Anapen Iramay Makanepegan
1 Saray bilin nen Jesus ed panumpal ed panagpulong a kimey et nayarin mairap parad sikatayo. Oniay inkuan to: “[Diad] anggan dinan a syudad ono baley a looban yo, anapen yod’man no siopa so makana.” (Mat. 10:11) Lapud mabetbet ya anggapo iray totoo natan ed ayaman da, panon tayon epektibon naromog iray makanepegan?
2 Usisaen so Teritorya Yo: Manuna ed amin, usisaen so teritorya yo. Kapigan a maslak a walad ayaman iray totoo? Iner so kawalaan da no agew? Kasin wala so agew odino oras a nayarin mamatuloy ira ed idalaw yo? Say pangitukoy na ministeryo yo ed rotina tan saray sirkumstansya na totoo diad teritorya yo so makatulong pian nagawaan yo so sankaabigan.—1 Cor. 9:23, 26.
3 Dakel a manangipalapag so matalona ed pakasabi ed totoo diad ayaman da legan na masakbay iran oras ed labi. Arum ya unabung so mas relaks tan ondengel ira ed ontan ya oras. Sano mamauran tan agkayo makapaway lapud delap, nayarin epektibo so pampulong panamegley na telepono odino pansulat. Say pankimey ed pasen na negosyo tan pampulong ed saray publikon lugar so paraan met pian nipasabi so maong a balita ed saray totoo.
4 Legan na bulan na espisyal a kimey, inyarunsa na sakey a kongregasyon so ngarem lan pampulong kapag no Sabado tan Simba tan pampulong ed labi kapag no Mierkoles tan Biernes. Sikaray angorganisa met na panagpulong panamegley na telepono tan pankimey diad pasen na negosyo. Sarayan uksoyan so amawala na pirmin inkaligsa ed ministeryo kanian denesidi na kongregasyon ya itultuloy iratan.
5 Ompawil a Maseeseet: No diad teritorya yo et mairap a nasabi so totoo diad ayaman da sano ompawil kayo, panggunaetan so misipanan ya ompawil kayo diad kada pampatanir yo, anggan diad primeron indalaw. Insan, seguroen a tooren so impisipan yo. (Mat. 5:37) No matukoy, nayarian yon alaen so numero na telepono na unabung. Makatulong met iya ed sikayo pian nakatongtong yo lamet so too.
6 Say panseseet tayon mananap ed saray makanepegan tan mamayubo ed interes a naromog tayo et maseguron bendisyonan nen Jehova.—Uli. 21:5.