Say Panaanap ed Kareenan na Nonot

SI Albert so walaan na maliket a panamaley tan duaran makapaligsan ananak. Balet liknaen ton wala ni so kulang ed bilay to. Kaleganan na pantatalikarkar to pian makalmo na trabaho, sikato met so akibabali ed politika tan sinmuporta ed sisteman sosyalismo. Sikatoy nagmaliw ni ingen ya aktibon membro na lokal a partido na Komunista.

Balet ag-abayag et adismaya si Albert ed Komunismo. Agto la akibiang ed politika tan sigpot to lan indeboto so inkasikato ed pamilya to. Say gagala to ed bilay et say paneguro a sikaray maliket. Anggaman ontan, nalilikna nin siansia nen Albert so pirmin ag-inkakontento tan siansian agto naromog so tuan kareenan na nonot.

Kaslakan la so eksperiensya nen Albert. Sinali la na minilyon a totoo so nanduruman ideolohiya, pilosopiya, tan relihyon ta pian naromog so makabaliksan a gagala ed bilay. Diad Mamasagur iran bansa, saray pakurang na hippie nen dekada na 1960 et panagrebelde ed niletneg la iran estandarte ed moral tan sosyal. Saray kalangweran so nagkalautlan nananap na liket tan ed kabaliksan na bilay diad panamegley na saray ilegal a druga tan saray pilosopiya na saray tatawagen a guru tan espiritual a lider na grupo ra. Anggaman kuan, sinmaew iray pakurang na hippie a mamawala na tuan liket. Imbes, lalon pinarakel na satan iray adik tan imoral a tobonbalo, ya amaloor ed pakawewetwet na sosyedad nipaakar ed moral.

Diad inlabas na saray siglo, dakel so nananap na liket panamegley na kayamanan, impluensya, odino edukasyon. Saratan a kurang so manreresulta lambengat ed pakadismaya. Oniay inkuan nen Jesus: “Say bilay na too andi ed karakel na saray bengatla a bebembenan to.” (Lucas 12:15) Imbes, say determinadon pangegemtan ed kayamanan so kaslakan a mangitatarok na kaermenan. Oniay ibabaga na Biblia: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang. Ta say aro ed pilak sikato so sakey a lamot na saray amin a nengneng na mauges; sikato a sanen inaguman na saray arum . . . atalos ira na dakel a kaermenan.”​—1 Timoteo 6:9, 10.

Panon a naromog sirin na sakey so kareenan na nonot tan say gagala na bilay? Kasin sakey itan a panangipalaran, a singa pangikenay pana diad agnanengneng a puntirya a walad ambilunget? Makapaliket ta aliwan ontan. Unong a nanengneng tayo diad onggendan ya artikulo, say solusyon et akadepende ed pamenek ed importantin tuloy tan nikadkaduman pankaukolan na too.

[Litrato ed pahina 3]

Kasin naromog mo so kareenan na nonot diad pangegemtan ed kayamanan, impluensya, odino edukasyon?