“Gawa Yo ya a Pakanodnonotan ed Siak”
Nodnonoten so Impatey nen Jesus no Abril 2
1. Akin a say Abril 2, 2007 et importantin petsa?
1 No Abril 2, 2007, minilyon a totoo ed interon mundo so mantitipon pian nodnonoten so impatey nen Jesus. Sikatoy inatey bilang manangidepensa na inkasoberano na mangatatawen ya Ama to, ya amaneknek a tila so akusasyon nen Satanas a Diablo a manlilingkor labat ed Dios iray totoo lapud sinisiblet iran motibo. (Job 2:1-5) Say Pangdem na Katawan so mangipapanonot met ed sikatayo a diad samay impatey nen Jesus bilang ayadyari tan andiay kasalanan a too et ‘inter to so bilay to a panondon ed amayamay.’ (Mat. 20:28) Kanian oniay inganggan nen Jesus ed saray babangatan to: “Gawa yo ya a pakanodnonotan ed siak.” (Luc. 22:19) Kasin pakiwasen ka na say apresasyon ed sayan mablin langkap na Dios pian manparaan la parad panselebra ed sayan sankatalonggaringan a panangipatnag na aro?—Juan 3:16.
2. Panon tayon niparaan so puso tayo parad Memoryal?
2 Iparaan Moy Pusom: Diad pangonsidera ed no antoy agawa ed kada sakey ed saramay unor lan agew na bilay nen Jesus bilang too, niparaan tayoy puso tayo parad sayan panselebra ed Memoryal. Pian nagawaan tayo iya, sakey ya eskedyul na espisyal a babasaen ed Biblia so nitarya ed Usisaen so Kasulatan—2007 tan ed 2007 Calendar. Sayan niyeskedyul a babasaen nipaakar ed saray agawgawa a misiglaotan ed impatey nen Jesus so mipetekan a tuloy ed saray agew ed kalendaryo ya uusaren tayo natan. Saray agew tan petsa ya atukoy ed salaysay na Biblia so nibase ed kalendaryo na saray Judio a say panagbilang da ed saray agew et manlapud iselek na agew anggad ontumbok ya iselek na agew. Inkonsidera iyan metodo na panagbilang na agew tan intumbok ed satan so eskedyul ed babasaen ed Biblia ed panaon na Memoryal. Say panrepaso ed satan a babasaen ed Biblia tan sipipikasin pandalepdep ed kaaralem na panangaro na Dios so ontulong ed sikatayo pian sigpot a nagunggonaan diad panagselebra ed Memoryal.
3. Panon tayon natulongan iray interesado tan inaktibo pian nagunggonaan ed Memoryal?
3 Imbitaan so Arum ya Onatendi: Nipakabat ed insert na Pebrero a Ministeryo Tayo ed Panarian so espisyal a kampanya pian imbitaan so totoo ed sayan importantin ebento. Kasin niyarunsa yo la so sigpot a pakapibiang ed sayan kampanya? Kasin nilista yo la iramay kabat yon imbitaan yo? Kasin ginapoan yo laran kontaken? Iplano so masakbay ya iyatendi ed labi na Memoryal pian abrasaen iramay inimbitaan yo ontan met ed arum niran interesado. Ompan labay yoran abayan ed yurongan, a seguroen a walay ekstra yon Biblia tan panagkantaan parad sikara. Ikabat ira ed saray agagi. Kayari na programa katongtongen ira tan ebatan iray tepet da no wala. Imbitaan iran onatendi ed espisyal a publikon paliwawa a nagawa no Abril 15. Saray mamatatken so nagkalalo lan interesado a maneguron naikdan na imbitasyon parad Memoryal tan espisyal a paliwawa iramay datin mililimog ed kongregasyon balet ta nagmaliw ya inaktibo.
4. Panon tayon natulongan iray totoo a mantultuloy ya onaligwas ed espiritual kayari na panselebra ed Memoryal?
4 Tulongan Iray Balo Nin Interesado tan Inaktibo ya Onaligwas: Say espiker ed Memoryal so mangipaliwawa ed antikey nipaakar ed uksoyan tayo ed panangiyaral na Biblia tan mamaseseg ed saray balo nin interesado ya itultuloy day manaral nipaakar ed si Jehova. Nayari yon usaren iray sinalambit to pian mangiyopresi na nagkalalo nin espiritual a tulong ed saramay inimbitaan yo. No diad kaplesan et agnira manaaral na Biblia, seguroen a bisitaen iran tampol kayari na Memoryal tan idemostra no panon a gagawaen so libren panangiyaral na Biblia. Pian onaligwas ira ed espiritual, kaukolan da met so onatendi ed saray pantitipon na kongregasyon. (Heb. 10:24, 25) Pian nagawaan iya, pasesegen iran onatendi a regular. Kaukolan ya iyuksoy na saray mamatatken so ibisita ed saray inaktibon agagi ya inmatendi ed Memoryal pian pabiskegen ira a molimolien so nadngel dan diskurso. Saya so mamaseseg ed sikara pian magmaliw ya aktibo lamet ed kimey na kongregasyon.
5. Panon itayon nagunggonaan diad panselebra ed Memoryal?
5 Say panselebra ed Memoryal so mangitatarya na pankanawnawa pian masimoon a dalepdepen no antoy agawaan la nen Jehova tan si Jesus ed biang tayo. Say ontan a panagdalepdep so mamaaralem na panangaro tayo ed sikara tan mangapekta ed kondukta tayo. (2 Cor. 5:14, 15; 1 Juan 4:11) Natan la so panaon pian iparaan so inkasikatayo tan saray interesado parad sayan importantin okasyon a legan na satan et “ipakabat tayo so impatey na Katawan.”—1 Cor. 11:26.