Saray Pakabat
◼ Opresin literatura ed Oktubre: Mangiyopresi na sansakey a kopya na Say Panag-Bantayan tan Awake! No walay angipatnag na interes, iparungtal so brosyur a Kakaukolanen tekep na kalat a makapangigapo na saray panangiyaral na Biblia. Nobyembre: Say libro a Manaral Manlapud Sankamaongan a Managbangat. No ibaga na totoo ya anggapoy anak da, iyopresi so brosyur a Kakaukolanen. Disyembre: Anggan dinan ed saray onggendan a libro so nayarin iyopresi: The Greatest Man Who Ever Lived, The Bible—God’s Word or Man’s?, My Book of Bible Stories, odino Makapambilay Kayo na Ando lan Ando Diad Paraiso ed Dalin. Enero: Anggan dinan iran daan a libro a 192-pahina a walad simpenan yo so nayarin iyopresi. Niarum ni, sarayay onggendan a daan a libro et wala ed Bethel tan papasesegen mi iraman so makapangusar ed saraya a man-order parad sayan kampanya: Say Katuaan a Mangitonton ed Bilay ya Andi Anggaan tan True Peace and Security—From What Source? diad Bicol; Makapambilay Kayo na Ando lan Ando Diad Paraiso ed Dalin, melag ya edisyon diad Bicol, Pangasinan, tan Samar-Leyte tan baleg ya edisyon diad Cebuano tan Iloko; Happiness—How to Find It diad Iloko; Good News to Make You Happy tan Listening to the Great Teacher diad Samar-Leyte.
◼ Say insert ed sayan isyu na Ministeryo Tayo ed Panarian et say “Eskedyul ed Teokratikon Eskuelaan Parad Ministeryo ed 2005” tan nepeg ya iyatol bilang reperensya ed interon 2005.
◼ Nayari la natan ya ipawit ed sangan opisina iray order parad 2005 Yearbook. Walay impawit min Yearbook Order Blank ya akatekep ed monthly statement ya usaren parad sayan gagala. Kaukolan a pirmaan iya na mangaasikaso tan lingkor ed literatura insan da ipawil so orihinal a kopya ed sangan opisina ya ag-onlampas ed Nobyembre 15, 2004.
◼ Pananguman ed Distriton Kombension: Inuman so petsa na kombension ed Roxas City a datin Disyembre 17-19 tan ginawan Disyembre 31, 2004–Enero 2, 2005.
◼ Nepeg ya ipaway a tampol na saray kongregasyon so sankabaloan iran isyu na Say Panag-Bantayan tan Awake! diad bektan naawat iratan. Makatulong iya pian nikabisado na saray manangipalapag so karga na saray magasin antis dan iyopresi iratan ed lawak na kimeyan.