Ipatnag so Personal ya Interes—Diad Pagmaliw a Mapangasi
1 Oniay imbaga na sakey a datin mahusga ed saray Tasi nen Jehova sanen nonodnonoten to so primeron impakapitongtong to ed sakey a Tasi: “Diad tua et agko nanonotan no anto la’may nantongtongan mi, balet say natandaan ko et say inkamapangasi to ed siak, tan say inkamaparawes to tan inkamapaabeba to. Talagan inmapit so liknaan ko ed inkatoo to.” Ipapabitar na sarayan komento so kaimportantian na pangipatnag na masimoon a personal ya interes ed saramay pupulongan tayo.—Fil. 2:4.
2 Say Aro et Mapangasi: Sakey a paraan a nipatnag tayo so panangaro ed arum et diad pagmaliw a mapangasi odino mauyamo. (1 Cor. 13:4) Say mapangasin too et mangipatnag na aktibon interes ed pankaabigan na arum, a panggunaetan toy manggawa na saray bengatlan makatulong ed sikara. Siempre, say panagpulong a mismo et sakey lan panangipatnag na panangasi. Balet aliwan diad pampulong labat ed totoo a nipatnag tayoy tuan panangiyansakit ed sikara. Say interon paraan na pidedeneng tayo ed totoo—say inkamakaaro tayo, maabig a kakikiwas tayo, paraan na itatalineng tayo, saray ibabaga tan paraan na panangibaga tayo ed saratan, anggan say kanenengneng tayo ed arum—so mangipatnag a talagan mangiyaansakit itayo.—Mat. 8:2, 3.
3 Say maaron panangiyansakit tayo ed totoo so mamakiwas met ed sikatayon iyopresi so tulong diad praktikal iran paraan. Legan a manpupulong ed kabkaabungan, sakey a payunir a laki so tampol a pinaalis na sakey ya akulaw lan balo sanen naamtaan ton sikatoy Tasi. Imbaga ton sikatoy walad stepladder ed kusina a mansasalat na bombilya sanen nantimbre so agin laki. “Makarisgo no gawaen yo itan a bukor,” so inkuan na agi. Pinaloob to so agin laki. Sinalatan na agi so bombilya insan la nampatanir. Agnambayag, sanen say balo so binisita na anak ton laki pian komustaey kipapasen to, inistorya na balo ed sikato so agawa. Say anak so nandinayew a maong ya inanap to so agi pian misalamat. Saya so nanresulta ed maabig ya impantongtong da, ya angawatan na laki na panangiyaral na Biblia.
4 Diad pagmaliw tayon mapangasi, nipapatnag tayoy aro nen Jehova ed totoo tan naparakep tayo so mensahe na Panarian. Kanian, komon ta lawas tayon ‘ipaamta a komikimey itayo na Dios diad panamegley na panangasi.’—2 Cor. 6:4, 6, Maung a Balita.