Papablien nen Jehova so “Amen” Tayo
PAPABLIEN nen Jehova so panagdayew tayo. Sikatoy “maniimano tan onderengel” ed saray lingkor to, tan agto ibabaliwala so amin ya gagawaen tayon panangirayew, anggano singa melag labat itan. (Mal. 3:16) Singa bilang, imanoen so salita ya nayarin aminpigapiga tayo lan imbaga. Satan ya salita et say “amen.” Kasin papablien nen Jehova itan ya simplin balikas? On! Pian naamtaan tayo no akin ya papablien to itan, nengnengen tayo no antoy kabaliksan na satan a salita tan no panon itan ya inusar ed Biblia.
“IBAGA NA AMIN A TOTOO YA, ‘AMEN!’”
Say salitan “amen” et mankabaliksan na “ontan pa komon,” odino “segurado.” Saya et nanlapud Hebreon salita a kabaliksan toy “magmaliw a matoor,” “magmaliw a napanmatalkan.” No maminsan, uusaren itan ed legal iran kaso. Kayarin mansamba so sakey a too, ibaga to so “amen” pian pekderan to ya tua so imbaga to tan awaten to so antokaman a resulta na imbaga to. (Num. 5:22) No imbaga to so “amen” ed arap na totoo, mas walay rason ton tooren so sipan to.—Neh. 5:13.
Say sakey ya makapadinayew ya impangusar ed “amen” et nabasad Deuteronomio kapitulo 27. Sano makaloob la ed Insipan a Dalin iray Israelita, mantitipon ira ed baetan na Palandey Ebal tan Palandey Gerizim pian dengelen so pangibasa ed Ganggan. Aglabat ira ondengel noagta iyabawag da met ya aawaten da so Ganggan. No ibasa la iray resulta na agda pangunor ed Ganggan, onebat ira na “Amen!” (Deu. 27:15-26) Isip mo pay maksil ya ebat na nilibon lalaki, bibii, tan ugugaw! (Jos. 8:30-35) Seguradon agdan balot alingwanan iraman ya imbaga da ed saman ya agew. Tan tinoor na saray Israelita so imbaga da, ta oniay nabasa tayo: “Nantultuloy a nanlingkor so Israel ed si Jehova diad amin ya agew nen Josue tan ed amin ya agew na saray mamatatken a nambilay ni kayari nen Josue tan makaamta met ed amin a ginawa nen Jehova parad Israel.”—Jos. 24:31.
Inusar met nen Jesus so “amen” pian pekderan ya tua so imbaga to, balet ginawa to itan ed nikaduman paraan. Imbes ya usaren to itan pian ebatan so imbaga na arum, inusar to so “amen” (impatalos ed Pangasinan ya “tua”) pian igapo so ibaga ton katuaan. No maminsan, uliten to itan ya salita, ya ibaga ton “amen amen.” (Mat. 10:15; Juan 1:51) Kanian apaseguroan iray ondedengel ed sikato ya talagan tua iray imbaga to. Segsegurado si Jesus ed ibabaga to ta sikato so walaan na autoridad ya gawaen so amin ya sipan na Dios.—2 Cor. 1:20; Apo. 3:14.
“IMBAGA NA AMIN A TOTOO, ‘AMEN!’ TAN INDAYEW DAY JEHOVA”
Inusar met na saray Israelita so “amen” sano irarayew day Jehova tan sano manpipikasi rad sikato. (Neh. 8:6; Sal. 41:13) Diad pangibaga rad “amen” kayari na pikakasi, ipapanengneng na saray ondedengel ya onaabobon ira ed pikakasi. Kanian makakapibiang so amin ed panagdayew ed si Jehova. Ontan so agawa nen inyakar nen Arin David so Kaban nen Jehova diad Jerusalem. Nen wadman la ra, walay agawan selebrasyon. Diad saman et kinansion so pikakasi na pisasalamat ya kinompos nen David, ya nabasa ed 1 Awaran 16:8-36. Saramay wadman et apakiwas ya maong ed satan a pikakasi kanian “imbaga na amin a totoo, ‘Amen!’ tan indayew day Jehova.” Say nankakasakey ya ebat da so angarum ed liket ya alikna ra ed saman ya agew.
Inusar met na saray Kristiano nen inmunan siglo so “amen” sano irarayew day Jehova. Mabetbet ya ipipila itan na saray nansulat ed Biblia diad saray sulat da parad saray kongregasyon. (Roma 1:25; 16:27; 1 Ped. 4:11) Anggan diad libro na Apocalipsis et adeskribe iray espiritun pinalsa ed tawen ya mangiglogloria ed si Jehova diad pangibabaga ra na: “Amen! Idayew yoy Jah!” (Apo. 19:1, 4) Niyugali la na saray inmuunan Kristiano ya bitlaen so “amen” kayari na pikakasi ed saray pantitipon da. (1 Cor. 14:16) Balet, agda labat itan ibabaga lapud satan so apasalan da.
NO AKIN YA IMPORTANTE SO “AMEN” TAYO
Kayari tayon nirepaso so impangusar na saray lingkor nen Jehova nensaman ed “amen,” natalosan tayo no akin ya importante ya ibalikas tayo itan ed sampot na pikakasi. No ibaga tayo so “amen” ed sampot na pikakasi tayo, ipapanengneng tayo ya talagan seryoso tan nanlapud puso so pikakasi tayo. Tan sano ibalikas tayo so “amen” anggan ag-itan narengel kayari na pikakasin indaulo na arum, ipapanengneng tayo ya onaabobon tayo ed pikakasi. Imanoen so arum ya rason no akin ya importante so “amen” tayo.
Ipapanengneng na satan ya ondedengel tayod pikakasi lapud kabiangan itan na panagdayew tayo. Dadayewen tayoy Jehova aliwa labat ya diad piabobon tayo ed pikakasi noagta ontan met ed gagawaen tayo legan na pikakasi. Lapud labay tayon ibalikas so impapuson “amen,” pansiasiansiaen tayoy dugan panmoria tan kagagawa legan na pikakasi, tan akapokus so nonot tayo ed satan.
Lapud satan et mankakasakey tayo bilang mandadayew ed Dios. Diad saray pikakasi ed pantitipon tayo, mankakasakey so interon kongregasyon ed narerengel dan pikakasi. (Gawa 1:14; 12:5) No ibaga tayoy “amen” kaiba iray agagi, mas mankakasakey tayo. Tan no ibalikas tayoy “amen,” balanglan maksil odino diad puso tayo, lalon napakiwas si Jehova ya iter so kerew tayo.
Say “amen” tayo et mangirarayew ed si Jehova
Nirarayew tayoy Jehova. Naiimano nen Jehova anggan saray angkekelag ya gagawaen tayo pian sikatoy nidayew tayo. (Luc. 21:2, 3) Nanenengneng to so motibo tayo tan say walad puso tayo. Anggano diad panamegley labat na telepono so idengel tayod aral, makaseguro tayo ya say mapaabeban pangibalikas tayoy “amen” et naiimano nen Jehova. Kaiba itayo ed saramay walad aral ya mangirarayew ed si Jehova.
Say pangibalikas tayo na “amen” et singa melag labat a bengatla, balet importante itan. “Diad pangusar ed sayan sakey a salita,” so imbaga na sakey a Bible encyclopedia, sarag ya ibalikas na saray lingkor na Dios so “talek, sigpot ya piabobon, tan malet ya ilalo ya walad puso ra.” Komon ta kada “amen” ya ibalikas tayo et makapaliket ed si Jehova.—Sal. 19:14.