Kasin Onkiwas Kayo ed Panangaro nen Kristo?
1 Diad impanmolimoli ed kurang na bilay na Katawan to, oniay insulat nen apostol Juan: “Si Jesus . . . bangta inaro to so saray totoo to a wala ed mundo, inaro to ra angga ed kasampotan.” (Juan 13:1) Diad sayan tiempo na Memoryal, nodnonoten tayo so sankatalonggaringan a balikas na panangaro nen Kristo. Makakiwas itayo ed satan a panangaro diad pangagamil na pananisia ed dondon, diad maseseg a pampulong tan, singa si Jesus, diad pansungdo “angga ed kasampotan.”—Mat. 24:13; 28:19, 20; Juan 3:16.
2 Ikiwas ed Panangaro nen Kristo: Aktibon maong si Jesus ed unor lan simba na impanbilay to ed dalin. (Mat. 21:23; 23:1; 24:3) Bilang umaalig ed si Kristo, napakiwas itayo met lapud aro a ‘mabiskeg tayon isekar so inkasikatayo’ diad panlingkor ed si Jehova. (Luc. 13:24) Kasin naanamot yo iray uksoyan pian makapanpulong kayo na malaglaem legan na Abril diad pangarum ed panaon ya usaren yo ed ministeryo?
3 Diad sayan taon say Pangdem na Katawan so ombana ed Mierkoles na labi, Abril 19. Pigara kasi onatendi ed sayan importantin okasyon? Mandependi itan a tuloy ed sikatayo. Kasin inlista yo la iramay plano yon imbitaan—saray iyaaralan yo na Biblia tan arum ya interesado, kakanayon, kaparan negosyanti, tan kaeskuela? Kasin kinatongtong yo la ra tan masimoon ya inimbitaan? Kasin panonotan yo ni ra pigaran agew sakbay na Memoryal? Kasin kaukolan day tulong yo pian makaatendi ira? Imbitaan met na mamatatken so siopaman ya inaktibo la ed ministeryo. Diad tua nagawa so Memoryal ed labi na ordinaryon agew imbes a dia ed sampot-simba kanian talagan importanti parad amin ya onatendi.
4 Akaparaan ya Onatendi: Makana parad sikatayo so akaparaan tan walad maong a kondisyon na nonot sano onatendi itayo ed Memoryal. Pinaseseg nen Pablo so kapananisiaan ton pansiansiaen da ed kanonotan so inkaseryoso na okasyon. (1 Cor. 11:20-26) Nayarin basaen yo iray kapitulo 13 ya anggad 17 na Ebanghelyo nen Juan legan na panagaral yo na Biblia bilang pamilya insan isalaysay na balang sakey a membro na pamilya no antoy kabaliksan na bagat nen Jesus ed sikato. Ontan met, aglilingwanan a gawaey inagew-agew a panagbasa na Biblia parad simba na Memoryal!
5 Naliknan maong so panangaro tayo ed si Kristo, tan mantultuloy itan anggad kayari na Abril 19. Determinado itayon ipatnag so panangaro tayo’d sikato ed ando lan ando! Say selebrasyon na Memoryal ed sayan taon so ontulong ed sikatayo pian napabiskeg itan a determinasyon tayo.