Panon Kaimportante so Kristianon Panlilimog?

¹ “Anggapo so toon makapanbukbukor.” Satan a balikas na koma-17 siglon manag-anlong so angalig labat ed ibabaga na Biblia nipaakar ed manunan nakaukolan na too​—say panlilimog. (Uli. 18:1) Say Kristianon panlilimog tayo so mamepenek ed sayan pankaukolan. Diad antoran makagunggonan paraan?

² Diad Ministeryo: Sakey ed saray sankamanunaan a gunggona et say pamapabiskeg tan panusuporta na agagi tayo ed sikatayo diad publikon ministeryo. Imbaki nen Jesus iray babangatan to “a sanderwa” a manpulong. (Mar. 6:7; Luc. 10:1) Mitunosan ed sayan pangaligan, sano manpupulong itayon kaibay arum, naeeksperiensya tayo so katuaan na Eclesiastes 4:9, 10. Legan a saniiba tayon susumpalen so ministeryo tayo, say pananisia, katutulok, tan panangaro na saray kaulop tayo so pakagamoran tayoy pakpel tan mamasimbalo ed seseg tayo.

³ Parad Personal a Tulong: Say impanaagi tayo so lapuan met na panamaseseg tan panangiwanwan pian natalonaan iray desdes tan naresistian iray tukso. Saray Kristianon kalimog tayo so nayarin mangipaimano ed sikatayo ed saray teksto a manresolbi ed personal iran problema tayo. Nayarin sikara ni ingen so mangipikasi ed biang tayo, a singa pangipipikasi tayo ed sikara. (2 Cor. 1:11) Tan seguradon say maong ya ehemplo ra so mamakiwas ed sikatayo parad maabig iran kimey tan mamabiskeg ed sikatayo.

⁴ Diad Saray Miting: Say bendisyon na Kristianon panlilimog so panggayagaan tayo sano regular itayon onatendi ed saray miting ed kongregasyon. (Heb. 10:24, 25) Say programa so daakan na espiritual ya instruksion, tan say kiwawala tayo ed saray miting so mamapaapit ed sikatayo ed saray kapananisiaan tayo. Sarayan pantitipon so mangiiter ed sikatayo na pankanawnawan ondengel ed pangibalikas na saray agagi tayo ed pananisia ra, balanglan diad plataporma odino sano mankomento ira. (Roma 1:12) Napaelet so bedber na panlilimog tayo legan itayon mankokomustaan sakbay tan kayari na aral. Saratan ya okasyon so mangiiter ed sikatayo na saray pankanawnawa ya isalaysay iray mismon makapabiskeg-pananisian eksperiensya tayo. Saray personalidad tayo so naimpluensiaan diad makagunggonan paraan sano maparanay itayon milimog ed saraman so mangaaro ed si Jehova, say Salita to, say kimey to, tan ed saray totoo to.​—Fil. 2:1, 2.

⁵ Kaukolan tayoray Kristianon kalimog tayo. No anggapo ira, lalon mairap so panakar tayo ed mainget a dalan a mamaarap ed bilay. Balet, lapud panangaro tan panamaseseg da, makapantultuloy itayo a mamaarap ed matunong a balon mundo nen Jehova.​—Mat. 7:14.