Tepet
◼ Sano manpasyar ed Bethel, antoy nepeg tayon lawas nonoten nipaakar ed panangawes tan panag-ayos?
Diad impaningbat ed kaimportantian na manepeg a panangawes tan panag-ayos, kinomentoan na Organized to Accomplished Our Ministry so pankaukolan parad kalinisan ed laman, masimpit a panangawes, tan maabig a panag-ayos sano manpulong tan onatendi ed saray Kristianon miting. Insan, diad pahina 131, parapo 2, inkuanto: “Onaplika met itan sano ombisita ed ayaman a Bethel diad Brooklyn odino dinanman ed saray sangan opisina na Sosyedad. Nodnonoten a say ngaran a Bethel et mankabaliksay ‘Abung na Dios,’ kanian say panangawes, panag-ayos tan kondukta tayo so nepeg a mipara ed say iilaloan ed sikatayo sano onatendi ed saray miting pian mandayew ed Kingdom Hall.”
Anggaman matukoy so panangawes na karaklan ed saray agagin ombibisita ed Bethel, naiimano a walaray agagin siansia nin akulastay a mankawes no walad Bethel. Unong ed saya, a singa ed arum nin aspekto na panagbilay tayo bilang Kristiano, labay tayon mantinien so miparan atagey iran estandarte a mangibiig ed sikatayo ed say daan a mundo. Kanian sano ombisita ed Bethel, tepetan so inkasika: ‘Kasin masimpit so panangawes tan panag-ayos ko? Kasin mangisindag itan a maong ed Dios a dadayewen ko? Kasin naopendi so arum ed itsurak? Kasin ipapanengneng koy manepeg ya alimbawa parad arum a kaiba min manpasyar ed Bethel, diad pilimeron pankanawnawa?’
Naimanon kaslakan ed saramay ag-akasulong na manepeg no manpasyar ed Bethel et saray iyaaralan na Biblia odino saray interesado. Kanian, sakbay iran imbitaan ed Bethel, maabig no ipaliwawa tayo nin unona iray estandarte ed Bethel nipaakar ed panangawes tan panag-ayos ta pian makapanparaan tan makapansulong ira na matukoy. Anggaman nayarin masuyat tayon gawaen iya, lalon panangaro itan nen say nalikna ran sikaray nababaingan lapud onla ira’d Bethel ya ag-akasulong na matukoy.
Sikatayo komon, ontan met ed saramay iyaaralan tayo, so lawas ‘mamarakep ed bangat na Manangilaban, a Dios tayo’ lapud panangawes tan panag-ayos tayo.—Tito 2:10.