Pananisia ed Dios—Mankaukolan ni Kasi na Milagro?
SI Albert so walad kasakbayan na koma-20 taon to sanen ginapoan ton anapen so Dios. Nausisa to lay pigaran relihyon balet ta siansian agni napnek. Diad impakabasa ed saray parti na Biblia et naamtaan to no panon so impideneng na Dios ed saray indibidual a singa di Noe, Abraham, Sara, tan Moises. Apaapit si Albert ed samay Dios a walad Biblia. Balet, naseseguro to kasi no peteg a wala so Dios?
Sakey a labi et nanmaneho si Albert ya amaarap ed sakey a nisulinek a pasen pian manpikasi, “Ipangasim Dios ko, ikdan mo ak pay sakey a tanda—bengatlan mamaneknek a wala ka.” Nanalagar lan nanalagar si Albert. Nanonotan to ni a sanen anggapo nin balot so agawa, say aalagden to so “nansumpal ed inkadismaya, ed inkaapa, ed sanok.”
Singa si Albert, liknaen na dakel a kaapaan so panaanap da ed Dios. Anganko ta sikaray nawewetwet ed saray klero odino napapalikdo ed maong a pananalita na saray ebanghelisador ed telebisyon. Lapud abigla ed pansimpisimpitan a napapatnagan ed maslak a kakaabay da, agla ingen amta na arum no anto so panisiaan. Balet, pinaseguroan nen Arin David na kadaanan ya Israel so anak ton Solomon: “No sikato [Dios] so anapen mo, sikato so naromog mo.”—1 Awaran 28:9.
Bueno, panon sirin ya ipaparungtal na Dios so inkasikato? Kasin alagden mo ni sakey a tanda—sakey a labas nen normal ya eksperiensia a mamaneknek ed sikan wala so Dios? Unong ed aganon nin surbey ya inreport na magasin a Time, masulok a duaran kakatlo ed saray taga-Amerika so manisia ed saray milagro. Impaimano met na artikulo a “saray iglesian sankapelesay-idaraak to ed Amerika et saray kongregasyon na Charismatic tan Pentecostal a say panagdayew da et akasentro ed ‘saray tanda tan pakelaw.’”
Talaga ta’n kaukolan ni ‘iray tanda tan pakelaw’ pian manisia ed Dios? Anguusar na saray milagro diad apalabas iran panaon. Diad pangiyilustra: Si Saul na Tarsus, a mamapasegsegang ed papatumbok na Anak na Dios, si Jesu-Kristo, so awalaan na ekstra-ordinaryon eksperiensia diad dalan a manlapud Jerusalem a manpa-Damascus. Sayan mamilagron impakaabet ed apaolin Jesus so tinmundas ed impakakomberti nen Saul. (Gawa 9:1-22) Diad ontan et say datin managpasegsegang so nagmaliw ya apostol Pablo—sakey ed saray manunaan a manangiyalibansa na Inkakristiano!
Balet lawas ta’n say resulta na saray milagro et paborabli? Kasin mandedependi so puron pananisia ed Dios na sakey ed pakaeksperiensia to na milagro?
[Litrato ed pahina 3]
Mamilagron nansalita so Anak na Dios ed si Saul na Tarsus. Kasin aalagden mo met so sakey a milagro?