herbert ed saginonor a samay polis et onkakaraw manaya ed marikit na bii. Mapatnag a mas labay toy makakaraw nin siansia ed marikit nen say arestoen si Herbert.

Pagmaliwen si Jehova a Dios Mo

Anto so naaralan tayo ed sarayan ebento? Singa si Abraham, kaukolan a walaan itayo na mapekder a pananisia ed saray sipan nen Jehova. Singa si David, kaukolan itayon onasingger ed si Jehova diad masimoon a pagbabawi sano makapankasalanan itayo. Tan singa si Elias, kaukolan tayoy ompapeg ed si Jehova parad biskeg sano nagogonigon. Diad panggawa na onia, napagmaliw tayo si Jehova a Dios tayo natan tan diad andi-anggaan, lapud sikatoy “Dios a mabilay a sikato so Manangilaban ed saray amin a totoo, lalo ed saray manisia.”​—1 Timoteo 4:10.

[Paimano ed leksab]

[Saray litrato ed pahina 25]

Say inkamatulok nen Abraham so amaputel ed pananisia to

[Litrato ed pahina 26]

Singa si David, nepeg itayon magbabawi sano mankasalanan itayo

[Litrato ed pahina 28]

No panon ya atalosan nen Jehova so liknaan nen Elias, natatalosan to met so liknaan tayo