Say Dondon​—“Sankaabigan a Regalo” ya Nanlapud Ama

1. Anto ran bendisyon so niiter na dondon?

SAY dondon bagat nen Jesu-Kristo so angiter na dakel ya bendisyon. Lapud dondon, nilukas ed amin ya ananak nen Adan a mangaaro ed inkatunong so pankanawnawan magmaliw ya kabiangan na pamilyay Dios. Tan lapud dondon, walay pankanawnawa tayon manbilay ya maliket tan anggapoy anggaan. Balet aliwan say marakep ya arapen labat so niiter na dondon nen Kristo ed matulok ya totoo. Lapud mabulos ya inter nen Jesus so bilay to, asuportaan so inkatunong nen Jehova tan naebatan met iray importantin isyu ed uniberso.​—Heb. 1:8, 9.

2. (a) Anto ran importantin isyu ed uniberso so kaibad pikakasi nen Jesus? (Nengnengen so litratod gapo na artikulo.) (b) Antoy aralen tayod sayan artikulo?

² Manga duay taon antis ya inatey si Jesus pian itaryay dondon, imbangat to ray disipulo ton manpikasi: “Ama mi a walad tawen, napasanto komon so ngaran mo. Onsabi la komon so Panarian mo. Nagawa komon so linawam, a singa ed tawen, ontan met diad dalin.” (Mat. 6:9, 10) Pian mas naapresya tayoy dondon, aralen tayo no antoy koneksion na satan ed pamasanto ed ngaran na Dios, say panuley na Panarian na Dios, tan say pakasumpal na gagalay Dios.

“NAPASANTO KOMON SO NGARAN MO”

3. Antoy irerepresenta na ngaran nen Jehova, tan panon ya pinauges nen Satanas itan ya sagradon ngaran?

³ Say sankaunaan ya kerew nen Jesus ed pikakasin imbangat to et say pamasanto ed ngaran na Dios. Irerepresenta na ngaran nen Jehova so inkasuperyor, katagyan, tan inkasanto to. Diad sananey ya pikakasi nen Jesus, tinawag toy Jehova ya “Masanton Ama.” (Juan 17:11) Lapud masanto si Jehova, amin ya prinsipyo tan ganggan to et masanto. Balet diad hardin na Eden, mapalikdon kinuestion nen Satanas so kanepegan na Dios ya mangiter na estandarte parad totoo. Lapud impantila nen Satanas nipaakar ed si Jehova, pinauges toy sagradon ngaran na Dios.​—Gen. 3:1-5.

4. Panon ya pinasanto nen Jesus so ngaran na Dios?

⁴ Duma balet si Jesus ta talagan inaro toy ngaran nen Jehova. (Juan 17:25, 26) Pinasanto to itan. (Basaen so Salmo 40:8-10.) Lapud impanbilay nen Jesus bilang perpekton too diad dalin, pinaneknekan to ya makatunongan tan manepeg labat ya si Jehova so mangiletneg na saray estandarte parad saray matalinon pinalsa to. Anggano pinairap ya maong nen Satanas si Jesus ya anggad inatey, nansiansian matoor si Jesus ed Ama tod tawen. Lapud satan, pinaneknekan ton sarag na perpekton too ya tuloken so amin a matunong ya estandarte na Dios.

5. Panon tayon napasanto so ngaran na Dios?

⁵ Panon tayon nipanengneng ya aaroen tayoy ngaran nen Jehova? Panamegley na kondukta tayo. Iilaloan nen Jehova ya magmaliw tayon masanto. (Basaen so 1 Pedro 1:15, 16.) Labay ton ibaga et si Jehova labat so dayewen tan unoren tayo diad interon puso. Anggan sano napapasegsegang tayo, gawaen tayoy anggaay nayarian tayon unoren iray matunong ya prinsipyo tan ganggan to. Panamegley na maabig iran gawa, papasindagen tayoy liwawa tayo kanian niglogloria tayoy ngaran nen Jehova. (Mat. 5:14-16) Bilang masanton totoo, papaneknekan tayod kabibilay tayo ya duga tan matunong iray ganggan nen Jehova tan palso iray akusasyon nen Satanas. No nalingo tayo, ipanengneng tayoy tuan panagbabawi tan paliisan tayo ray kagagawa ya agmamagalang ed si Jehova.​—Sal. 79:9.

6. Akin ya impasen itayo nen Jehova ya matunong anggano aliwa tayon perpekto?

⁶ Lapud bagat nen Kristo, peperdonaen nen Jehova iray kasalanan na saray mangipanengneng na pananisia. Aawaten ton magmaliw ya managdayew to iramay mangidedikay bilay dad sikato. Inyabawag nen Jehova iray alanaan ya Kristiano bilang matunong ya ananak to tan saray ‘arum a karnero’ bilang matunong ya kakaaro to. (Juan 10:16; Roma 5:1, 2; Sant. 2:21-25) Kanian lapud dondon, natan ni labat et matunong tayo lad pakanengneng na Ama tayo tan kaiba tayod saray mamapasanto ed ngaran to.

“ONSABI LA KOMON SO PANARIAN MO”

7. Diad uley na Panarian, anto ran bendisyon so magmaliw ya posible lapud dondon?

⁷ Diad pikakasin imbangat nen Jesus, oniay sinmublay ya kerew tod Dios: “Onsabi la komon so Panarian mo.” Antoy koneksion na dondon ed Panarian na Dios? Lapud dondon, nagmaliw ya posible so pakatipon ed 144,000 ya manlingkor bilang arari tan saserdote ya nakaiba nen Kristo diad tawen. (Apo. 5:9, 10; 14:1) Si Jesus tan saray nakaiba ton manuley so manugyop ed Panarian na Dios, tan sikaray mangiter na saray bendisyon na dondon ed matulok ya totoo diad loob na sanlibon taon. Magmaliw ya paraiso so dalin, tan amin ya matoor a totoo et magmaliw lan perpekto, kanian sigpot lan mankakasakey iray kabiangan na pamilya na Dios diad tawen tan dalin. (Apo. 5:13; 20:6) Mekmeken nen Jesus so ulo na uleg tan ekalen toy amin ya pakapatnagan na impanrebelde nen Satanas.​—Gen. 3:15.

8. (a) Panon ya tinulongan nen Jesus iray disipulo to ya natalosan so kaimportantian na Panarian na Dios? (b) Panon tayon nipanengneng natan ya susuportaan tayo so Panarian?

⁸ Nen wadiad dalin si Jesus, tinulongan to ray disipulo to ya natalosan so kaimportantian na Panarian na Dios. Kayari na impanpabautismo nen Jesus, inyabawag toy “maong a balita na Panarian na Dios” diad nanduruman lugar. (Luc. 4:43) Diad samay unor ya impitongtong tod saray disipulo to antis ya pinmawil ed tawen, ingganggan to ran mantasi nipaakar ed sikato “diad sankaarawian a pasen na dalin.” (Gawa 1:6-8) Panamegley na panagpulong a kimey, walay pankanawnawa na amin ya totoo ed interon mundo ya naaralan so nipaakar ed dondon tan magmaliw ya sakop na Panarian na Dios. Natan, ipapanengneng tayon susuportaan tayoy Panarian diad itutulong tayod saray agagi nen Kristo ya wadia nid dalin ya sumpalen so ganggan ya ipulong so maong a balita na Panarian diad interon mundo.​—Mat. 24:14; 25:40.

“NAGAWA KOMON SO LINAWAM”

9. Akin ya makapanmatalek tayon sumpalen nen Jehova so gagala to parad totoo?

⁹ Antoy labay ya ibaga nen Jesus nen imbaga ton, “Nagawa komon so linawam”? Si Jehova so Manamalsa. Basta walay ibaga ton nagawa, singa asumpal la itan. (Isa. 55:11) Agto abuloyan ya lapud impanrebelde nen Satanas et agnagawa so gagala To parad totoo. Manlapu lad gapo, linawa nen Jehova ya napano so dalin na perpekton ananak nen Adan tan Eva. (Gen. 1:28) No inatey si Adan tan Eva ya anggapoy anak da, agnasumpal so gagala na Dios ya napano so dalin na totoo. Kanian nen nankasalanan si Adan tan Eva, inabuloyan ira nen Jehova ya nawalaan na ananak. Panamegley na dondon, amin ya mangipanengneng na pananisia et ikdan na Dios na pankanawnawan magmaliw ya perpekto tan manbilay ya anggapoy anggaan. Inad-aro nen Jehova iray totoo, tan labay ton nagamoran na matulok so maliket ya bilay.

10. Anton bendisyon so iter na dondon ed saray inaatey?

¹⁰ Panon to balet iray binilyon ya totoon inatey ya agda akabat si Jehova tan ag-akapanlingkor ed sikato? Lapud dondon, magmaliw ya posible so kioli na saray inaatey. Bilayen lamet ira na maaron Ama tayod tawen tan ikdan to ray pankanawnawan naaralan so gagala to tan nawalaan na bilay ya anggapoy anggaan. (Gawa 24:15) Labay nen Jehova ya manbilay iray totoo, aliwan ompatey. Bilang Subol na bilay, sikatoy magmaliw ya Ama na amin ya napaoli. (Sal. 36:9) Duga sirin imay imbangat nen Jesus ya pikakasi: “Ama mi a walad tawen.” (Mat. 6:9) Inikdan nen Jehova si Jesus na importantin betang ya paolien iray inaatey. (Juan 6:40, 44) Diad Paraiso, sumpalen nen Jesus so betang to bilang say “kioli tan say bilay.”​—Juan 11:25.

11. Antoy linawa na Dios parad “baleg ya ulop”?

¹¹ Aliwa labat ya pigpigaran totoo so minabang ed inkamaiter nen Jehova ta oniay imbaga nen Jesus: “Siopaman a manggagaway linawa na Dios, sikato so agik a laki tan agik a bii tan inak.” (Mar. 3:35) Linawa nen Jehova a saray agnabilang ya “baleg ya ulop” manlapud amin ya nasyon tan tribu tan lenguahe et mandayew ed sikato. Saramay mangipapanengneng na pananisia ed dondon nen Kristo tan manggagawa ed linawa na Dios et kaiba ed saray mangibabaga ed maksil ya boses: “Say kililiktar tayo et utang tayo ed Dios tayo, ya akayurong ed trono, tan ed Kordero.”​—Apo. 7:9, 10.

12. Panon ya napatnagan ed pikakasin imbangat nen Jesus so gagala na Dios parad matulok ya totoo?

¹² Say gagala nen Jehova parad maunor ya totoo et napatnagan ed saramay kerew nen Jesus diad pikakasi to. Base ed satan ya pikakasi, labay tayon gawaen so anggaay nayarian tayo pian napasanto odino ipasen ya masanto so ngaran nen Jehova. (Isa. 8:13) Say mismon ngaran nen Jesus et mankabaliksay “Si Jehova so Kilalaban,” tan say kilalaban tayo panamegley na dondon et mangigalang tan mangigloria ed ngaran nen Jehova. Say Panarian so usaren na Dios pian niiter ed matulok ya totoo iray bendisyon na dondon. On, ipapaseguro na pikakasin imbangat nen Jesus ya anggapoy makaamper ed pakasumpal na linaway Dios.​—Sal. 135:6; Isa. 46:9, 10.

IPANENGNENG YA PAPABLIEN MOY DONDON

13. Antoy ipapanengneng na bautismo tayo?

¹³ Say sakey ya importantin paraan ya nipanengneng tayon papablien tayoy dondon et diad pangidedika na bilay tayod si Jehova base ed pananisia tayod dondon tan diad pampabautismo. Ipanengneng na bautismo tayo ya “kien itayo nen Jehova.” (Roma 14:8) No manpabautismo tayo, kekerewen tayod Dios ya nawalaan tayoy malinis ya konsiensia. (1 Ped. 3:21) Satan ya kerew tayo et ebatan nen Jehova diad panlinis tod sikatayo panamegley na bagat ya dala nen Kristo. Seguradon makapanmatalek tayo ya tooren nen Jehova so amin ya impromisa to.​—Roma 8:32.

14. Akin ya ingganggan itayon aroen so kapara tayon too?

¹⁴ Anto ni sakey a paraan ya nipanengneng tayon papablien tayoy dondon? Amin ya gagawaen nen Jehova et base ed aro, kanian linawa to ya atan so manunan kualidad na amin ya mandadayew ed sikato. (1 Juan 4:8-11) Papaneknekan tayon labay tayoy magmaliw ya “ananak na Ama [tayon] walad tawen” diad pangaro tayod kaparan too. (Mat. 5:43-48) Say ganggan ya aroen so kaparan too et onkokomadua ed ganggan ya aroen si Jehova. (Mat. 22:37-40) Say sakey ya importantin paraan ya nipanengneng tayoy panangaro ed kaparan too et diad pangunor tayod ganggan ya ipulong so maong a balita na Panarian na Dios. Diad pangipanengneng tayoy aro ed kaparan too, ipapatnag tayoy gloria na Dios. Diad tua, say panangaro ed Dios et ‘magmamaliw a nagnap ed sikatayo’ no uunoren tayoy ganggan ya aroen so arum, lalo la ray kaagian tayo.​—1 Juan 4:12, 20.

SAY DONDON ET “MAKAPAINAWAN PANAON” A NANLAPUD SI JEHOVA

15. (a) Anto ran bendisyon so iiter la natan nen Jehova ed sikatayo? (b) Anto ran bendisyon so tatalaranan tayo?

¹⁵ No ipanengneng tayoy pananisia ed dondon, sigpot itayon naperdona. Ipapasegurod sikatayo na Salitay Dios ya “nabural” iray kasalanan tayo. (Basaen so Gawa 3:19-21; paimanod leksab) Singa naaralan tayod gapo, panamegley na dondon et tinagibi nen Jehova iray nilanaan na espiritun ariripen pian magmaliw ya ananak to. (Roma 8:15-17) Diad sikatayo balet ya kabiangan na ‘arum a karnero,’ singa nanggawa si Jehova na kasulatan pian tagibien to tayo tan akasulat ditan so ngaran tayo. No perpekto tayo la tan nalampasan tayoy unor ya subok, pirmaan la nen Jehova so kasulatan a singa panangibaga, tan tagibien to tayo bilang inad-aro ton ananak diad dalin. (Roma 8:20, 21; Apo. 20:7-9) Say panangaro nen Jehova ed saray pinabpabli ton ananak et anggapoy anggaan to. Saray bendisyon na dondon et mansiansia ed andi-anggaan. (Heb. 9:12) Agnaandi so kablian na sayan regalo. Anggapoy too o pakapanyari a makasamsam ed satan ed sikatayo.

16. Panon itayon nibulos panamegley na dondon?

¹⁶ Anggapoy nagawaan na Diablo pian amperen so amin ya tuan magbabawi tan magmaliw a kabiangan na pamilya nen Jehova. Linma diad dalin si Jesus tan “pinsanan” ya inatey, kanian permanentin niiter so bayar panamegley na dondon. (Heb. 9:24-26) Sigpot ya akansela so kasalanan tan patey ya atawir ed si Adan. Misalsalamat tayod dondon bagat nen Jesus lapud nibulos tayod panangaripen na mundon kokontrolen nen Satanas, tan agtayo la tatakotan so patey.​—Heb. 2:14, 15.

17. Antoy nibagam ed panangaro nen Jehova?

¹⁷ Seguradon nagawa iray promisa na Dios. No panon ya saray ganggan to ed palsa et ag-onmimintis, seguradon agmet onmintis iray sipan tod sikatayo. Agmanguuman si Jehova. (Mal. 3:6) Aliwan say bilay labat so inregalo tod sikatayo. Impanengneng to met ya inaro to tayo. “Naamtaan tayo la tan papanisiaan tayo so panangaro na Dios ed sikatayo. Say Dios et aro.” (1 Juan 4:16) Say interon dalin et magmaliw ya marakdakep a paraiso, tan ipatnag na amin ya wadiad dalin so panangaro na Dios. Maliket tayo komon a mibiang ed saray matoor ya pinalsad tawen diad pangibaga: “Komon ta say dayew tan gloria tan karunongan tan pisasalamat tan galang tan pakayari tan biskeg et niwala ya anggad angga ed Dios tayo. Amen.”​—Apo. 7:12.