Sakey Kan “Iimatonan ed Teatro”!
1 Onia so insulat nen apostol Pablo: “Agawa kami ya iimatonan [ed teatro] dia ed mundo, tan dia ed saray angheles, tan dia ed saray totoo.” (1 Cor. 4:9) Antoy kabaliksan na saya, tan panon itan a mangapekta ed sikatayo diad ministeryo tayo natan?
2 Parad sakey a taga-Corinto, say balikas ya “iimatonan ed teatro” so maseguron mangipanonot ed pansaran ebento na gladyatoryal a panlalaban na Romano, a ditan et saray akondenan totoo so imparada ed imaton na nilibon manbabantay sakbay iran maruksan pateyen. Mipadpara, say dakerakel a manbabantay—totoo tan saray anghel—so akaimaton ed impanirap na inmunan-siglo iran Kristiano lapud impantasi ra nipaakar ed Panarian. (Heb. 10:32, 33) Say manamemben-katooran a kurang da so angapekta ed dakel a makakaimaton, a singa met ed epekto na panagsungdo tayo diad modernon agew a teatro. Siopara so makakaimaton ed sikatayo?
3 Diad Mundo tan ed Totoo: No maminsan ipapalapag na media iray report nipaakar ed aktibidades na totoo nen Jehova. Anggaman papablien tayo so maabig iran report a walay katuaan to tan asimbang nipaakar ed kimey tayo, ilaloan tayo met iray makapuy a report ya ikayat na saray managpabanday a panapanaon. Anggaman kuan, nepeg tayon itultuloy ya irekomenda so inkasikatayo bilang ministros na Dios “lapu ed mauges a dengel tan maong a dengel.” (2 Cor. 6:4, 8) Diad saray matuan-impanpuso a makakaimaton, napapatnagan dan sikatayo iray tuan babangatan nen Jesu-Kristo.
4 Diad Saray Anghel: Saray espiritun pinalsa so makakaimaton met ed sikatayo. Say Diablo tan saray demonyo to so manbabantay—balet walaan na “baleg a sanok,” a manggugunaet a mamatunda ed “kimey a panagtasi ed si Jesus.” (Apoc. 12:9, 12, 17, NW) Saray matoor ya anghel na Dios so manbabantay tan manliket sano manpataoli so anggan sakey a managkasalanan. (Luc. 15:10) Makapabiskeg ed sikatayo so pakaamtan momoriaen na saray anghel so ministeryo tayo bilang sankaganatan, makagunggonan kimey a nagagawa ed dalin natan!—Apoc. 14:6, 7.
5 Sano makaabet kayo na isusumpa odino isipen yon say ministeryo yo et andian na resulta, tandaan a sikayo so sentro na sankatalbaan ya imano. Say matoor a panagsungdo yo so mangipaparungtal a nagkalalo ed katooran yo. Diad kaunoran, say ‘maabig a pibabakal na pananisia’ yo so ontulong ed sikayon ‘ombemben a malet ed bilay ya andi-anggaan.’—1 Tim. 6:12.