Tepet
◼ Panoy nepeg a pangasikaso tayo ed saray asainmin tayo ed kongregasyon?
Say mauksoy a kikukurang na kongregasyon na totoo nen Jehova et resulta na nankakasakey a pansasagpot. (1 Cor. 14:33, 40) Imanoen pa so nalalanor ed sakey lambengat ya aral ed kongregasyon. Nilikud ed mismon programa, dakel ni ray kimey antis tan kayari na aral legan ya aasikasoen na agagin lalaki tan bibii so nanduruman asainmin da. Saray arum a kimey ya agnaiimano na arum et importante met. Panon itayon makapitulongan ed sayan uksoyan?
Manbulon kayo la. Saramay mabulos a mankimey so makalmo na dakel a kikimeyan. (Sal. 110:3) Ipatnag so panamabli ed saray mansasakit tan maedad la. Ontulong ed panaglinis ed Kingdom Hall. Dakel so nagawaan tayo a makagunggona sano manbulon itayo. Kaukolan tayo lambengat a kaliktanen so ontulong.
Mauyamo a manlingkor. Saray mauyamo a totoo so maliket a manlilingkor ed arum. (Luc. 9:48) Say inkauyamo so mamokpok ed sikatayon akoen so dakel a responsabilidad ya agtayo lanlamang nasarag a gawaen. Niarum ni, ontulong ed sikatayo so inkauyamo pian ag-abusoen so autoridad tayo.—Uli. 11:2.
Napanpiyaan kayo komon. Si Moises so pinaseseg a mamili na ‘napanpiyaan a lalaki’ a mangasikaso ed responsablin posisyon diad kadaanan ya Israel. (Exo. 18:21, Maung a Balita) Kaukolan met itan a kalidad natan. Panseetan yon gawaen so kada asainmin a naawat yo. (Luc. 16:10) No agyo nagawaan so asainmin yo, seguroen a wala so matukoy a kasandi a mangasikaso ed satan sano anggapo kayo.
Mamasya kayo. Saray Kristiano so bibilinen a mankimey a sigpot kamarerwa diad pantratrabahoan da. (Col. 3:22-24) Nagkalalo la a kakaukolanen itan sano mankikimey pian ombulaslas so tuan panagdayew. Anggan sano ompatnag a melmelag odino agtanto importante so kimey, bendisyon itan ed kongregasyon sano maabig so impakagawa na satan.
Kada asainmin so mangiiter ed sikatayo na pankanawnawan nipatnag so panangaro tayo ed si Jehova tan ed saray agagi tayo. (Mat. 22:37-39) Komon ta matoor tayon gawaen so antokaman a kimkimey ya impudir ed sikatayo.